Taalie 20:1-15

¹Wɛni mixi rayaagima, beere mixi madaxuma nɛ. Siisila mu nɔma findide xaxilima ra.

²Mangɛ bɔɲɛ texi maniya yɛtɛ xaaɲɛ ra. Mixi naxan mangɛ raxɔnɔma, na bara a yɛtɛ tɔɔrɔ.

³Mixi binyaxi mu tinma gere ra, kɔnɔ xaxilitare birama sɔnxɔɛ nan fɔxɔ ra.

⁴Mixi tunnaxɔnɔxi mu yire buxama a waxati. Xɛ xaba tɛmui a baloe fenma nɛ, kɔnɔ a mu sese toma.

⁵Marasi tilin alɔ ye naxan na baa ma. Fahaamui kanyi na birin matoma nɛ.

⁶Mixi gbegbe dugutɛgɛɲa falama e yɛtɛ xun ma, kɔnɔ dugutɛgɛ yati yati toma duniɲa ma?

⁷Tinxintɔɛ ɲɛrɛma tinxinyi nan na, sɛɛwɛ na a xa die bɛ.

⁸Mangɛ kiitisa fata mixi bɔɲɛ ɲaaxi tode.

⁹Nde nɔma a falade, «Fe ɲaaxi yo mu n bɔɲɛ ma, n sɛniyɛnxi, yunubi yo mu na n ma?»

¹⁰Sikeeli tinxintare mu rafan Alatala ma.

¹¹Fonike xa ɲɛrɛ ki tinxinxi a bɔɲɛ ki masenma nɛ.

¹²Tuli naxan fe mɛma, ya naxan se toma, Alatala nan na birin daaxi.

¹³Xixɔli naxa rafan i ma de, xa na mu a ra i findima setare nan na. I ya lanma a xa rasɛgɛ, alako i xa baloe sɔtɔ a fanyi ra.

¹⁴Sareso nan a falama yulɛ bɛ, «Na sare mu fan n bɛ feo,» kɔnɔ a fa keli na xun ma a yɛtɛ matɔxɔfe ra.

¹⁵Xɛɛma nun gɛmɛ tofanyi gbegbe na duniɲa, kɔnɔ lɔnnila xa wɔyɛnyi tide gbo e birin bɛ.