Än Salomon Fos 6:15-34

¹⁵Iei mine riaföü epwe müttir tori, lon eu chök otun epwe feiengau, nge esap chüen tongeni pöchökülsefäl.

¹⁶Mir wor fisu föför ewe Samol mi Lapalap a oput, esap fokun tipeeu ngeni:

¹⁷Wolamalamtekia, kapas chofana, pau mi niela aramas esap wor ar tipis,

¹⁸eu leluk mi ekiekietä föför mi ngau, peche mi müttir sä ngeni föför esepwüng,

¹⁹eman chon pwärätä mi chök apasätä kapas chofana me eman mwän mi afisätä fitikoko lefilen pwipwi.

²⁰Nei, kopwe aleasochisi mine semom a eäni allük ngonuk, nge kosap manlükala mine inom a aiti ngonuk.

²¹Kopwe amwöchünükü ar kewe kapas iteiten fansoun, kopwe iseniir lon lelukom.

²²Repwe emwenuk, lupwen kopwe fetal, repwe tümwünüuk, lupwen kopwe konola, nge lupwen kopwe pwätä, repwe fos ngonuk.

²³Pun mine ra öüra ngonuk a usun chök eu lamp, ar kewe kapasen kait a usun chök eu saram, nge ar kewe kapasen fön fän iten emirit, iei ewe alen manau.

²⁴Ekei kapas repwe tümwünuk seni ewe fefin mi ngau, pwal seni meseniawen eman fefin mi lüangau.

²⁵Kosap ekieki liöchün neminewe lon lelukom, kosap pwal tup ren nennen mesan.

²⁶Eman mwän a tongeni möni eman fefin mi amömö inisin ren ükükün liwinin efoch pilawa, nge mön eman fin lisowu mi fen wor pwülüan epwe püsin manauen ewe mwän.

²⁷Ifa usun, eman mwän a tongeni uwei ekkei fän mwärin, nge üfan esap kar ren?

²⁸Ika ifa usun, eman a tongeni fetal won moochen ekkei mi sarara, nge pechen esap poi?

²⁹Ina usun ätewe mi kon ren pwülüen chon arun. Iteiten eman me eman mi atapa neminewe epwe küna liwiningau.

³⁰Aramas resap kon oput eman chon solä, ika a solä anan mongö, lupwen a echik.

³¹Nge lupwen ra turufi, epwe aliwini fän fisu mine a soläni, inamwo ika epwe atowu pisekin meinisin seni lon imwan.

³²Nge eman mi lisowu a tiparoch. A chök püsin afeiengaua inisin.

³³Repwe akinasa o aitengaua, nge an itengau esap wesila.

³⁴Pun pwülüen ewe fefin epwe fokun lingeringeriti, nge lupwen epwe angei chappen ei föför, esap chä letipan.