YƐSÃÃ 74:2-23

²Dentɛní ɑ kɔbɛ kpɛ́í, ɑ dontɛ́ bɛ̀ nɛ̀ dimɔ̀nnì, bɛ̀ tu ɑ kɔbɛ mbɛ kɑ̀ɑ bɛ̀ tɔ, dentɛní Siyɔ̃ɔ̃ tɑ̃rì kpɛ́í ɑ do ɑ̃ dɛ̀.

³Kɔtɛ kɛ́yɑ̀ bɛ̀ cɑ̀ɑ̀ri dɛ̀ sɑ̃́ɑ̃̀ dɛ̀ dɛumɛ̀ ti dootitɔbɛ̀ cɑ̀kɛmu dɛmɔu ɑ cɛ̃sɑ̀ɑ̀tɛ̀.

⁴A dootitɔbɛ̀ tɑmu ɑ cɛ̃sɑ̀ɑ̀tɛ̀ kɛ íútí, kɛ còńnɛ́ bɛ kó mɛcɑnnimɛ̀ ɑ kɔ̃mɛ do borɛ̀.

⁵Bɛ̀ pùɔ nhɑ cĩ́ɛ̃̀tɛ̀ otekɔ̃ũtì ɔ̃ɔ̃ kɔ̃ṹmɛ̀ mmɛ dɛtie ndikpɑ́ɑ̀, kɛ́yɔ̃kii o pĩɛ̃tɛ̀.

⁶Bɛ̀ tɔ sipɛ̃ɛ̃́ nsi nɛ̀ mɑ̀ɑ̀tóòbɛ̀ kɛ puɔ̀ nhɑ cĩ́ɛ̃̀tɛ̀ kó tisɑ̃tì.

⁷Kɛ cɔ́u nhɑ cĩ́ɛ̃̀tɛ̀ kɛ tɛ̀ pùɔ, kɛ sĩ̀nkùnnɛ ɑ cĩ́ɛ̃̀tɛ̀ bɛ̀ yu dɛ̀ ɑ yètìrì.

⁸Bɛ̀ do nɑ́ɑ́ mbɛmɑ́ɑ̀ ndi kɛ tú: Ti yóó bɛ̀ puotímu, kɛ́cɔ́u nyɛ bòrɛ̀ yɛmɔu dihɛì miɛkɛ bɛ̀ bɑ̀ɑ́ ndɛ̀ Kuyie.

⁹Yɛbɛnkùyɛ̀ mɑyɛ̀ tɛ̃́nkɛ í bo, ti tɛ̃́nkɛ í mɔkɛ bɛ̀ɛ̀ nɑ̀ɑ́ nKuyie mpɑ̃ɑ̃nɑ́ɑǹtì, òmɔù í yɛ̃́ dɛ̀ yó nkɑ̃́ɑ̃́kɛ́ dɛ̀.

¹⁰Áú Kuyie! Dɛ̀ yó nkɑ̃́ɑ̃́kɛ́ dɛ kɑ̀ɑ níím̀bɛ̀ɛ yóu bɛ̀ bo nyíinkomɛ̀ ɑ miɛkɛ? Dɛ̀ yó nkɑ̃́ɑ̃́kɛ́ dɛ kɑ̀ɑ dootitɔbɛ̀ dɑ yóu mudɑɑ́?

¹¹Dɛ̀ dòmmɛ kɑ̀ɑ wɛ̃̀nkɛ ɑ bɑɑ̀? Dɛ̀ yĩ́mɛ kɑ̀ɑ mɛí ɑ nɔu? Youtɛní ɑ nɔ̀ùtɛ̀ kɛ́ bɛ̀ kùɔ pɑíí.

¹²Kuyie nkuù tu n kóo kpɑ̀ɑ̀tì nɛ̀ ti bomɛ̀, kuù dɛɛrí bɛnìtìbɛ̀ kɛtenkɛ̀ ĩ́nkɛ̀.

¹³Kuyie, nfɔ̃́ɔ̃̀ yɑtɛ́ dɑ̀mɛ́ɛ̀rì nɛ̀ ɑ wɛ̃rímú, fɔ̃́ɔ̃̀ pɔ̀ntɛ musĩ̀mmù yɔ mɛniɛ mmiɛkɛ.

¹⁴Fɔ̃́ɔ̃̀ pɔ̀ntɛ musĩ̀mmù bɛ̀ tu mù Defiɑtɑ̃ɑ̃ mu yɔ, kɛ mù duɔ́ ndɑ̀mɛ́ɛ̀rì kó yɛkũrɛ.

¹⁵Fɔ̃́ɔ̃̀ ɑ̃nnɛ́ sibií nɛ̀ ikó, kɛ duɔ́ nkɛ̀ ikó nyìì í kũũ kɛ̀ ì kpeì.

¹⁶Fɔ̃́ɔ̃̀ te kuyie nnɛ̀ kɛyènkɛ̀, fɔ̃́ɔ̃̀ dɔ̀ɔ̀ otɑ̃̀nkù nɛ̀ diyiè.

¹⁷Fɔ̃́ɔ̃̀ ɑ̃nnɛ́ itemmɑ̀nkɛ imɔu, fɔ̃́ɔ̃̀ dɔ̀ɔ̀ dipɑɑ̀ nɛ̀ diyɔ̃ɔ̃̀.

¹⁸N Yiɛ̀ nKuyie nhɑ nyɛ̃́ ɑ dootitɔbɛ̀ dɑ sɑ̃́ɑ̃́mmɛ̀, kɛ̀ kubotí kùù yɛi nkɛ̀ kù cɑ̀ɑ̀ri ɑ yètìrì.

¹⁹Bɑ́ɑ́ yóu kɛ̀ dɛsĩ̀nnɛ̀ɛ pĩ́ nhɑ kɔbɛ bɛ̀ɛ̀ dò nsinɔ́nkpeé, bɑ́ɑ́ yɛ̃̀ nhɑ kó bɛcĩ̀rìbɛ̀ kpɛ́í mbìtì bìtì.

²⁰A bɑ́ɑ́ yɛ̃̀ nhɑ tɑummɛ̀ kpɛ́í, ti píɛmmu dihɛì kó yɛsɔ̀rɛ̀ miɛkɛ, kɛ̀ bɛ̀ ti fɛ̃́ũnkoo dɛborɛ̀.

²¹Bɑ́ɑ́ yóu kɛ̀ bɛ̀ fɛ̃́ũnko wèe di ifɛi, ocĩ̀rì nɛ̀ osénnìwè bɛ̀ ndɛ́úkùnko ɑ yètìrì.

²²Kuyie nyítɛ́ kɛ́cómmú kɛ́bɛnkɛ ɑ tú wè, dentɛní yɛsɑ̃́ɑ̃̀mbɛ̀ kubotí yɛiku dɑ sɑ̃́ɑ̃́ nyɛ̀ sɑ̃́ɑ̃̀.

²³A bɑ́ɑ́ yɛ̃̀ nhɑ dootitɔbɛ̀ kó fɛhúùfɛ̀ kpɛ́í, kutoweku ɑ kpɑntídɛ̀ntɔbɛ̀ wèkíí kù kɛ̀ kù dɛ̀úkú sɑ̃́ɑ̃̀.