Sandane 20:1-15

¹Manpaan muxun findin magele tiin nan na, dɔlɔn sɔnxɔn nan biran muxun na, dɔlɔ minna mi findɛ xaxilimaan na mumɛ!

²Mangana xɔlɔn luxi nɛn alo yatan wurundun xuina, naxan na mangan bɔɲɛn nate, na kanna a niin nan halagima.

³Binyen na a ra muxun xa naxan na a masiga yɛngɛn na, koni xaxilitaren birin mafura soɛ yɛngɛni.

⁴Muxu narixin mi xɛɛn bima a waxatini xunbenla a fe ra, anu, se xaba waxatini, a balon fenma nɛn, koni sese mi na.

⁵Muxun bɔɲɛ yi feene luxi nɛn alo igena xɔɲinna ra, koni xaxilimaan fatan na igen bɛ.

⁶Muxu wuyaxi e yɛtɛ hinanna fe falama, koni nde nɔɛ lannaya muxun toɛ?

⁷Tinxin muxun sigan tima fɛtareyaan nin, sɛwana a diine xa a xanbi ra!

⁸Mangan nɛma dɔxi a mangaya gbɛdɛni kiti sadeni a fe ɲaxine birin nakɔrɔsima.

⁹Nde nɔɛ a falɛ, a naxa, “N bata n bɔɲɛn natanga fe ɲaxin ma, n bata n nasariɲan yulubin birin ma?”

¹⁰Sikeli tinxintaren nun liga se tinxintarena, na sese mi rafan Alatala ma.

¹¹Foningen sɔnna kolonma a kɛwanla nan xɔn xa fɛ mi a kɛwanle ra, a tinxin.

¹²Tunla naxan feen mɛma, e nun yɛ naxan seen toma, Alatala nan ne birin daxi.

¹³I nama i yɛtɛ lu xixɔnli alogo i nama findi yiigelitɔɔn na. Xa i lu i yɛɛ ra yi, i lugoma nɛn balon na ki faɲi.

¹⁴Saresona a falama nɛn, a naxa, “A mi fan, a mi fan!” A mɔn yi sa a yɛtɛ matɔxɔ a se saraxina fe ra.

¹⁵Xɛmaan nun bɔxɔ bun nafunla wuyaxi dunuɲa yi, koni dɛɛn naxan fe kolonna falan tima, na tɔnɔn gbo e birin xa.