YOHAAN 12:21-36

²¹Wakan uni gwansan p̱u’dkina P̱ilibbus mo, a’di jin ta wathi/ ’peni Pam Beeṯsayda e Pany Jaliil mo, dhali uni o a’di gwo mo ki: Tap̱a, aman ona bwayi mmop̱ara Yesus e mo be.

²²Dhala P̱ilibbus yaki’d mo dhali ṯorka Andaraawus gwo mo. Dhala Andaraawus yaki’d mo nyaḵka P̱ilibbus mo dhali uni ṯorkina Yesus gwo mo be.

²³Dhala Yesus ki thoḵ uni gwo mo ki: Mo p̱u’dki’d mo gom Ya/ gi ’Kwani ki a’di minu kar ca eya tente/ mo be.

²⁴Ka jiŋ gana/, ka jiŋ gana/ aha/ ona um gwo mo ki: Isi ciki/ waḵki/ emen pos diki biṯa ’cesh dhali wu mo tani a’di midi di a’di ’de/ mo. Hili waḵki/ a’di ki wu mo tani a’di midi dho’th maman kagahara mo be.

²⁵A’diyin jin enki mondiki/em piti mo tani midi this a’di e mo, dhali a’diyin jin shi/ki mondiki/em piti i e mo e mony’cesh yansan mo tani a’di midi kar a’di ntagi mondiki/e ki sule/ ya ye ’ba/ mo.

²⁶Waḵki/ wathin ṯal ’deŋ kamu/ midi mii aha/ to mo tani a’di midi mii baṯẖ aha/ nsho’k mo be. Dhali mo yin jin miga/ di mo tani a’di imina c̱iŋkinam pemi di si’da/ mo be. Waḵki/ wathin ṯal ’deŋ kamu/ midi mii aha/ to mo tani Ababa midi taḵ a’di mo be.

²⁷Dhali shwane/ aḵashiram pem ṯocu bwa mo, dhali aha/ mina i/o kata mo? Ababa. /E ki woṯẖi aha/ ’peni mo yansan mowa? Yisa. Haali/ gom ’kup̱ mii yan mo tani aha/ p̱u’dkina mo e mo yansan mo be.

²⁸Ababa, kari /e gway pini ki ca mo. Dhali yan’ko’d ’twa/ p̱u’dki’d ’peni momis mo mmo/o gwo mo ki: Aha/ karkina a’di ki ca mo dhali aha/ mina kar a’di ki ca doḵ/e mo be.

²⁹Dhala waambuhany ’kwani kun doshkin ki ’dishe/ ciḵki a’di mo dhali okin ki a’di ta’da sho’k jin dorki’d mo. Kun tiya o gwo mo ki: Aman’doyu gwo a’di ṯorki gwo e a’di mo be.

³⁰Dhala Yesus ki thoḵ gwo mo ki: ’Twa/ yansan p̱u’dki’d gom gway bum mo, yisa gom gway pema.

³¹Dhali mo jin minu tor gwo ’twa/a ’cesh gi gwon dwall e mony’cesh yansan mo tani a’di p̱u’dki’d mo. Dhali tap̱a ma ruma ’cesh yansan minu biṯ ka pije/ mo be.

³²Dhali aha/, ki aha/ minu ’de’k mo ’peni mony’cesh yan mo tani aha/ mina dira ris ’kwani ’baar mo e is pem mo be.

³³A’di oki gwo yansan mo mmoṯor ’pemen jwa jin mina a’di wu mo be.

³⁴Dhala waambuhany ’kwani thoḵki a’di gwo mo ki: Aman ciḵkina gwo mo ’peni gwoŋḵan jin c̱ikunu mo ka Ḵrisṯẖos midi c̱a’b ki sule/ sule/ mo. Ba /e o gwo kan mana ki Ya/ gi ’Kwani minu mii ’de’k mo? Ki Ya/ gi ’Kwani jana a’dan?

³⁵Yesus ki thoḵ uni gwo mo ki: Moŋkush midi nyaḵ di e um ari’ceenne/ mo. Iiyi/ um mo ki moŋkush di’d naskina/ mo, isi ciki/ ki mondhurumi’d midi diki kum um mo. A’diyin jin yaki’d e bwam mondhurumi’d mo tani diki mish mo jin yakina a’di mo be.

³⁶Ki um ta gi moŋkush mo tani gami gwo is e moŋkush mo ki um mini ’taki war ki iya/ gi moŋkush mo be. Ka Yesus oki gwo yansan mo tani a’di yaki’d mo dhali bag is piti ’peni uni mo be.