Yona 1

1

2

3

4

¹Horo mbirungi Anduane Homogohanda Amidai igini Yonahondo bi mbira lamini.

²Ibugua lalu, Niniba dindi timbuni amugoria wali agali ogoriani karume mana ko ngubiore bialu kago i̱ manda bu ko, laya lalu ga̱ lalu lamule pobe, lene.

³Ani layago hale howa dege Yona ibu Anduane Homogonaga bi mo wahalu ibida polenaga hariga tara mendeha pudai bini. Ibu Yoba dindi dalipe halu hearia iba sibi mbira Sebena dindi pole lowa piyaria handa walia hene. Hondowa muni mialu maru berearu heba birule iba sibi biagoha ubanda hene. Ogoni Anduane Homogo yu wahalu pole manda buwa ani bini.

⁴Ani bialu hearia Anduane Homogohanda puyabu hongoheore iba solowarani ibilene. Ani biyagola dalubi puyabubi iba yaribubi hongohe gibiore biyagome iba sibi biago podobaga bibahe wini.

⁵Ani biyago hondowa iba sibi biagoria berearume gi timbuniore howa tini hangu hangunaga damame ti biamogo bilo lowa olagalaga bini. Ani bialu howa iba sibi biago yabia bilonaga mbirale maru ibaha mo ba pebe bini. Maru ti ani bialu heaha Yona ibu iba sibi tamu habaneha dalipe howa u palia hondo hene.

⁶Ani biaria iba sibi hondo haga biagome puwa lalu, O biragoni nde ogo ale bira lole ndo ka̱lo padebe. Ai heyalu í̠naga dama olole pu. Ibugua ina dara halu nahomoloma̱ya biamogo bulebira badago, lene.

⁷Iba sibini biabe biaga biaru tini lamigimigi bialu lalu, Ai ina mogo lene gibi o biragoni nde ai hondowa binidabe handami̱ya tiari yama, lowa yarimiya. Yalu hemiria tiari Yona ibuha yagi pene.

⁸Ani piyago hondowa tigua Yonahondo lalu, Ai o biragoni langi naberego. O biragoni tene aiwa binigomedabe. Í̠ biabe agi biaga kebe. Í̠ dindi ani aligo kebe. Í̠ hameigini ago ariabe, lalu hale hene.

⁹Ani layagola Yonahanda ladai bialu lalu, I̱ Hiburu tene ko, lene. Anduane Homogo hari daligabi dindibi iba solowarabi wabini dahuliya andaga kago mitangi bialu ibu mini yaraga haruli, lene.

¹⁰Ani lowa Yona ibugua, I̱ Anduane Homogo wahalu pole pialu hewariago o biragoni i̱ hondowa bira, lalu lamini. Ani layagola hale howa iba sibi biagoria berearume gi timbuniore howa Yonahondo lalu, Ogoni hiriribiore bialu harida, lene.

¹¹Ani lalu heagola dalu puyabubi iba yaribubi biyagoni bia timbuore hayagola tigua Yonahondo lalu, Gibiore o biragoni nabilo iname í̠hondo agi bulene ngabe, lene.

¹²Ani layagola Yonahanda ladai bialu lalu, Ai uru-o dalu puyabubi iba yaribubi gibi o biraruni tene i̱ hondowa bialu ngago uruni nabilo tí bayale pole i̱ iba solowara nigoniha minu bape hadaba, lene.

¹³Ani layagoni hale howa dege agali biarume nde iba sibi biagoni hongo howaore tanguima pialu iba angeni ubade hole manda bini. Ani bule lowa biyariabi nabibeheore halu dalu puyabubi iba yaribu biyagobi gibiore halu iba angeni ubade habe naheore bini.

¹⁴Ani dege bialu ai hongo piai hayagola ai wahalu Anduane Homogohondo bi lalu au lene. Anduane Homogo-o iname agali ogo homelo ibaha minu bape haramagonaga í̠na ina nde homoloma̱ya pani ngia dai buleni. O beremagoni bibahende tene í̠na howa beregoni iname ndo berama, lamini.

¹⁵Ani lowa tigua Yona minu muwa iba solowaraha bape hene. Aniore biagola dalu puyabubi iba yaribubi timbu gibi o bialu wiyagoniore nabi nimulope hene.

¹⁶Ani biyago hondowa agali biarume Anduane Homogo hondowa gi timbuniore howa ibuhondo mbirale bo lomabia howa delalu tigua Anduane Homogo ibunaga biabeore bialu hole lalu bi lo wini.

¹⁷Anduane Homogohanda wena timbuniore mbira dabowa ogonime Yona mo mbedogo bilene. Ani biyagola Yona ibu horo tebiru mbi tebiru lowa wena tombeha wiai hene.