Sam 74:2-23

²Mu balabala i sari na Mua tinoni saripu ele vizati Goi pukerane pude na Mua tie, saripu ele vata rupahi Goi pa tinoa pinausu, pude na Mua butubutu soti. Mu balabala ia sa Toqere Zaione, vasina pu ele koa ia Goi.

³Mu ene la hopiki ni sari na tinahuara pu evaṉi rina kana koa sa Mua Zelepade.

⁴Sari na Mua kana si kukukili pa minataqara pa vari korapana sa Mua Zelepade; va turui rini sari na dia pitipiti vasina, pude na vina gilagilana sa dia minataqara.

⁵Gua tugo na tie mamaho si arini pu hoke maho va hoqai sari na huda.

⁶Seke huhuara ni maho na hama rini sari doduru labete ta peqodi koari na goba pa korapana.

⁷Huara ilasia rini sa Zelepade meke sulu pania rini; va bonia rini sa vetu hopena vasina tava lavata sa Pozamu.

⁸Varizamai teledia sarini, “Kaqu huara ilasa hokari gita sarini,” gua. Ke sulu beto pani rini sari doduru vasina hopedi te Tamasa pa popoa.

⁹Sari doduru tinavete variva magasa si tava taloa beto; loke poropita si hite koa hola, meke loke tie tugo gilania sapu kote vea seunae gua sa tinasuna hie.

¹⁰Kei Tamasa, ve seunae gua si kaqu hegere Nigo rina Mua kana si Goi? Kote ninae rane mo si zama ṉoṉovala Igo rini si Goi?

¹¹Na vegua ke koromu tokani gami tu Goi? Na vegua ke poloi tu Goi sari na limamu totoso hiva ta tokae si gami?

¹²Ba Agoi Tamasa mo sa mami Baṉara podalae pa pinodalaena, meke soku totoso si ele harupu gami Goi.

¹³Pa Mua ṉiniraṉira nomana si ele paqahia Goi sa kolo, meke ele muzara pani Goi batudi sari kurukuru variva mate koari na kolo lamana.

¹⁴Ele muzara pani Goi sari na batuna sa kurukuru variva mate pozana Leviatani sapu koa pa lamana. Meke ele ponia Goi koari na kurukuru pinomo pa soloso qega sa tinina, pude madi gania.

¹⁵Va totolo vurai Goi sari na kolo lomoso koari na vasidi popadi, meke va popai Goi sari na ovuku pu totolo ninae rane.

¹⁶Tamugoi sa rane meke na boṉi, Agoi vekoi pa dia vasina sari na rimata na sidara.

¹⁷Agoi pada vekoa sa pepeso popana, meke Agoi tugo tavetia sa totoso maṉini na totoso ibu.

¹⁸Kei Zihova, Mu balabala ia sapu hegere nigo rina Mua kana si Goi, na tie huporo pu loke dia Tamasa si arini, meke zama ṉoṉovaligo rini.

¹⁹Mu lopu luara lani koari na kana pu variva mate sari na Mua tie, Mu lopu muliṉini gami pu koa tasuna meke tasigiti.

²⁰Mu balabala ia sa Mua vinariva egoi nabuna pu ele tavetia Goi koa gami; ura na vinariva mate si koa pa doduru hukihukirina sa popoa.

²¹Mu lopu va kurekurei sarini pu ta naqoto va gore na ta ṉoṉovala; madi vahesi Igo rina habahuala meke sarini pu ta ṉoṉovala.

²²Kei Tamasa, meke va malumi Goi sari na kana pude ṉoṉovala Igo! Mu balabala ia sapu sari na tie huporo pu loke dia Tamasa si hegehegere Nigo doduru totoso.

²³Mu lopu muliṉi nia sapu sari na tie pu kukiti nigo si velavela pa dia tinaṉaziri, meke lopu makudo sa vinevehe tadi na Mua kana.