1मिनु इस्राएलीपुकी गाक्शा, यरीको यर्दन खोला आ आइक्ची हांबुम बाक्शो मोआब ङा दिंममी बाक्तीक सेल्तेक्म।
2मिनु सिप्पोर आ तौ बालाकमी इस्राएलीपुकीम एमोरी आन कली मार पाइश्शो बाक्मा, मेको नेल्ल तुइश्शो बाक्त।
3मिनु मोआब ङा मुर इस्राएली आन कली तशा साप्पा हिंतेक्म। मारदे हना मेको शुश बाक्तेक्म। मोपतीके मेको आन थुं ग्येत्थ लुक्च दुम्त।
4मिनु मोआबीपुकीमी मिदयान ङा खाल्पा आन कली “दोपा ब्यफोम घांस बाक्तीक दिंम चाइश्शा घांस नेल्ल ब्वाइबा, मोपा एको हुलपुकीमी इं कली एर ओंथ नेल्ल रे ब्वाइनीम” देंतेक्म। मेना सिप्पोर आ तौ बालाक मोआब ङा पिप बाक्त।
5मेकोमी आमाव रागी युफ्रेटीस माइश्शो ठेयब खोला आ नेक्था, पेथोर सहरम बाक्शो बेओर आ तौ बालाम कली मुरपुकी ब्रथ सोइक्ताक्व। मेकोपुकीमी “इजीप्त रे जाक्शो मुरुम रागी नेल्ल ब्रीतेक्म। मेकोपुकी आं नेक्था जाक्शा बाक्शो बाक्नीम। गन्ती ३१:८; यहोसु २४:९; मीका ६:५
6मुल गे जाक्को। आं कली वारच पा, मेको मुर आन कली सराप चीले पाइक्मी। मारदे हना मेकोपुकी आं क्येङा शुश नु बोल्यो बाक्नीम। मो पाइतीनी हना, गो मेको आन कली ग्राशा, आं रागी रे ग्रुंइने चबु वा। मारदे हना गे सु कली आसीक गेनीनी, मेको आसीक राइनीम। मिनु सु कली सराप चीले पाइनीनी, मेको सराप चीले राइनीम, दे गो तुइक्नुङ” दे सोइक्ताक्व। २पत्रुस २:१५
7मिनु मोआब नु मिदयान ङा खाल्पापुकीम मेको गेय पचा कली क्येट कुरशा, बालाम आ बाक्तीक जाक्शा, बालाक आ लोव़ शोव़तेक्म।
8मिनु बालाममी मेको आन कली “मुलाक्दो एकेन बाक्कीन। मिनु परमप्रभु यावेमी आं कली मार देंबा, गो मेकोन इन कली देंनुङ” देंत। मोपतीके मेको मोआब ङा ठेयब गेय पाइब मुरपुकी मेको नाक्दो बालाम आ खिं उइ बाक्तेक्म।
9मिनु परमप्रभु बालाम आ बाक्तीक जाक्शा, मेको कली “गे नु बाक्ब मुरपुकी सु नमी?” देंत।
10मिनु बालाममी परमप्रभु कली “मोआब ङा पिप, सिप्पोर आ तौ बालाकमी आं कली
11‘इजीप्त रे ग्रूशा जाक्शो मुरपुकीम रागी नेल्ल ब्रीशो बाक्नीम। मुल जाक्शा आं कली वारच पा मेको आन कली सराप चीले पाइक्मी। मो दुम्त हना, गो मेको आन कली लडाइ पा ग्राशा, खेरने चाप्नुङ ङा कों?’ दे लोव़ कुर पा सोइश्शो मुर बाक्ब” देंत।
12मिनु परमप्रभुमी बालाम कली “गे एकोपुकी नु मलावो। गे मेको मुर आन कली सराप चीले मपाइक्मी। मारदे हना मेकोपुकी आसीक रशो बाक्नीम” देंत।
13मिनु बालाम सुनी कना बोक्शा, मेको बालाक आ सोइश्शो मुर आन कली “गेपुकी इन रागी लने। मारदे हना, परमप्रभु यावेमी आं कली गेपुकी नु लचा मगेयी” दे माइक्तीमी।
14मिनु मोआब ङा ठेयब मुरपुकी बालाक आ बाक्तीक जाक्शा “बालाम गोपुकी नु जाक्ने मबिस्से” देंतेक्म।
15मिनु बालाकमी लेंशा, मेको आन क्येङा ठेयब नु शुश मुरपुकी सोइक्ताक्मी।
16मिनु मेकोपुकी बालाम आ बाक्तीक जाक्दीश्शा “सिप्पोर आ तौ बालाकमी इन कली ‘आं बाक्तीक जाक्चा मारेइम मतेक्गल।
17गो थमा पा इ कली मान पशा, ठेयब सेल्नुङ। गे मार देंनीनी, गो मेकोन पाइनुङ। मिनु जाक्शा, मेको मुर आन कली सराप चीले पाइक्मी’ देंत” देंतेक्म।
18तन्न बालाममी बालाक आ गेय पाइब मुर आन कली “बालाकमी सुन नु चांदीम ब्रीशो आ दरवार गेती हना यो, गो परमप्रभु यावे, आं परमप्रभु आ लोव़ आइक्च बाक्त हना यो, ठेयब बाक्त हना यो, मेको लोव़ लाक्ने मचाप्नुङ। १राजा १३:८
19मिनु अरु आन खोदेंशो पा गेपुकी यो, मुलाक्दो एक उइ बाक्कीन। मिनु परमप्रभु यावेमी आं कली लेंशा मार मार देंबा गो तुइक्नुङ” देंत।
20मिनु मेको नाक्दो परमप्रभु बालाम आ बाक्तीक जाक्शा, मेको कली “एको मुरपुकी इ कली ब्रेत्थ जाक्शो बाक्तेक्म हना, बोक्को, मिनु मेकोपुकी नु लावो। तन्न गो इ कली मार देंङा, मेको ला पावो” देंत।
21मिनु बालाम सुनी कना बोक्शा, आ गधा छांदेशा मोआब ङा ठेयब मुरपुकी नु लत।
22मिनु मेको मोपा लतीके परमप्रभु गाइक्ताक्व। मिनु परमप्रभु यावे आ स्वर्ग ङा गेय पाइब कामी मेको कली तेक्चा, दे लांम राप्शा बाक्त। मिनु बालाम आ गधाम ङोइश्शा लना लन बाक्त। मेको आ गेय पाइब निक्शी यो मेको नु गाक्शो बाक्ताक्स। उत्पत्ती १६:७
23मिनु मेको गधामी परमप्रभु यावे आ स्वर्ग ङा गेय पाइब शोइश्शो तरवार शेशा, लांम बाक्शो ताप्तु। मिनु मेको गधा हिंशा, लां रे रूम लत। मिनु बालामम गधा कली लां गे सोइक्चा कली तुप्तु। यहोसु ५:१३
24मिनु परमप्रभु यावे आ स्वर्ग ङा गेय पाइब आइक्च लांम राप्शा बाक्त। मेको लां निम्फा पटटी गारो प्रोव़शो अङगुर रू आस दातेमी बाक्त।
25मिनु मेको गधामी परमप्रभु यावे आ स्वर्ग ङा गेय पाइब कली तशा, गारो गे ढेंसेसीशा गाक्त। मिनु बालाम आ खोइली मेको गारोम खोरताक्व। मिनु मेकोमी मेको कली लेंशा तुप्तु।
26मिनु लेंशा परमप्रभु यावे आ स्वर्ग ङा गेय पाइब इच्का ग्येत्थ लशा, ग्युरा पेरा तेइ रे मलाक्चा ङा पा आइक्च लांमी राप्त।
27मिनु बालाम आ गधाम परमप्रभु यावे आ स्वर्ग ङा गेय पाइब कली तशा, गु ब्रेशा बाक्त। मिनु बालाम थाम्पा गाइश्शा, आ गधा कली कोक्केमी तुबा बाक्त।
28मिनु नोले परमप्रभु यावेमी मेको गधा कली ब्वाक्ब सेल्तु। मिनु मेकोमी बालाम कली “गो इन कली मार पङा? मारदे गे आं कली सां खेयप तुप्यीनी?” देंत। २ पत्रुस २:१६
29मिनु बालाममी मेको गधा कली “गे आं कली शाक्ती। गो आं गुइम तरवार बाक्शो हना, गो इ कली मुलन साइक्न वा” दे माइक्तु।
30तन्न गधाम बालाम कली “गो ङोंइती रे मुल सम्म इन ङोइश्शो गधा मनङा ङा? गो ङोंइती इन कली गेनायो ओदेंशो मपङ” देंत। मिनु मेकोमी “मपवी” देंत।
31मिनु परमप्रभु यावेमी बालाम कली मिक्च ताइब सेल्तु। मिनु मेकोमी तरवार शोइश्शो परमप्रभु यावे आ स्वर्ग ङा गेय पाइब का लांम राप्शो ताप्तु। मिनु बालाम खुम्की पा बाप्त।
32मिनु मेको परमप्रभु यावे आ स्वर्ग ङा गेय पाइबमी मेको कली “मारदे इ गधा कली खेयप सां तुबी? कोव़ङो, गो इ लां तेक्चा कली जाक्शो बाक्नुङ। मारदे हना गे आं ङोंइती इ दला दाक्स पाप्तीवी।
33इ गधामी आं कली तशा, खेयप सां सम्म आं बाक्तीक रे प्रोक्त। मेकोम आं कली तशा, मप्रोक्शो हना, गो इ कली मुल साइक्ने थुमु वा। तन्न मेको कली चहिं सेसीन सोइक्तु वा” दे माइक्तु।
34मिनु बालाममी परमप्रभु यावे आ स्वर्ग ङा गेय पाइब कली “गो पाप पाता। आं लां तेक्शा इन राप्शो गो मतुइक्तु। मिनु इन ङोंइती एको मरिम्शो बाक्त हना, गो लेश्शा लाइनुङ” देंत।
35मिनु परमप्रभु यावे आ स्वर्ग ङा गेय पाइबमी बालाम कली “एको मुरपुकी नु लावो। तन्न गो इ कली मार लोव़ पाइनुङा, गे मेको ला देनो” दे माइक्तु। मोपतीके बालाम बालाक आ सोइश्शो ठेयब मुरपुकी नु लत।
36मिनु बालाकमी बालाम जाक्शो नेंशा, मेकोमी आ रागी आ सुर अरनोन खोला ङा सांद ङा सहर इर-मोआब सम्म मेको कली ग्रुम्थ लत।
37मिनु बालाकमी बालाम कली “गो इन कली ब्रेत्थ मुर सोइक्ताक्ङमी। तन्न गे मारदे आं बाक्तीक मजाक्नी? गो इ कली मान पने मचाप्नुङा ङा?” देंत।
38मिनु बालाममी बालाक कली “मुल गो इन बाक्तीके जाक्ती। मार देंचा माल्नुङा, दे मतुइक्नुङ। परमप्रभुम मार देंबा, गो मेको ला देंने चाप्नुङ” देंत।
39मिनु बालाम बालाक नु लत। मिनु मेको नेल्ल किरयथ-हुसोथमी जाक्तेक्म।
40मिनु बालाकमी ब्यफ नु क्यारश भेडा क्योरशा चढ़ेशा, बालाम नु मेको नु बाक्ब ठेयब मुर आन कली यो थुल्तीमी।
41आ दीसा सुनी बालाकमी बालाम कली लाइश्शा, बामोथ-बालमी ङोइश्शा लत। मिनु मेकेर रे बालाममी इच्का मुर आन कली ताप्तु। यहोसु १३:१७
