Yohane 11:10-22

¹⁰Zo nu pire ebete zasimai tepo susauma te koiniro duwamunoya.”

¹¹Ago sero ge zo ego senua awa, “Otao nasokai Lasaro gitawa inoya, ata nakai barokai na nu awa-uzamunona.”

¹²Ago senu bua mai nuso meni ego sewa awa, “Tua, nu auro kokopai wamunoya.”

¹³Yesu meni betaira ge awa gitawa waira potiro senu bua mai nuso meni gitawa mere toita asero ago sewa awa.

¹⁴Are Yesu meni kereniro ego senua awa, “Lasaro betitaya.

¹⁵Na ago kaka baro nuamu ego nona betitaya, are na nikare emo duba naso kokopai inoya. Nikare tuma diai mere nuawise nena awa kei awitaya. Are nuso nana bayanekai.”

¹⁶Ago senu Tomas zazo nuso zo Didimo nune ami otao mamaire ego senua awa, “Nakai baro numore dai betanekai.” Ago senua awa.

¹⁷Lasaro bi ditira itinu be zoeto-zoeto wenu amire Yesu baro kei awenua.

¹⁸Betani nata awa Yerusalem nana zorage kena itinua. Bayaira ebata awa kilomita 4 gege.

¹⁹Are Yuda ema dainiro meni Matato Mariara numata betenua awa gamu muwa awa.

²⁰Are Mata nu “Yesu tupia,” ago sewa giro Maria sora dago itinu nune baro Yesu ebete ena tamunua.

²¹Tamuro numore ego senua awa, “O Tua, ni ego nuamesa, awa numata naso oko betamia.

²²Agoro na susu niso gosinona. Ni zeme nena zo emo Anutu isa sasa ninamunoya.”