San Juan 12:21-36

²¹Na' beṉ'ki jabig'gake' gana' ze Felípena', beena' nak beṉ' yell Betsaida daa llia yell-lio daa mbani Galileana', na' che'gake'ne': ―Beṉ'do', cheeninto' we'lennto' Jesúza' dill'.

²²Na' Felípena' jelle' Andréza' ka', na' c̱hoptie' wyajgake' jellgake' Jesúza' ka'.

²³Na'ch che' Jesúza' ḻegake': ―Ba bllin lla, nad', Beṉ' Bseḻ' Chioza' Yell-lioni, sho'a balaaṉ xenna'.

²⁴Dii ḻi nia' le', shi to biṉ c̱he trígona' bi igasha'n ḻoo yona', ka'chokzə kwe'n. Per shi igasha'n ḻoo yona', na' yila'n na' yiyakan dii zan wal.

²⁵Beena' ze wṉeyi c̱he yeḻ' mban c̱he'na' yell-lioni, ḻen' kwiayee. San beena' chzani yeḻ' mban c̱he'na' bittezə dii gak c̱he', beenan' gat' yeḻ' mban c̱he' zejḻi kaṉi.

²⁶Nottezə beṉ' cheenile' gone' xshin'na' chiyaḻ' gone' nad' txen. Na' gana' soa', na'kzə soe'. Na' beena' gon xshin'na', X̱a'na' kwee ḻe' balaaṉ.

²⁷’Ṉaatek chakyeshid' dii wal inlleb. ¿Awṉabid' X̱a'na' yisle' nad' lawi dga wtiḻ', lla? Bi gak gon' ka', ḻa' ni c̱heyi dgayeṉ'kzan bid'.

²⁸Na'ch golle': ―X̱a, benshki ka shoo balaaṉ. Na'ch wṉe Chioza' yabana', chi'e: ―Ba ben' kwenc̱he wyo'a balaaṉ, na' ṉaa gon' ka sho'a balaaṉ sto shii.

²⁹Na' beṉ'ka' lle' na' bengakile' shii Chioza', na' baḻe' wnagake' wziwa'zan wṉe. Na' zi baḻe' wna to anjlan' ba wṉie' ḻe'.

³⁰Na'ch Jesúza' chi'e ḻegake': ―Aga ni c̱ha' nadaan wṉe Chioza', san ni c̱he len'.

³¹Na' ba bllin lla gone' yeḻ' josc̱his c̱he yog' beṉ' lle' yell-lioni, na' ṉaa kweje' dii x̱iwaa daa chṉabia' yell-lioni.

³²Na' kat'ka' wḻisgake' yaga' cha'lə gana' nda'gake' nad', kanan' gat' latj gonḻilall' nottezə beṉ' nad'.

³³Na' daa wne' ka', bzajniile' ḻegake' nakan guete'.

³⁴Na' beṉ'ka' lle' na' che'gake'ne': ―Ba beninto' chlabgake' Cho'a Xtill' Chioza' gana' nan Crístona', beena' wseḻ' Chioza' iṉabi'e, soe' zejḻi kaṉi. Na' ¿bic̱he nazo' Beena' Bseḻ' Chioza' Yell-lioni wḻisgake'ne' cha'lə wwia beṉ' ḻe' ḻee yaga' gana' dee? ¿Nora Beena' Bseḻ' Chioza' Yell-lioni no' ka'?

³⁵Na'ch che' Jesúza' ḻegake': ―Nad' nak' beeni' c̱he beṉ' yell-lioni, per zi shlollchga soalen' le'. Ḻi sho' lo nez ḻina' shlak ni de beeni'na' kwenc̱he bi gak c̱hele ka chak c̱he to beṉ' chaḻile' kat' ngwee' nez. Ḻa' beena' chda' gana' shc̱hoḻ bi ṉezile' galan zeje'.

³⁶Ḻi gonḻilall' nad' ṉaa shlak ni zoalen' le' kwenc̱he sho' beeni' c̱ha'na' ḻoo yic̱hjlall'do'lena'. Biyoll wna Jesúza' ka' na'ch bizee jakwashi'le' ḻegake'.