Jon 12:21-36

²¹Ijefuon bu usem e Firif ai Besaida Gareri guf ijia ruainma ijin bieme kua, No Jesu gakuai vierafenvano kuain.

²²Bu ijeg kuavga Firif fun va Edru kuame busik bun vake Jesu fino ijia usem e iji bu kuardiainva ijeg fu kuardain.

²³Bu ijeg kuardava Jesu fu una roin kia, Tavan iji God fu Ema buon Farif iji abe fuon izeg fu kege ruainma ijefuon aroime kuaga fu fuon sanainma ijia fikfuon iji fun igijar.

²⁴Regavo vuak igi naka ma kuardiavno faif. Ire ufien sunin besum fu vek an ijia kira sairekma iji fu izeg una madu moik ijia arime una uruvana tavuakma bakin. Regavo ufien iji fu saireme una dabuiko moik ijia arikma ijar fuka uruvana tavuak.

²⁵Regavo erar fu moikigia tavan bog fuon vierafenma iji oijmaknum kegokma rad fu una izeg unam ma karivako iji abekma bakin. Regavo erar fu moikigia tavan bog una e roin vierafeknum oijmiame ifejdiaokma fu rad unam ma fivako iji abek.

²⁶Erar vua nun faimo rekafa vierafekma iji nika uri igi na kegoijo ijeg matieme keof. Regavo e vua nun faivo iji bu ar izer na fijo iji buk bu ijia karivak. Regavo asoinun iji fu gia eraneb bu na jajievo iji fu bu kege arordiakno kiain.

²⁷Fu ijeg kuardiame uri e vuak fuon faivo iji kia, Iviakma oinun fun ma bijukuriem ijefuon na izeg rek? Naba una asoinun kuak a tavan iji na vajai fian abekrejo iji ab kuaga fu nun rokno kuak? Regavo na ijeg una Asoinun kuakva iji fuba maren. Ijefuon maiji na tavan iji na ijeg vajai fian abekrejo iji biekro na ijefuon moikigia ari ruain.

²⁸Areme fu una Asoifuon sirimamene kua, Asoinun ni e fok nijaidiaga bu if on iji abe aroivno kuain. Areme bu faik God fu varur gufia ijeg kume, Na if nun sanainma iji nan usuibe abe e fok nijaidiain. Regavo iviakma na una madu if nun sanainma iji abe nijaidiaga bu game abe arordiekno kumen.

²⁹Regavo e fok samaij ijia irenva bu vuak iji faime una bui kuai fu varur kumeno kuain rega roin bu kuai fu anerak vuak kuainmano kuain.

³⁰Bu dab ijeg kuaivga Jesu fu kia, Vuak iji kaf gufia fu kuaima ja fainva iji fu nuifuon bakigavo fu e fok joifuon kuain.

³¹Regavo ivia tavan igi fu e moikigia oijo ijiebuon tavan God fu ise buon iji ke mazim giak. Regavo e moik igefuon e bomana Setanon daro iji dab datuai fu ajuarek.

³²Regavo tavan iji bu na kanieme abe urikva ijia na e fok aferdiaga bu una nun ruakno kiain.

³³Regavo Jesu ijeg fu kuainma iji fu tavan iji bu rad fu dab kuros ijia kanaga fu guakma ijefuon fu vuak iji kuardiain.

³⁴Fu ijeg kuardiamga e fok bu una roin kua, Akai nuvuon ijia fu kuai E iji God fu kuaga fu moikigia ari ruakno kuainma iji fuba guak ga fu ijia fivakno kuain. Regavo a izegrenma ijefuon a kume, Ema buon Farif fu guaga bu abe kaf ajiekno kuaim. Regavo Ema buon Farif iji a kuaimon iji fu erar ga fu izerkin?

³⁵Bu ijeg kuardavga Jesu fu una roin kia, Ve igi fu sanainma iji fuka ijia tavan bog saname vakma bakin ijefuon ivia tavan igi fuba nakin gavo fu vek sanainma ijia mukoi keof. Ijefuon maiji e be erar ga fu naki oinon iji fuka ba ni nisaiknum vierafene oin.

³⁶Ijefuon iviakma Kurais naiji na sanainma ijin. Ijefuon jaka vek igi na jana oijo ijia ja amarigia na ma vierafenkin ja una sanainma ijefuon e rekno kiain.