1¡Or gudure daklegusad! ¡Or-nued e-gaed bar nue dakarmaksulid! Bab-Dummadse-goled-neggi ormar-bukwadi, bela negmar-imbaba omileded.
2Sión-dulemar bur bule epenne olo-nueganba e-bina soglegenad, emidi, napsa-nogyob daklemalad, dule-napsagi-arbaed e-ibmar-imakedyob dakleged.
3Achu-sapurmarbela na e-mimmigan-onuegala ega mam uked. Ar Jerusalén-omegandina, igi nuu-dummad-dukar-suidmar dule-negasulidganba na e-mimmigan-mete-naddamala, deyobi, e-mimmigan metemalad.
4Burwigana ukudmaad-itogedbali, e-gwabinmar achaa gayagi nagusad. Burwigana aisaar mas egisenad, degi-inigwele, dule gwen ega uksulid.
5Dulemar iduar mas-nuegan gundidamalanad, emidi, igarbali ukudba burgwemamaid. Dulemar iduar mor-nuegan-gargerbamalad yodamalanad, emidi, ibmar-isgana-abargine gudimalad.
6Jerusalén-dulemar-e-isguedi, bur bule Sodoma-dulemar-e-isgusadba gued. Sodoma-neggwebur yog-berguar gusad, gwen dule bendaksasulid.
7Jerusalén-e-dummagan, boobali bur sibudik daklenanaenad, moli-nunisba bur sibudik daklenanaenad. E-abagan akwa-bisgi-ginnigwadba bur bule gisii daklenanaenad, akwa-nued-zafiroʼyob daklemalanad.
8Emidi, e-daklegedi negsichidba bur gudure daklemalad, igarbali aku daklemalad. E-uka, sapanyobi dinnaa dakleged. E-uka-dinnagwadbali e-garmar buus-buus dakleged.
9Dulemar-es-suidgi-burgwismalad bur nuedid, dulemar-ukudba-burgwismaladba. Ar wemala, napaneg ega ibmar-gwag-osanmaksasulid-ulale, binna-binna ukudba burgwemamai gusmalad.
10Nangan-sabed-nikamalad, na dukin e-mimmigan-dunanai gusmalad. Jerusalén-neggwebur-ibitonaigua, we-nangan na e-mimmigan masga imaksamalad.
11Bab-Jehová bela-bela e-sae-itoged bar bargassulid, bela-bela e-sabsur-urwed oyosad. Sión-neggwebur ogumaksad, bela Sión-neggwebur-e-neg-sailase-bakar, ogumaksad.
12Reymar-we-napneggi-negsemamaidi, Jerusalén-e-isdarmalad, Jerusalén-e-yawagakgi dognonimaloye-soglesad, bengusmalad. Dulemar-we-napneggi-gudidimaladi, Jerusalénʼgi-gwisgudidimalad, Jerusalén-e-yawagakgi dognonimaloye-soglesad, bengusmarmogad.
13Neg-gunonikidi, Bab-Dummad-gayaburba-barsogmalad-e-isgusad-ulale, deyob neg-gunonikid. Dule-irwa-Bab-Dummadse-gormalad-e-isgusad-ulale, deyob neg-gunonikid. Neggwebur-neg-imbaba dule-ibmar-oakalossurmalad-e-ablis-eosmalad-ulale, deyob neg-gunonikid.
14We-dulemar ibyasuliyob igarba gudidimalad, e-argan ablis-sunnabi gudidimalad. Deyob-gudimaladbali, dule-wargwensaale, e-morse-bakale, gwen e-ibe ebubisulid.
15Dulemar iseed ega sogmalad: “Dule-swilidiksurmalad, wegi be namala. Be nomala, be nomala. Mer be anmarse achamala.” Dulemar-Bab-Dummad-akudakmalad yar-baid-baid-bukwamaladi sogmalad: “We-dulemar neg-sate gaamakdidimaladid, wakindimaladid. Wegi geg bar gudii gumalad.”
16Bab-Jehová uludedba wemar-obachad, bar we-dulemargi binsassulid. Dule-irwa-Bab-Dummadse-gormaladdeeye bar egi binsalesulid, dule-selebagusmalad bar wile daksurmarbalid.
17Anmar binsarsunna bendakleged-edarbediidbali, geg nue atakgusad. Aisaale, anmar, anmar-neg-matusulid-birgi dule-gwen-anmar-bendakmalosulidsik atakgwis damalanad.
18Ar anmargi nakuledidii nanaed, geg bar anmar galimbaba nanaed. Anmar-bergued modanikid, anmar-bergued-wachi bato nonikid, anmar-ibagan bato belad.
19Anmar-balegindimalad, sulubagimarba bur bule nanamalad. Yalaganba anmar-balegichamalad, nega-dulesulidganba anmar-iduar dukuar bukus gusmalad.
20Dule-Bab-Jehováʼse-nug-imaklesad, a-dule-isganamar-e-sakigi galesmogad. We-dule, anmar-bendakoedinad. Ar anmar we-dulegi sogdimalanad: “Dulemar-yar-baid-baidgi-bukmaladgi, we-dule, anmar-bendakdii guoye.”
21Edom-dulemar, Uz-yargi rey-bundoryob be gudimalad, be yeer-itomala, be wergumala. Ar bemar sabsur-odurdaklegedsemarmogad. Be-ibmar-nikadi bela be-ibe surgunonikoed.
22Sión-neggwebur-yeerdakleged, be-sabsur-odurdakleged bergunonisunnad. Bab-Dummad aineba gales-selemai bar be-imakosulid. Bedina, Edom-dulemar, Bab-Dummad, be-isgusadbali sabsur-be-odurdaknonikoed, bela be-isgusad magar-daklege imaknonikoed.
