Zone 12:21-36

²¹Mae koe Pilipi si arini, na tie Betiseda pa popoa Qaleli si asa meke zama, “Tio, hiva dogoria gami se Zisu,” gua si arini.

²²Ke la tozi nia Pilipi se Aduru, meke keke gua la tozi nia ri kara se Zisu.

²³Meke olaṉa la i Zisu sarini, “Ele kamo sa totoso kamahire pude kaqu tava lavata sa Tuna na Tie.

²⁴Maqu tozi va hinokarani gamu: sa kiko huiti d si lopu kaqu boka soku, be lopu mate meke nolo pa pepeso si asa, ba be mate tu sa si kote soku kiko si vura hobe mae.

²⁵Asa sapu tataru nia sa nana tinoa, si kaqu siana nia sa si asa; ba asa sapu lopu tataru nia sa nana tinoa pa pepeso, si kaqu tagoa sa si asa pa tinoa hola.

²⁶Asa sapu hiva nabulu Nau, si mani luli Au, pude vasina pu koa Rau si kaqu koa tugo si asa; meke kaqu va lavatia sa Tamaqu sa tie pu nabulu Nau si Rau.

²⁷Kamahire si talotaṉa sisigiti sa buloqu, ke na sa si kaqu zama nia Rau? Kaqu zama guahe si Rau, ‘Tamaqu, Mu harupau pa totoso hie,’ gua? Lokari, Ba sapu mae nia Rau pa popoa pepeso, si pude kaqu koa ta sigiti tugo.

²⁸Tamaqu, Mu va lavatia sa Pozamu!” Meke zama sa mamalaiṉi pa Maṉauru, “Ele va lavatia Rau si asa, meke kaqu va lavata pulea tugo Rau!” gua si Asa.

²⁹Avosia sa puku tinoni sapu koa vasina sa mamalaiṉi, ke zama sari kaiqa, “Na paka maṉauru mo,” gua. Ba ari kaiqa pule si zama, “Keke mateana si zama koa Sa!” gua.

³⁰Ba olaṉa la i Zisu si arini, “Sa mamalaiṉi si pude tokani gamu, lopu Arau.

³¹Kamahire mo sa totoso sapu kaqu pitui Tamasa sari na tinoni pa kasia popoa, meke kamahire tugo si kaqu ta hitu taloa se Setani, sa baṉaradi rina tinoni pa kasia popoa.

³²Ba pana ta ovulu sage si Rau pa pepeso, si kaqu varigara mae ni Rau, sari doduru tinoni.”

³³Sapu gunia Sa pa Nana zinama hie, si na Nana minate mo sapu kaqu ta sigiti nia Sa pa korosi.

³⁴Ba olaṉa la koa Sa sa kobi tinoni lavata, “Sa nada Tinarae si tozia sapu kaqu toa hola sa Karisito, gua. Ba vegua ke zama si Goi sapu sa Tuna na Tie si kaqu ta ovulu sage gua? Esei tu sa Tuna na Tie hie?” gua si arini.

³⁵“Kaqu koa paki koa gamu sa kalalasa, ke mi ene pa kalalasa totoso koa koa gamu si Asa, pude mi lopu koa pa huporo, sina asa sapu ene pa huporo si lopu kaqu gilania sa sa vasina pu la ia sa.

³⁶Sipu koa koa gamu sa kalalasa, si mi va hinokaria si Asa, pude kaqu na tie tanisa kalalasa si gamu,” gua se Zisu. Sipu beto zama guahe si Asa, si taluarae taloa Nana meke tome pule nia koa rini.