3Mosese i niya keta visimesima matatafuna Yave i veniya, namoḡa i iyavisiya. Matatafusi tamo nenei si vinowana si bwaduwa, “Ika! Avana Yave i bwaduwisiya maise matatafuna kana savivinisiya.”
4Eketa Yave yana visime matatafuna Mosese i viginiwisiya. Kuyadayada kana vinuwa nenei, nuwabunimokeyai i misiniya keta didiḡa i didiiya koya uḡunei. Yota Isineni fasekwa 12 i naisiya keta gabana 12 nakanakasisi i vimisiniisiya.
5Muniyai Isineni sinesiyai tufunakata i visimeisiya si niya keta yomuyomu si nuvimatisiya keta si vibwanaoseina vikanakooḡa bwanaosena. Yota tunisi bunumakau namoḡa mwanavausi si vibwanaoseina keiya bwanaosena Yave nenei.
6Mosese yomuyomu ufaufasi tunina i viya keta kaboma nenesiyai i kisiwaḡatotoḡa. Eatu tunina o kafa vikanakooḡa bwanaosena kana didiḡa i nuseuseuniya.
7Eketa dedeni kana nufunufu kikikuwana i viya i ginaḡanaiya atu namoḡa si nowana keta si bwaduwa, “Iba matatafuna Yave i bwaduwisiya, kana savivinisiya keta kana muniisiya.”
8Keta Mosese ufaufa na kabomisi i visiya keta namoḡa i nuseuseunisiya. I bwaduwa, “Tovanama visime nofe Yave i venimiya, yana dedeni i fufuniya kwami nukusi keta ufaufa nofe kwa kitakitiya o naki i givifakiniya.”
12Eketa Yave Mosese i iyaviya i bwaduwa, “Ku vanenemai nenekuwai koyai be nofemai kuna fotafota. Yaku visime keta gisawakedana a viginiwisiya gabana beyabeyasi nenesiyai, ana veniwa kuna visawavenena namoḡa nenesiyai be sina muniisiya.”
13Mosese keta kana toovivita Yosuwa nukusi si gidewadewa vane fasinei eatu tokawakawa i iyavisiya i bwaduwa, “Nofemai kwana fotifotikiya kana nivaniva kana makavinikiya. Taki tamo aitevana nukusi sina avigwavigwaeḡa, Anoni keta Une nukusi kwana gidawadawaniniiya.” Mosese keta Yosuwa si misiniya keta Mosese Guyau yana koya i vaneiya.
15Tovanama Mosese i vaneya, busibusi koya i soḡotauniya.
16Yave yana mayesina matakikikwanena i sobuwa koya Sainai etanei. Busibusi koya i sowiya kana nivaniva kuyadayada 6, eketa kana vi7 nenei busibusi sinenei Yave Mosese i bwauwiya.
17Tovanama fiyao Isineni matasi i vaneya, Yave yana mayesina matakikikwanena si kitiya kana kitakita vitana kai nakasina ita nununuḡa maise koya etanei.
18Eketa tovanama Mosese koya i vaneiya, busibusi sinenei i kanasuna keta nokomai i fakwa kuyadayada 40 keta nuwabuna 40.
