Taalie 6:15-34

¹⁵Na kui kasarɛ fama nɛ a suxude, a a xun nakana kerenyi ra.

¹⁶Fe senni na Alatala naxee xɔnxi, a mu tinma nee ra fefe ma:

¹⁷yɛtɛ igboe xa mixi mato ki, wule minima dɛ naxan kui, bɛlɛxɛ naxan nii bama fufafu ra,

¹⁸bɔɲɛ naxan fe tinxintare maɲɔxunma, sanyi naxee e gima sigafe ra fe kobi rabade,

¹⁹seede naxan wule falama, a nun mixi naxan ngaxakerenmae tagi isoma.

²⁰N ma di, i baba xa sɛriyɛ ragata, i naxa tondi i nga xa marasi ra.

²¹E xa lu i bɔɲɛ kui tɛmui birin, e xiri i kɔn ma.

²²E i raɲɛrɛma nɛ i xa duniɲɛigiri kui, e i makanta i xa sade ma, e i rasi i keli tɛmui.

²³Na sɛriyɛ findixi lanpui nan na, na xaranyi kira masenma nɛ i bɛ, na marasi i xun tima simaya kira nan xɔn ma.

²⁴E i ratangama ginɛ kobi ma, nun xɔɲɛ ginɛ dɛ iɲɔxunxi ma.

²⁵I naxa wa na ginɛ xɔn ma a xa tofanyi ma, i naxa tin a xa nɔ i ra a yae ra.

²⁶Langoe ginɛ naxan mu na xɛmɛ taa, a mixi findima setare nan na, kɔnɔ ginɛ yɛnɛla naxan dɔxɔxi xɛmɛ nde xɔn, a mixi faxama nɛ.

²⁷Mixi nde nɔma tɛ tongode, a a sa a yuba kui, a fa lu a xa donma mu gan?

²⁸Mixi nde nɔma a ɲɛrɛde tɛ wole tagi, a fa lu a sanyi mu gan?

²⁹Na maniyama nɛ alɔ xɛmɛ naxan yabuma ginɛ xɛmɛ taa idɔxɔɛ ra. Xɛmɛ yo din na ginɛ ra, a fama ɲaxankatɛ nan sɔtɔde.

³⁰Mixi mu yoma muɲɛti ma, naxan muɲɛ tixi a xa kaamɛ ma,

³¹kɔnɔ a na suxu fo a xa muɲafe sare fi, hali na findi a xa naafuli birin na.

³²Kɔnɔ xaxilitare nan tun yɛnɛ rabama ginɛ ra. A a xun nakana na fe mɔɔli ra.

³³A fe xɔrɔxɔɛ sɔtɔma nɛ yaagi kui, naxan mu gbilenma a fɔxɔ ra sɔnɔn,

³⁴barima tɔɔnɛ xɛmɛ bɔɲɛ ratema nɛ a ɲaaxi ra. Ginɛ kanyi mu kinikinima a gbe ɲɔxɔɛ lɔxɔɛ.