Diyona 1

1

2

3

4

¹Fuya ma esega, Yaubada ya libalau Amitai natuna Diyona lisina. Iyen,

²U lau Ninewa duhu balabalamumuna be u sagaliyedi; paꞌana dodogadi edi heyaheyaya haꞌa E sibaidi.

³Yo fede, Diyona, edaꞌeda hesa ya lau watan paꞌana hige i fanuha Yaubada ena nuwatuhu i lau watan. Ya leu Diyopa nuꞌuna yai, be waga hesa ya lobahi ya laulau Sipani. Yo fede ena pasisi ya famaisa na bena ya awa gela maidana, waga tau paisowadi, be sa aulaha sa leu Sipani, paꞌana tabu Yaubada ena nuwatuhu i lau watan.

⁴Debana yai Yaubada yauma laꞌilaꞌi ya fatamali gabogabo yai mate ya adidili wananaha be waga bena ya lubi dagidagi.

⁵Waga tau paisowadi sa ꞌwasabu wananaha, yo fede hesa - hesa ya anꞌeta lau ena yaubada lisina be haba sagu ya lobahi. Ginauli mahudoꞌina waga ganahewana yai sa lofe taluhidi gabogabo yai, be tabu i bulu. Maihalana yai Diyona ya lidi waga ganahewana yai, be ya eno ꞌwafu.

⁶Waga tau ulinna Diyona ya ita be ya fatiꞌoi, iyen, Sidohana be wa laulau eno? Haga u obiyo be u lauꞌuꞌula lau em Yaubada lisina be i saguhida. Nuwana haba i nuwatohatohaeda, be ibege ta peꞌi.

⁷Waga tau paisowadi sa liba, tiyen, Haga, nesu itaꞌita yai, ta yoꞌoi, haba te lobahi, sai ena ponoli yai be heyaheyaya te lobahi. Yo fede nuwatuhuna sa lau watan, be Diyona gilu ya bahe.

⁸Yo fede sa liba, tiyen, Um ꞌe fagilum. Aho te, u falibamai! Somo amaiteꞌi wa ginaginauli? Em nuꞌu somo?

⁹Diyona alinadi ya bui, iyen, Yau Hebelu dogana, Galewa Yaubadana, “Yawe,” tanohi yo gabogabo tau ginaulidi E fadebasae

¹⁰Yau aho E gela, paꞌana Yaubada ena nuwatuhu hige ya lau watan. Yo fede, waga tau paisowadi sa tau hiti, be sa liba, ite, Sidohana be doha wa ginauli?

¹¹Hwayahwayau ya falaꞌi, yo fede waga tau paisowadi sa fatiꞌoi, itebom, Ibe somo ai lisim ꞌe ginauli haba yauma te ya fatautau?

¹²Diyona alinadi ya bui, iyen, Au pei lidiyegu, haba gabogabo ya daumwali. E sibai mate egu ponoli yai yauma ya abi esegahimiu.

¹³Waga tau paisowadi sa anpate adidili bena waga sa lawen sadai yai. In moho, hige gonowadi paꞌana ainiya, ena abi ya heyaya wananaha.

¹⁴Yo fede, sa anꞌeta lau Yaubada lebena, tiyen, Yaubada, somo ꞌe ginauli doga te lisina yai; tabu u manabalaꞌemai, um em nuwatuhu yai ꞌe ginauli.

¹⁵Habahim Diyona sa abi hitiꞌi; be sa lofe taluhi gabogabo yai. Yo fede, gabogabo ya daumwali.

¹⁶Amainiya, waga tau paisowaidi Isalaela edi Yaubada sa ꞌwasabuwen, yo fede sa kawawananahaꞌen, be edi antalasam sa ginauli, na sa angwala haba sa famuli watan.

¹⁷Yaubada ena nuwatuhu yai hama laꞌilaꞌi ya fatamali be Diyona ya dom. Na ya miya bogana yai lahai faihona yo maihona faihona.