Yohane 11:10-22

¹⁰Nga mong ye kundunnu kengande, ye fopockeu makpeude nocac yearu kperagia mong mi fede.”

¹¹Ifi dema yoac monggoc torokpema edeyunuec, “Nenang ogonina Radzaro gau feu ni midiba yarudeac ihai kembade.”

¹²Ifi deu medacfora yeneng degec, “Kebu, ye gau fedeu fekecma ngereeude.”

¹³Yesungo Radzaroac homecac deu, yeneng ine negenggec gautehec feu dede isoc anec.

¹⁴Imocac ye tongganang yofi edeyunuec, “Radzaro ye bic homedac.”

¹⁵Nga ngeni negensinggegecdeac amma ni imohai mi kefaiac ubangerec negenduae. Ngeni yaguc hagec yearu kenni.

¹⁶Ifi deu Toma kpara mong Tombosonga yeng medac ogofora edeyunuec, “Nenang ifingoc yegoc homenideac kenni.”

¹⁷Yesungo Betania taonnu kensikeu Radzaro ye kicsereu wenac yohoc nga yohoc bic ferahemanu edegec negenec.

¹⁸Yerusareng nga Betania botucngirau kiromita harebec, imocacsoc wegeng wegeng taroc. Imocac

¹⁹Yudangic homacngo naingngiraac amma demeefai ayecmebesonga dema Mata nga Maria yerearu hatacgec.

²⁰Tacmagec Yesu hade degec Matango imoc negemma meficgeudeac kenu Mariango ine amau tarec.

²¹Taru Matango kemma Yesu edeec, “Kebu, geng yei nenigoc kecbang debac nainna mi homebac.

²²Nga geng yaguc iwai monggac Anutu kpesimina ye naric genude, imoc negenduae.”