Sua Tutŋana 6:15-34

¹⁵Tamen molo som to pataŋana biibi sa ko ipamurur zin, mi ipasaana zin ma tila len. Mi ko len zaala sa be timbot ambai mini na som.

¹⁶Mbulu lamata mi ta, ta Yooba leleene pa ri sa som, mi iurur koi pa. E-e, aŋso ŋoobo. Mbulu lamata mi ru:

¹⁷Mbulu ki tapakur itundu mi matanda pasom zin tomtom, mbulu tau kwondo ipakamkaam, mbulu ki namanda iteege siŋ pizin wal ta len uunu sa isaana som,

¹⁸mbulu tau lelende iur pa ŋgar sananŋana, mbulu tau kumbundu ipawwai iti be takam mbulu sananŋana,

¹⁹mbulu ki topombol sorok sua pakaamŋana ila zin bibip matan, mi mbulu tau tukuru toŋmatiziŋ kopon, mi takam ma ŋoŋi imbotmbot la mazwan.

²⁰O lutuŋ, motom iŋgalŋgal tutu ta boozomen ki tomom mi toto. Mi ŋgar ambaiŋana ta nom ikam pu na, zem pepe.

²¹Po sua kizin ila ndomom, mi kiskis la ŋgar ku. Pa ina ko ipeŋgeeze mbulu ku, kembei aigau ta imbot la ketem na.

²²Sua kizin irao ikam peeze pu, mi iuulu u be pa pai ku ma ambai men. Mi keeneŋana ku tomini ko ambai. Pa sua kizin ta imborro u. Mi sombe maŋga, na sua kizin ko ipeyei ŋgar ambaiŋana pu.

²³Tutu kizin ko iwe kembei ta kai pu be iyaara pu mi iso u pa zaala. Sua ta tikam pu na, ko iurur mat pu. Mi sua tutŋana ta tikam pu bekena tipazalu pa na, ina ko iwe zaala pu be ndeeŋe mbotŋana ambaiŋana.

²⁴Sua kizin ko iuulu u be mbotmbot molo pizin moori zaala lwoono kan. Kokena timbuulu kwon pu, to tikam lelem.

²⁵Ŋonoono, zin moori ta kembei na, ruŋgun ambaimbaiŋan. Tamen motom la pizin pepe. Mi sombe matan ikinmeete pu, na tikam lelem pepe.

²⁶Zin moori ta zaala lwoono kan na, kan kadon bibip som. Mi nu sombe la ki tomtom toro kusiini ma niomru kekeene, nako ka kadoono biibi kat. Pa nu ko meete ma la lem!

²⁷Lak, sombe tomtom sa iur namaana sala you, ko ikani som?

²⁸Mi sombe ipa se you keseene, ko kumbuunu ipokpok som?

²⁹Mi ina raraate men pa tomtom ta so ila ki tomooto toro kusiini na. Ni kola ire ka kadoono. Irao tileeli na som.

³⁰Sombe tomtom sa peteli ma isaana kat, mi ikam kuumbu pa ka kini, nako tomtom tire kembei ambai ri. Paso lelen isaana pini.

³¹Tamen sombe tindeeŋi, nako tiur sua pini be ikot koroŋ ta ni ikem na pa lamata mi ru. Ko ikot mi ila ila ma irao ruumu kini leleene ikolkol kat.

³²Mi tomtom ta so ila ki tomooto toro kusiini, na ni kankaanaŋana kat. Pa ina, ipasaana itunu.

³³Ko tipuni ma ruŋguunu isaana, mi ka miaŋ biibi kat. Mi ka miaŋ tana ko irao imap na som.

³⁴Pa re. Sombe nu la ki tomooto toro kusiini, nako kam tomooto tana ma mataana mburmbur mi keteene malmal biibi kat. Tana ni kola ipokot mbulu ku. Irao imuŋai u ri sa na som.