Lamentations 4

1

2

3

4

5

¹Tadau goolo madamada gu bilau, nia hadu hagalabagau o di Hale Daumaha gu meheu gi hongo nia ala.

²Nia dama daane o Zion nogo hagalabagau gadoo be nia goolo, gei dolomeenei gu balumee gadoo be nia baalanga ne hai gi nia gelegele.

³Nia paana lodo geinga e haga uu nadau dama, gei agu daangada e hai gadoo be nia manu ‘ostrich’ e hagamuamua gi nadau dama.

⁴Digaula e dugu hua nadau dama bolo gii mmade i di hiigai mo di hieinu. Nia dama le e tangi bolo gii wanga nadau meegai, gei di maa tangada e haangai digaula ai.

⁵Nia daangada nogo gai nadau meegai humalia i mua, gei dolomeenei digaula gaa mmade i nadau hiigai i hongo nia ala. Digau ala nogo tomo aga humalia i mua, gei dolomeenei digaula e heehee i lodo nia hagabae geinga, e hai di nadau halahala meegai.

⁶Agu daangada guu kae di hagaduadua koia e huaidu i di hagaduadua digau Sodom, di hagaduadua ne tale ang gi ginaadou limalima mai i nia lima o God.

⁷Tadau gau aamua nogo madammaa ge kene be nia ‘snow’. Nnuaidina digaula nogo humalia ge maaloo, nogo dabadaba ge mahi.

⁸Gei dolomeenei digaula e mmoe mmoe i hongo nia ala, tangada e iloo digaula ai, nadau hadumada gu luuli i nadau mmade, nadau gili gu maangoo be di laagau, gu haga wini i di gili nia iwi.

⁹Digau ala ne mmade i lodo tauwa e haadanga lamalia i digau ala ne mmade nomuli, ala gu paagege gu mmade mai maalia i di hiigai, idimaa nia meegai ai belee mouli ai digaula.

¹⁰Di haingadaa dela ne tale ang gi agu daangada e haga madagudagu dangada huoloo, nia dinana ala e aloho i nadau dama, guu dunu nadau dama belee gai.

¹¹Dimaadua gu taiaga dono hagawelewele, guu dudu dana ahi i Zion, bolo gii wele di waahale deelaa gii odi.

¹²Gu deai tangada i golo, ge gu deai hogi nia dagi o nnenua tuadimee ne hagadonu ai bolo nia hagadaumee e mee di ulu gi lodo nia ngudu o di abaaba Jerusalem.

¹³Nia mee aanei guu hai mai i ana soukohp mo ana gau hai mee dabu la guu hai di huaidu di nadau haga hali nia dodo o nia daangada madammaa.

¹⁴Nia dagi digaula gu heehee i hongo nia ala gadoo be digau deegida, digaula gu gulugulua i nia dodo, gei nia daangada gu hagalee hiihai e bili gi digaula.

¹⁵Nia daangada gu wwolowwolo boloo, “Goodou tuu i daha, goodou e gulugulua! Hudee bili mai!” Malaa, digaula gu hagadau adu gi nnuai guongo, tangada ne benebene digaula ai.

¹⁶Dimaadua gu hagalee hila gi digaula, Mee ne bida hai digaula gi heehee beelaa, gu hagalee hila anga gi digau hai mee dabu mo nia dagi.

¹⁷Gidaadou gu halahala di hagamaamaa dela digi hanimoi, dela gu deemee di gidee. Gidaadou gu talitali di hagamaamaa mai i tenua dela e deemee di hagamouli gidaadou.

¹⁸Nia hagadaumee nogo talitali gidaadou, gei gidaadou gu deemee di heehee i hongo nia ala. Tadau madagoaa la guu lawa, di hagaodi la gu dae mai.

¹⁹Di hai o tadau hagadaumee la guu hai be di ‘eagle’ e mamaangi ia i lala di langi. Digaula gu hagabagibagi gidaadou, gu aali i gidaadou i hongo nia dama gonduu, guu kumi gidaadou haga homouli i lodo di anggowaa.

²⁰Digaula guu kumi di hagamau o tadau mouli, go di king dela ne hilihili go Dimaadua, dela nogo hagadagadagagee ginai gidaadou e haga dagaloaha gidaadou gi daha mo tadau hagadaumee huogodoo.

²¹Goodou go digau Edom mo Uz, goodou gadagada. Goodou tenetene i di godou madagoaa ala e mee. Di haingadaa gaa dae mai gi goodou labelaa, gei goodou ga heehee godou goloo ai, e haga langaadia dangada.

²²Zion guu kae di hui o nadau huaidu. Dimaadua ga hagalee daahi gidaadou i lodo di gowaa dela e noho galabudi ai gidaadou i daha mo tadau gowaa donu. Malaa, goe go Edom, Dimaadua ga hagaduadua goe, ga hagi aga au haihai hala huogodoo.