Sua Tutŋana 20:1-15

¹Tomtom ta so iwinin yok baen mi yok mbolŋana, nako kalŋaana izalla sorok mi ikamam mbulu bozboozo. Tana zin wal ta koroŋ ru tana iyaryaaru zin na, len ŋgar sa som.

²Sombe king keteene malmal, ina ikamam ti ma tomototo kembei laion ta kalŋaana izalla be ikan tomtom. Pa tomtom ta so ipas king keteene, nako imeete.

³Tomtom ta so iŋoŋooŋo som, nako uruunu ambai. Mi wal kankaanaŋan ta tizorzooro na, zin ta boozomen karau men mi keten malmal ma tiŋoŋooŋo.

⁴Sombe mazwaana ki kini paazaŋana ipet, na wal maolŋan tikamam uraata be tipaaza kan kini som. Tana mai ki kini isombe ipet, na tila tiru kan kini ma som.

⁵Iti tomtom lelende, ina kembei yok ta ka li biibi. Pa ŋgar ta imbotmbot sula na, ka uunu biibi mi turkeŋana. Mi tomtom ŋgarŋana na, ni iute zaala tabe ikam ti ma teswe ŋgar kiti turkeŋana ma imbot mat.

⁶Wal boozomen tizzo ta kembei: “Nio ti, aŋurur leleŋ pa Anutu mi zin tomtom mi aŋtoto sua tio mbukŋana.” Mi asiŋ irao indeeŋe tomtom sa ta ikamam mbulu ta kembei? Som. Tomtom sa ndemeereŋana som.

⁷Wal ndeeŋeŋan tipa pai kizin ma ambai men. Tana kaimer lutun bizin ko lelen ambai kat, mi kampeŋana ki Anutu imbotmbot se kizin.

⁸King mbuleene ise muriini peeze kana be iurpe pataŋana kizin tomtom. Ni le uraata be ipitpeleele zin tomtom. Ambaimbaiŋan tila ndel, sananŋan tila ndel.

⁹Asiŋ irao iso ta kembei: “Nio motoŋ iŋgalŋgal ituŋ mi leleŋ iŋgeeze men. Nio ambaiŋoŋ, mi leŋ sanaana sa som.” Tomtom sa isombe iso sua ta kembei, ko sua kini ŋonoono? Som.

¹⁰Iti sombe lelende be takam ŋgomo pa koroŋ sa, na Yooba leleene be tuur ka kadoono ma irao kat pa ka kin. Kokena tasala sorok pizin wal pakan, mi pakan na tusu pizin. Pa mbulu pakaamŋana ta kembei, Yooba leleene pa ri sa som kat.

¹¹Mbulu kizin pikin ta izzwe zin. Sombe mbulu kizin ambai mi indeeŋe men, na zin pikin ambaimbaiŋan.

¹²Yooba iur matanda be tere mi tikilaala. Mi iur talŋanda be teleŋ sua mi takam ŋgar pa.

¹³Keene rimos! Kokena su ma mbot ŋoobo. Maŋga karau pa mankwoono mi kam uraata. Naso rao kat pa kom kini.

¹⁴Iti sombe takam mburooŋo pa koroŋ sa bekena kadoono isu, mi sombe mburooŋo kiti ila ambai, nako kaimer tala raama menmeen ti, mi tapakur itundu pa mburooŋo ta takam na.

¹⁵Wal ta tizzo sua raama ŋgar na, zin boozo ŋan som. Tana iti sombe tendeeŋe lende tomtom sa ta kembei, ina koroŋ biibi. Pa wal ta kembei tilip pa gol mi pat milmilŋan ta kan kadon bibip na.