SAN JUAN 12:21-36

²¹Dsa₂ 'éi₂ në́₃, ca₂jme₃quiáin₃ ja₁con₂ Felipe i₂chan₂ juɨg₂ Betsaida, ja₁niog₅ 'uë₃ Galilea, jaun₂ ca₂mɨ₃ ne₄ 'éi₂, ca₂juá'₂: ―Gui'₅₄, 'niog₂ jnia'₅₄ né₄ Jesús.

²²Jaun₂ ŋe₄ Fe₂li₄ ca₂i₁chi'₄ Drë́₄; jaun₂ le₂oin₃ ca₂i₁dsia₂ a₂ca₂i₁chi'₄ Jesús.

²³Jaun₂ në́₃ ca₂ŋag₃ Jesús: ―Ma₂ca₂të́₂ hora a₂le₃juɨn'₂ Jaun₅ dsa₂ mɨ₂güɨ́g₃.

²⁴A₂dsɨ₂jó'₃ juɨ́g₂ jniá₂ 'nia'₂, në₁jua'₂ tsá₃ tiá'₃ né'₃ 'uë₃ juɨ₁lia'₂ ca₂mɨ́g₂ mɨ₂cuɨg₂, a₂dsɨ₃'én₂ në́₃, a₂lë₁të₂ron₅₄ 'ŋiog₅; la₁ia₁ në₁jua'₂ ca₂jon₃ në́₃, 'lióng₂ rau₂.

²⁵Juɨ₁lia'₂ i₂ŋɨ́₄ lë₃ 'nio₃ jme₂dsí₂ a₂chain₂, dsɨ₂'én₂ bá₄ jme₂dsí₂ jaun₂; la₁ia₁ juɨ₁lia'₂ i₂tén'₂ dsɨ́₅ jme₂dsí₂ quió'₅ a₂chain₂ mɨ₂güɨ́g₃ la₂, a₂lé₂ quió'₅ bá₄ co₂tan₅₄.

²⁶Juɨ₁lia'₂ i₂jme₂ti₃ ta₁ ne₃ jniá₂, 'nió'₅ jiá₃ chi₁co'₅₄ quió₃ jniá₂, jaun₂ juɨ₁lia'₂ ja₁'en₅₄ jniá₂, ján₃ bá₄ ja₁jaun₂ 'en₅₄ guë'₂ i₂jme₂ti₃ ta₁ ne₃. Jaun₂ juɨ₁lia'₂ i₂jme₂ti₃ ta₁ ne₃, guéi'₂ bá₄ Ŋe'₃ rë₂.

²⁷’'Ŋio₅ lɨn₃ quian₄ jniá₂ o₂i₁ dsɨ₅. ¿'E₂ bá₄ juá'₄ jniá₂? ¿Juá'₄ 'e₂: “Tia₅₄, lio₄ jniá₂ 'e₂ niog₅ a₂qui₂dsɨ₃ŋɨ́₂ jniá₂ hora la₂”? La₁ on₃jua'₅₄ le₂jaun₂, ia₁ ta₁ jaun₂ guio₃ guë'₂ jniá₂ hora la₂.

²⁸Tia₅₄ jme₁jnia₅ 'a₂ lia'₂ jláng'₁. Jaun₂ në́₃ ca₂né'₂ caun₂ jág₁ guei'₅₄ mɨ₂güɨ́g₃ a₂ca₂juá'₂: ―Ma₂ca₂jme₁jnia₅ bá₄ jniá₂, jaun₂ con'₂ siá'₂ jme₁jnia₅ táng₃.

²⁹Jme₁ca₂nág₂ dsa₂ juɨn₅ i₂jme₁tión₂ cau₅ jaun₂, ca₂juá'₂: ―Ŋí'₃ bá₄ në₂quiá'₃. La₁ i₂sián'₂ guë'₂ juá'₂: ―Jan₂ ángel bá₄ në₂juá'₂ jág₁ quió'₅.

³⁰Jaun₂ në́₃ ca₂juá'₂ Jesús ca₂tsɨ́'₃ dsa₂: ―On₃jua'₅₄ o₄quió₃ jniá₂ a₂ca₂né'₂ jág₁ në₅; o₄quián'₂ 'nia'₂ bá₄ a₂ca₂né'₂.

³¹Në₃ guë́₄ në́₃ ca₂të́₂ jmɨg₄ a₂të₃dsɨ₅₄ 'éi'₃ mɨ₂güɨ́g₃ la₂; në₃ guë́₄ dsein₂₃ i₂gon₂ mɨ₂güɨ́g₃ la₂.

³²Jaun₂ jniá₂ në́₃, jë₁ma₂ca₂chó'₂ dsa₂ guei'₅₄ gua'₅₄ 'uë₃, jme₁quián₄ jniá₂ ca₂le₃jɨ́n₃ ja₁cong₂.

³³Ca₂juá'₂ le₂në₅ a₂'ë₂₃ 'e₂ ne₅₄ 'mú₃ dsɨ₃ŋɨ́i₂.

³⁴Jaun₂ ca₂ŋag₃ dsa₂: ―Ma₂néi₂ jnia'₅₄ a₂'ɨ₅ dsa₂ ne₄ Si₂ 'Éi'₃ a₂juá'₂ a₂le₃chan₂ I₂rë₂'ɨ́n₁ quián₅ Diú₄ co₂tan₅₄. ¿'A₂ guë'₂ lia'₂ juá'₂ 'ne₂ tion₅₄ chón'₂ dsa₂ Jaun₅ dsa₂ mɨ₂güɨ́g₃? ¿'Ein₂ 'éi₂ i₂lɨ́n₅ Jaun₅ dsa₂ mɨ₂güɨ́g₃?

³⁵Jaun₂ në́₃ ca₂juá'₂ Jesús: ―Jŋia'₅₄ lia'₂ co₂'na₂ bá₄ tág₅ guë́₄ si₂ jɨn'₄ 'nia'₂. La₁ i₂nio'₄ 'nia'₂ të₁lia'₂ tág₅ si₂, con'₂ tsá₃ ŋó₅ në₁jua'₂ ca₂tó'₂ nei₂. Ia₁ juɨ₁lia'₂ dsa₂ i₂ŋɨ₅ jë₄ qui₁né'₃, tsá₃ ŋi₅ 'a₂ juɨ₅ dsó₃.

³⁶Juɨ₁le₂'én'₂ 'nia'₂ le₃quió'₅ si₂, të₁lia'₂ cha₂ si₂ jɨn'₄ 'nia'₂, ia₁jaun₂ lén'₂ 'nia'₂ dsa₂ quián₅ si₂. Jme₁ca₂dsan₃ juá'₂ Jesús le₂në₅, ŋái'₃, jaun₂ ca₂'mai₃ ja₁con₂ dsa₂ 'éi₂.