Yonɑsi 1

1

2

3

4

¹Sɔ̃ɔ teeru, Yinni Gusunɔ u Yonɑsi, Amitɑin bii sɔ̃ɔwɑ u nɛɛ,

²Yonɑsi, ɑ seewo ɑ dɑ Ninifu wuu mɑro bɔkɔ gen mi. Kpɑ ɑ nɔɔgiru suɑ ɑ bu gerusi. Domi ben nuku kɔ̃suru tɑ bɑndɑ sere tɑ mɑn girɑri.

³Adɑmɑ Yonɑsi u seewɑ u dukɑ suɑ u Tɑɑsisin swɑɑ wɔri, u wɑ u kɑ Yinni Gusunɔ tondɑ. Mɑ u dɑ Yɑfoɔ u goo nimkuu duɑ. Mɑ u yen dɑɑbun gobi kɔsiɑ. Nge mɛyɑ u kɑ Tɑɑsisin swɑɑ wɔri wi kɑ tɔn be bɑ dɔɔ Tɑɑsisi mi sɑnnu u wɑ u kɑ Yinni Gusunɔ tondɑ.

⁴Adɑmɑ Yinni Gusunɔ u derɑ woo bɔkɔ gɑ seewɑ nim wɔ̃ku gen mi. Mɑ n sɑ̃ɑre goo ge, gɑ koo nim diirɑ.

⁵Be bɑ goo ge tɛmɑmɔ, bɑ bɛrum soorɑ. Mɑ ben bɑɑwure u win bũu soku. Mɑ bɑ goo gen sɔmunu kɑwɑ bɑ sure nim wɔ̃kuɔ gen bunum mu kɑ kɑɑrɑ. Adɑmɑ Yonɑsi u dɑ u kpĩ u dò mɑm mɑm sere goo gen sɔɔwɔ.

⁶Mɑ goo gen tɛmɔ tɔnwero u susi u Yonɑsi yɑmiɑ u nùn bikiɑ u nɛɛ, mbɑn sɔ̃nɑ ɑ dò. A seewo ɑ wunɛn bũu soku. Sɔrɔkudo u koo sun yɑɑyɑ kpɑ sɑ kun kɑm kue.

⁷Mɑ bɑ gerunɑ bɑ nɛɛ, i nɑ su tubu tubu ko kpɑ su kɑ giɑ wìn sɔ̃ kɔ̃sɑ yeni yɑ sun deemɑ. Yerɑ bɑ tubu tubu ye kuɑ. Mɑ yɑ Yonɑsi di.

⁸Yerɑ bɑ nùn bikiɑ bɑ nɛɛ, ɑ sun sɔ̃ɔwɔ wi u sun kɔ̃sɑ yeni kpɑremɔ. Mɑn diyɑ ɑ wee. Amɔnɑ wunɛn yĩsiru. Bwese terɑ̀ ɑ sɑ̃ɑ. Sɔmbu teren sɔ̃nɑ ɑ wɑ̃ɑ mini.

⁹Mɑ Yonɑsi u bu wisɑ u nɛɛ, nɑ sɑ̃ɑwɑ Heberu. Yinni Gusunɔwɑ nɑ rɑ sɑ̃ wi u wɔllu kɑ tem kɑ nim wɔ̃ku tɑkɑ kuɑ.

¹⁰Yerɑ tɔn be, bɑ nɑndɑ ye bɑ giɑ mɑ Yonɑsi u Yinni Gusunɔ dukɑ suurimɔwɑ domi win tii u bu sɔ̃ɔwɑ mɛ. Mɑ bɑ nùn bikiɑ bɑ nɛɛ, mbɑn sɔ̃nɑ ɑ kuɑ mɛ. Amɔnɑ sɑ ko nun kuɑ nim mɛ, mu kɑ kpunɑ. N deemɑ nim mɛ, mu seemɔ mu dɔɔwɑ.

¹²Mɑ u bu wisɑ u nɛɛ, i mɑn suo i kpɛ̃ɛ nim wɔ̃ku ge sɔɔ. Sɑɑ yerɑ nim mɛ, mu koo mɑri. Domi nɑ yɛ̃ mɑ nɛn sɔ̃nɑ woo bɔkɔ geni gɑ seewɑ.

¹³Kɑ mɛ, goo tɛmɔ be, bɑ seewɑ bɑ hɑniɑ mɔ̀ bu kɑ turi nim mɛn goorɔ. Adɑmɑ bɑ kpɑnɑ. Domi nim mɛ, mu seewɑwɑ.

¹⁴Yerɑ bɑ Yinni Gusunɔ sokɑ bɑ nɛɛ, Yinni Gusunɔ, ɑ ku sun kpeerɑsiɑ tɔnu winin wɑ̃ɑrun sɔ̃. A ku sun wi u kun sun gɑ̃ɑnu kuen yɛm sɔbi. Domi ɑ rɑ kowɑ ye ɑ kĩ.

¹⁵Yerɑ bɑ Yonɑsi suɑ bɑ kpɛ̃ɛ nim wɔ̃ku ge sɔɔ. Sɑɑ yerɑ gɑ kpunɑ sɛ̃ɛ.

¹⁶Yerɑ tɔn be, bɑ Yinni Gusunɔ nɑsiɑ, bɑ nùn yɑ̃kuru kuɑ. Mɑ bɑ nɔɔ mwɛɛru kuɑ mɑ wiyɑ bɑ koo sɑ̃.