Sion 11:10-22

¹⁰Ka koakeil amual en mankoli ten vongien amusavoi, veni meneai tovuol en keil.”

¹¹Evus, Iesu vit risi vit, “Tuer eli Lasaros matil usae. Ka inau niha ka nisisil eni hemea.”

¹²Sakini, meatin keil onen aviteni avit, “Asuv, munak kei matil usae, kei mul moul ka helonge hetahos eris.”

¹³Keil amundemi keke Iesu mul selusien usil matilien onen Lasaros, ka mul vit usil matien onen varei.

¹⁴Sakini, Iesu vit leini min keil vit, “Lasaros mat tuai.

¹⁵Ka nasi inau keke narrotei vatal min keil en avong enek, veni koanek hekataun kami keke mihekur anatin imok enau. Rovaha veni.”

¹⁶Sakini, Tomas, koa avise en Maeh, viteni min keil vit, “Ir vasi reheha keke rehemat vituai hetal mini.”

¹⁷Navong Iesu rokol meteimal ten out Betani, kei votini keke aling teiai onen Lasaros en valengeihat tatetahinien avong ehat tuai.

¹⁸Betani rovitei soutin ran out Serusalem, vi kilomita etel (3 km) enges.

¹⁹Sakini, Siu keil houlu umai keke avatie lat enmahisien one min Marata ka Meri ven matien onen tuealu.

²⁰Navong Marata kur longlongien keke Iesu mul mai, kei eva vahisu mini. Ka Meri ro nges teim.

²¹Navong Marata les Iesu, viteni mini vit, “Asuv, vahit keik kovato ekok, tuak onak varmattei.

²²Ka nakilea keke kosa ekek, Ahi hesani minuk asa koa kovisi veni.”