Johaanas 11:10-22

¹⁰Bakie dje andhiaar me tjale hai, oe gier djaai.”

¹¹Ekare baad oe bhie bolies: „Hamlogke sanghatia Laasaaras soet gail hai. Bakie ham djaabe oke djagaawe.”

¹²Tab tjela log bolies: „Maastar djie, djab oe soete hai tab oe attjha hoi djaai.”

¹³Oesab sotjat raha kie Jiesoe bolies hai kie Laasaaras khaalie soete hai. Bakie okar matlab raha kie oe mar gail hai.

¹⁴Tab oe kholke bataais kie: „Laasaaras mar gail hai.”

¹⁵Oe bolies: „Toelogke bieswaas barhaawe khaatien ham khoesie baatie kie ham hoewa na gailie. Bakie ab hamlog okar paas tjalie.”

¹⁶Tab Tomaas djaun bhie „‘djorwa”’ bolaawal djaat raha, oe bolies: „Attjha, aaw hamahoelog tjalie dja. Tab hamlog okar sanghe mare k'hoi.”

¹⁷Tab djab Jiesoe Betaania gaaw ke nagietj pahoetjal, tab oe soenies kie Laasaaras ke mattie parle tien rodj bhail hai.

¹⁸Betaania Jeroesaalem sahar se khaalie lagbhag tien kilometer doer raha.

¹⁹Hoewa se dher dharam ke barkwan bhie marnie me aail raha Maarta aur Maria ke ghare baithe.

²⁰Tab Maarta djab soenies kie Jiesoe aawe hai tab aadha rasta par gail ose bhet kare. Bakie Maria ghare rahie gail.

²¹Tab Maarta Jiesoe se bolies: „He Prabhoe djie, djab toe hia rahiete tab hamaar bhaai na marat.

²²Bakie ham djaaniela kie Parmeswar toke ab bhie deiga djaun toe ose mangiehe.”