Johannes 12:21-36

²¹Ra feila ren Filip, ätei i seni Petsaita lon Kalilea. Iwe, ra üreni, “Äm samol, äm aia mochen churi Jesus.”

²²Filip a feila o apworausa ngeni Andru ei pworaus. Mürin ir me ruoman ra feila o asile ngeni Jesus.

²³Iwe, Jesus a üreniir, “Iei a war ewe fansoun pwe Nöün Aramas epwe angei lingan.

²⁴Enlet, üpwe wesewesen ürenikemi: Eföü föün wiich epwe chök nonom lon ususun are esap mworotiu lepwül o mäla. Nge are epwe mäla, mürin epwe awora chomong föün wiich.

²⁵Iö a echeni püsin manauan epwe pöüt seni, nge iö a oput püsin manauan lon ei fanüfan, manauan epwe chök nonom ngeni manau esemüch.

²⁶Iö a mochen angang ngeniei epwe tapweto müri, pun ia ngang üpwe nom ie, ikenan nei chon angang epwe pwal nom ie. Iwe, Semei epwe asamolu chokewe mi angang ngeniei.

²⁷“Iei letipei a weires. Met ngang üpwe apasa? Ifa usun, üpwe apasa, ‘Semei, kosap mwüt ngeniei pwe üpwe tolong lon ei fansoun riaföü?’ Nge ina popun üa feito fanüfan, pwe üpwe tolong lon ei fansoun riaföü.

²⁸Semei, kopwe alinga itom!” Mürin a wor eu möngüngü seni läng, “Üa fen alinga itei, nge üpwe pwal alingasefäli.”

²⁹Iwe, ewe mwichen aramas mi ütä ikenan ra rong ewe möngüngü. Ekoch me leir ra apasa pwe och chopulap, nge pwal ekoch ra apasa, “Eman chon läng a kapas ngeni.”

³⁰Nge Jesus a üreniir, “Ei möngüngü a fis esap fän itei, pwe fän itemi.

³¹Iei ewe fansoun pwe fanüfan epwe küna kapwüng, iei ewe fansoun ewe samolun ei fanüfan epwe koturula.

³²Lupwen ngang üpwe tekiatä seni ei fanüfan, üpwe ofato aramas meinisin rei.”

³³Jesus a apasatä ei sokun kapas pwe epwe pwärätä meni sokun mäla epwe mälani.

³⁴Ewe mwichen aramas ra pölüeni, “Äm aia silei seni ekewe Allükün lamalam pwe ewe Kraist epwe manau tori feilfeilachök. Pwota ka apasa, pwe Nöün Aramas epwe tekiatä? Iön ei, ewe Nöün Aramas?”

³⁵Mürin Jesus a pölüeniir, “Ewe saram epwe nonom remi ekis chök fansoun mochomoch. Oupwe fetal lon ewe saram me mwen ewe rochopwak epwe torikemi. Pun eman aramas mi fetal lon rochopwak esap silei ia epwe feila ie.

³⁶Oupwe anomu ämi lükülük won ewe saram lupwen a nom remi, pwe oupwe wiliti aramas mi nom lon saram.” Lupwen Jesus a wes me apasa ekei kapas, a feila o op seniir.