Zinama Tumatumae 6:15-34

¹⁵Gua asa ke kote hinoqa kamoi na kinolura si arini; hodahodaki si raza mo sa tinahuara sapu loke hinarupu koa ia.

¹⁶Koa dia si ka onomo ginugua sapu kana hola i e Zihova, ka zuapa tiṉitoṉa sapu lopu qetu sisigiti ni Sa:

¹⁷sa dinoṉo vahesi pule, na mea sapu kokoha, na lima sapu va mate tie loke nana sinea,

¹⁸na bulo sapu hatahata ginugua kaleadi, sa nene sapu tuturei haqala la pa kinaleana,

¹⁹sa tie va sosode sapu kokohana, meke sa tie sapu sovutu tinasuna koari tasina.

²⁰Tuqu, mu kopu ni gua sapu tozi nigo sa tamamu, lopu kilui sari vina tumatumae tanisa tinamu.

²¹Pusi ni ninae rane pa bulomu; mamu pakui pa ruamu.

²²Totoso ene goi si kote turaṉigo rini; totoso puta goi, si kote kopu nigo rini; totoso vaṉunu goi si kote zama igo rini.

²³Ura sari tinozi hire si na zuke, sa vina tumatumae hie si na kalalasa, sari na ginegese pa tinarae te Tamasa si na siraṉa la pa tinoa,

²⁴sapu va balau igo koa rina barikaleqe barabaratadi, koari na zinama lomosodi tadi na votiki barikaleqe.

²⁵Mu lopu roro ia sa dinoṉo lea tanisa babe ta sipata vagi koari na matana,

²⁶ura na tinabarana sa maqota si pada keke botubotu bereti; ba sa pinuta turaṉana sa barikaleqe tana votiki tie si na mua tinoa mo si holuholu nia goi.

²⁷Boka paleke kapae nia goi pa raqaraqamu sa nika meke lopu ta sulu mua poko?

²⁸Boka enei goi sari patu leradi, meke lopu ta kina sari ola nenemu?

²⁹Gua asa sa tie pu puta turaṉia sa barikaleqe tana votiki tie; asa pu tiqu la ia sa barikaleqe asa si kaqu tava kilasa.

³⁰Na tie hikohiko si lopu ta hakohakoe pana hiko si asa sina na ovia nana.

³¹Ba pana ta poho sa, si kaqu lipulipu zuapa totoso laena sapu hikoa sa, kote padana doduru likakalae pa nana vetu.

³²Ba sa tie sapu barabarata si loke nana binalabala leadi, asa sapu tavete gua asa si ṉovala pule nia mo.

³³Kaqu ta seke va bakora meke ta hakohakoe si asa, sa kinurekure tanisa si loke kokoina.

³⁴Ura na kono va gevuruna sa tinaṉaziri tanisa nana palabatu, ke kote lopu balabala pule si asa pana la varipera si asa koasa.