Sion 11:10-22

¹⁰E ngan xil xa lakakao e maluxoluken lasavut, vengan xa miehen tovuol e xil.”

¹¹Di, Iesu bit rilomun ni bit, “Tua nar Lasaros ba pat li. E inou niha nisiasi ni tengan ilale.”

¹²Ma, moletin nan xil labiteni labit, “Suv, xosxa xi pat kuhi, ma di meul e, ti, ilonge ihos rilomun.”

¹³Xil lanemi xa Iesu di misepin usil paten na Lasaros, e xi di bit usil maten na Lasaros vari.

¹⁴Mak, ma Iesu bit lelen ni mi xil bit, “Lasaros mat ngamu.

¹⁵E nabesi nou xa natnara ti visal xil e melele nen ak, vengan xa ngan ak itutou ni xamim tengan muke reitin mak mu e nou. Rihe visali.”

¹⁶Mak, ma Tomas, ngan xa lakesi ni Meah, biteni mi xil bit, “Xir vus riha tengan ha rimat itela.”

¹⁷Melele xa Iesu duxoh metimal te hal Betani, xi mikameti xa lateling tiei na Lasaros de vangihat te tehinen melengien hat (4) ngamu.

¹⁸Betani tave sotin ti ra hal Serusalem, be kilomita tol (3 km) tang.

¹⁹Ma, Siu xil holu lamei tengan lasa esaeen nae mi Merta e Meri ve maten na tua nalu.

²⁰Melele xa Merta milongeong ni xa Iesu di bemei, xi ba tengan ha vahisu mini. E Meri dat tim.

²¹Melele xa Merta pus Iesu, biteni mini bit, “Suv, vahit xouk otete inggak, tua navan namat ti li.

²²E nakila xa xosali ak, Hi isa ni minuk naha xa di osisi ven.”