Text copied!
CopyCompare
GALA Sɛʋɛi - Zozuwe

Zozuwe 21

Help us?
Click on verse(s) to share them!
1Leevi nuiti ta-ʋɛlɛyeɠe ɠundiɠiiti ti ʋaani zalaɠa ɠula nui Eleazaal ʋɔ bɛ, ta Nun ná-doun zunui Zozuwe, ta Izelayɛle wolodai zɔiti ta-ʋɛlɛyeɠe ɠundiɠiiti,
2Silo, Kanaan yooi zu. Ti ɓɔɛni ti ʋɔ, ti ɠɛ ma: «Ɠɔoɠɔ GALAGI devei veeni Moize ya, ga taaiti ti ve gi ya, ga gi zei ti zu, ta ti-maaɠooliiti, ʋɛ gá-loganiiti ta ɠɛ laamiizu ná.»
3Izelayɛle nuiti ti taai tanigaa zeɠeni ta-yooiti su, ta ti-maaɠooliiti, ti fe Leevi nuiti zea, eɠɛʋelei Ɠɔoɠɔ GALAGI ná-devei ɠɛni la.
4Kpakutoomai zolooni mɔunpa su Keɠate mavofodaiti ta-ʋɛlɛyeɠeiti ma. Ti zaama, Leevi nuiti ti ɠɛni ga zalaɠa ɠula nui Aalɔn mavofodaiti, naati ti taa puugɔ maazu saʋagɔ (13) zɔlɔɔni kpakutoomai zu, niiti ti Zuda, Simiyɔn, ta Ɓɛnzamɛnni ta-wolodaiti ta-yooiti su.
5Keɠate mavofodai zɔiti ti taa puugɔ zɔlɔɔni kpakutoomai zu, Efelayime ná-bolodai ná-zooi zu, ta Dan ná-bolodai ná-zooi zu, ta Manasee ná-bolodai ɠilazuʋɛ ná-zooi zu.
6Gɛɛleson mavofodaiti ti taa puugɔ maazu saʋagɔ (13) zɔlɔɔni kpakutoomai zu, Isakaal ná-bolodai ná-zooi zu, ta Asɛɛl ná-bolodai ná-zooi zu, ta Nɛfetali ná-bolodai ná-zooi zu, ta Manasee ná-bolodai ɠilazuʋɛ ná-zooi zu, nii é zeini Ɓasan yooi zu.
7Melali mavofodaiti, eɠɛʋelei ta-ʋɛlɛyeɠeiti ti la, ti taa puugɔ maazu felegɔ (12) zɔlɔɔni Luɓɛn ná-bolodai ná-zooi zu, ta Gade ná-bolodai ná-zooi zu, ta Zaɓulɔn ná-bolodai ná-zooi zu.
8Izelayɛle nuiti ti naama laaiti ta ti-maaɠooliiti feeni Leevi nuiti zea ga kpakutoomai, eɠɛʋelei Ɠɔoɠɔ GALAGI ma levei veeni la Moize ya.
9Zuda ná-bolodai ná-zooi zu, ta Simiyɔn ná-bolodai ná-zooi zu, taai niiti ti ti veeni naati zea, ti-laaseigiti kaa,
10ti ɠɛni ga Keɠate ná-pɛlɛyeɠeiti tɔnɔ, Aalɔn mavofodaiti saama, Leevi ná-bolodai zu. Mazɔlɔɔ tiya ɠa kpakutoomai ti zoni mɔunpa.
11Ti Kiliyate-Aaleɓa veeni ti ya, nii é ga Ɠeeɓelɔn, Zuda ɠize yooi zu, ta maaɠoolii. Aaleɓa ɠɛni ga Anake kɛɛɠɛ.
12Kɛlɛ kpalagiti ta taa goiti ti ɠilini ma laai ʋa, naati ti veeni Yefunee ná-doun zunui Kalɛɓe ya ga nɔnɔ.
13Taai niiti ti veeni zalaɠa ɠula nui Aalɔn mavofodaiti zea, ta ti-maaɠooliiti, naati ti ɠɛni ga: Ɠeeɓelɔn, taai naa ɠɛni ga nu ʋaa nuiti maaʋelazuʋɛ ta, Liɓena,
14Yatiil, Esetemoa,
15Ɠɔlon, Deɓiil,
16Ayɛn, Yuta, é ʋɛɛ Ɓɛte-Seemɛse ʋa. Taa wola taaʋuugɔ ɠana, ti sɔlɔɔni Zudani ta Simiyɔn ta-wolodaiti ta-yooi zu.
17Taai niiti ti ti zɔlɔɔni Ɓɛnzamɛn ná-bolodai ná-zooi zu, ta ti-maaɠooliiti, naati ti ɠɛni ga: Gaɓaɠɔn, ta Geeɓa,
18é ʋɛɛ Anatɔte ʋa, ta Alemon, taa wola naanigɔ.

19Taa wolai liegɔi zalaɠa ɠula nuiti Aalɔn mavofodaiti ti sɔlɔɔni, é ɠɛni ga taa wola puugɔ maazu saʋagɔ (13), é ʋɛɛ ti-maaɠooliiti ba.
20Leevi nuiti ti ga Keɠate mavofodai zɔiti ta-ʋɛlɛyeɠeiti, naati ti taa wolaiti sɔlɔɔni ga kpakutoomai, Efelayime ná-bolodai ná-zooi zu.
21Taai niiti ti ti zɔlɔɔni, ta ti-maaɠooliiti, naati ti ɠɛni ga: Sikɛme, taai naa ɠɛni ga nu ʋaa nuiti maaʋelazuʋɛ ta, Efelayime ɠize yooi zu, naa ʋɛɛ Geezɛɛl ʋa,
22ta Kiɓesayime, é ʋɛɛ Ɓɛte-Ɠɔlon ʋa, taa wola naanigɔ.
23Taai niiti ti ti zɔlɔɔni Dan ná-bolodai ná-zooi zu, ta ti-maaɠooliiti, naati ti ɠɛni ga: Ɛletekee, ta Giɓeton,
24ta Ayalon, é ʋɛɛ Gate-Limon ʋa, taa wola naanigɔ.
25Taai niiti ti ti zɔlɔɔni Manasee ná-bolodai ɠilazuʋɛ ná-zooi zu, ta ti-maaɠooliiti, naati ti ɠɛni ga: Taanake, é ʋɛɛ Gate-Limon ʋa, taa wola felegɔ.
26Taa wolai liegɔi Keɠate mavofodai zɔiti ti sɔlɔɔni, é ɠɛni ga taa wola puugɔ, é ʋɛɛ ti-maaɠooliiti ba.
27Leevi ʋɛlɛyeɠeiti ti ga Gɛɛleson mavofodaiti, taai niiti ti ti zɔlɔɔni Manasee ná-bolodai ɠilazuʋɛ ná-zooi zu, ta ti-maaɠooliiti, naati ti ɠɛni ga: Gɔlan, nii é Ɓasan yooi zu, taai naa ɠɛni ga nu ʋaa nuiti maaʋelazuʋɛ ta, é ʋɛɛ Ɓeesetela ʋa, taa wola felegɔ.
28Taai niiti ti ti zɔlɔɔni Isakaal ná-bolodai ná-zooi zu, ta ti-maaɠooliiti, naati ti ɠɛni ga: Kisiyon, ta Daɓelate,
29ta Yaalemute, é ʋɛɛ En-Ganime ʋa, taa wola naanigɔ.
30Taai niiti ti ti zɔlɔɔni Asɛɛl ná-bolodai ná-zooi zu, ta ti-maaɠooliiti, naati ti ɠɛni ga: Miseyale, Aɓedon,
31Ɠɛlekate, é ʋɛɛ Leɠɔɓe ʋa, taa wola naanigɔ.
32Taai niiti ti ti zɔlɔɔni Nɛfetali ná-bolodai ná-zooi zu, ta ti-maaɠooliiti, naati ti ɠɛni ga: Keedɛse, nii é Galilee yooi zu, taai naa ɠɛni ga nu ʋaa nuiti maaʋelazuʋɛ ta, ta Ɠamɔte-Dɔɔl, é ʋɛɛ Kaaletan ʋa, taa wola saʋagɔ.
33Taa wolai liegɔi Gɛɛleson mavofodaiti ti sɔlɔɔni, é ɠɛni ga taa wola puugɔ maazu saʋagɔ (13), é ʋɛɛ ti-maaɠooliiti ba.
34Taai niiti ti ti veeni Leevi ná-pɛlɛyeɠei mɔtaiti zea, ti ga Melali mavofodaiti, Zaɓulɔn ná-bolodai ná-zooi zu, ta ti-maaɠooliiti, naati ti ɠɛni ga: Yɔkeneyame, Kaaleta,
35ta Dimena, é ʋɛɛ Naɠalale ʋa, taa wola naanigɔ.
36Taai niiti ti ti zɔlɔɔni Luɓɛn ná-bolodai ná-zooi zu, ta ti-maaɠooliiti, naati ti ɠɛni ga: Ɓeesɛɛl, Yaasa,

37ta Kedeemɔte, é ʋɛɛ Meefaate ʋa, taa wola naanigɔ.
38Taai niiti ti ti zɔlɔɔni Gade ná-bolodai ná-zooi zu, ta ti-maaɠooliiti, naati ti ɠɛni ga: Lamɔte, nii é Galaade yooi zu, taai naa ɠɛni ga nu ʋaa nuiti maaʋelazuʋɛ ta, ta Maɠanayime,
39ta Ɠɛseɓon, é ʋɛɛ Yazɛɛl ʋa, taa wola naanigɔ.
40Taa wolai liegɔi Melali mavofodaiti ti sɔlɔɔni kpakutoomai zu, ti ga Leevi ná-pɛlɛyeɠei mɔtaiti, é ɠɛni ga taa wola puugɔ maazu felegɔ (12).
41Taa wolai liegɔi Leevi nuiti ti sɔlɔɔni, Izelayɛle nui zɔiti saama, é ɠɛni ga taa wola ʋuunaanigɔ maazu lɔsaʋa (48), é ʋɛɛ ti-maaɠooliiti ba.
42Taa wolai naa ɠilagilagi pɛ, zooi ɠɛni maaɠoolii zu, pele ɠana é ɠɛni la, é lo taa wolai naati kpein ba.
43Ʋele ɠana Ɠɔoɠɔ GALAGI zooi kpein feeni la Izelayɛle nuiti bɛ, nii é ma ɠonai woni ti-mɛmɛwolani bɛ. Ti seɠeni ga tɔnɔ, ti zei ná.
44GALA ge dooɠogi veeni ti ya ta-you ɠwɛmaʋɛti pɛ, eɠɛʋelei é ma ɠonai woni la ti-mɛmɛwolani bɛ. Ti zili nu nɔpɛ ge la vɔnini ti ma, é ɓɔni ti ʋa, ti pilɛ sɔlɔɔ ti zili nuiti kpein ma, ta la loni ti luɠɔ.
45Faanɛɛi kpein Ɠɔoɠɔ GALAGI ma minazeɠeni ga é kɛ Izelayɛle nuɓusɛiti bɛ, ʋele ɠana naa pɛ daazeelini la, tanɔpɛ suɲaka la ɠɛni yɛni.