SAN JUAN 12:21-36

²¹Nɛ bin tįmhbʉ ra Felipe ʉ 'bʉ mám 'bʉhmbe bʉ Jerusalén. Nɛ nu ra Felipe, ma mixädihe a, ra mɛngu bʉ Betsaida ra xɛqui Galilea. Nɛ nu yʉ mɛngu bʉ Grecia bi 'yɛ̨n'ʉ: ―Hague n'yø, dín nde dan yąhe ts'ʉ ra Jesús, bi 'yɛ̨n'ʉ.

²²Nu'a ra Felipe bʉya bi xi a ra Andrés, nɛ nu'ʉ bʉya bi xi a ra Jesús.

²³Nɛ nu ra Jesús bi dąt'ʉ: ―Ya mi ts'ʉtho da zøn ra pa dan uįxtegä 'bʉ dá tu, guecä dán ją'igä ua ja ra ximhäi.

²⁴Majuąni dí xi ahʉ, tengu n'da ra hmudä, nu'bʉ hin da thupʉ ja ra häi ngue dim 'bɛpʉ, hin din xąndi. Pɛ nu'bʉ da thuhu, da zä din xąndi xʉn ho.

²⁵Nu'a to'o i su din ʉnba 'bʉ da dɛngui, da mba ma ʉnbi rá te a, pɛ nu'a hingui su din ʉnba 'bʉ da dɛngui guecua ja ra ximhäi, din ja ra te maząi a.

²⁶Nguetho nu'bʉ 'bʉ a n'da in nde din 'yɛ̨hɛ nanguecä, jatho da bɛ̨ni tengu dím bɛ̨ngä, nɛ ga com'be ma ts'ɛdi bʉ mahɛ̨ts'i bʉya. Nu'bʉ 'bʉ a n'da din 'yɛ̨hɛ nanguecä, nu'a ma Ta da numanho a.

²⁷―Pɛ nuya ɛ̨mmɛ tu ma mbʉi, bi 'yɛ̨n'a ra Jesús. 'Bɛ'a sä ga xih ma Ta. Ha sä ga äpi di 'uegä 'bɛ'a din jacä ya. Pɛ hingui sä, nguetho gue'a bá ɛ̨cä ngue gan nu'a i jatho gan nugä ya, bi 'yɛ̨n'a ra Jesús.

²⁸Nɛ nubʉya bin yąui rá Ta: ―Ma Ta a i, dami jaqui gan nugä hønt'a go nda'a dí t'ɛ̨s'i i, bi 'yɛ̨mbi. 'Bexque bi t'ø'a n'da ra nde bʉ mahɛ̨ts'i, bi 'yɛ̨na: ―Pɛ ya dí ja'i guín nu, nɛ guin nu mahøn'a, bi 'yɛ̨na.

²⁹Nɛ nu'ʉ yʉ ją'i mí 'bähmbʉ bʉ, bi 'yøh rá nde Oją nɛ bi 'yɛ̨n'ʉ 'da: ―Bin gäni. Nɛ nu'ʉ mi'da: ―Masque n'da rám 'bɛhni Oją mahɛ̨ts'i bi zofo, bi 'yɛ̨n ʉ.

³⁰Pɛ nu'a ra Jesús bi 'yɛ̨mp'ʉ: ―Nu'a ra nde gá 'yøhmbʉ, nts'ɛdi bi zocä Oją, hin nangue ga pącä bi 'yøh ma nde, pɛ guepʉ gui pąhmbʉ ya i øh ma ndegä a.

³¹Nuya mi ts'ʉtho ga øt'ä a dí fądi nda'ʉ da mba ma ʉnbi, nɛ nda'ʉ hin da mba ma ʉnbi. Nɛ mi ts'ʉtho ga tąp ra zįthu, gue in ts'ʉt'abi ua ja ra ximhäi a, nɛ da ts'änba ya da t'ɛrbʉ ja ran ʉnbi.

³²Nu'bʉ dá cuat'ä bʉ ja ra pont'i, gue'a dá zohn'dʉ gätho yʉ́ mbʉi yʉ ją'i ga xifi di däc yʉ́ mbʉi gan yąn'ʉ, bi 'yɛ̨n'a ra Jesús.

³³Nɛ guehna mi man na, ngue mi ndepe xtám bąh yʉ ją'i 'bɛ'a nín dąte dí tho a.

³⁴Nɛ nu yʉ ją'i bʉya bi dąt'a: ―Nugähe ya dá øhmbe im mam bʉ ja rán t'ɛ̨di Oją, i 'bʉi mazą̈i a ra Cristo. Nɛ guí ɛ̨nsɛ jatho gui tu bʉ ja ra pont'i, gán ją'i ua ja ra ximhäi. To'o e ngue guí ɛ̨nsɛ gán ją'i ua ja ra ximhäi. Masque hinga gue'e gra Cristo 'bʉ.

³⁵Nu ra Jesús 'bex bi 'yɛ̨mp'ʉ: ―Him min ngu yʉ pa ga xän'nahʉ ya, ngue drán nɛquigä. Nde'bʉ gan 'yohʉ bʉ ja ran nɛqui ya, nɛ hin da zʉ ahʉ ra 'bɛxui. Nguetho nu'a to'o i 'yo bʉ ja ra 'bɛxui hingui pądi hapʉ i 'yo.

³⁶Dami hyąmhbʉ ran nɛqui ya, janya i ja ya, nɛ din ja ran nɛqui ni mbʉihʉ bʉya, bi 'yɛ̨mp'ʉ. Nɛ nu'bʉ mí jua a bi man ra Jesús bi mba, bin 'yąnsɛ.