ᤕᤢᤜᤢᤴᤏᤠ 11:10-22

¹⁰ᤁᤖ ᤀᤠᤳᤋᤡᤴ ᤔᤏᤠ᤺ᤴ ᤛᤧᤴᤍᤡᤰ ᤗᤠᤱᤄᤣ᤺ᤰ ᤂᤧᤸᤗᤧ ᤁᤢᤗᤠᤱ ᤋᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤂᤠᤍᤠᤶᤔᤥ ᤂᤧᤸᤗᤧ ᤌᤥ᤹ᤛᤡᤱᤔᤠ ᤀᤥ᤺ᤳᤋᤡ᤺ᤴ ᤔᤧᤃᤳᤋᤢᤴᤗᤥ॥”

¹¹ᤀᤰᤂᤣ ᤐᤠ᤺ᤳᤋᤢ ᤛᤢᤖᤢᤀᤠᤱ ᤕᤧᤛᤢᤖᤧ ᤕᤠᤶᤔᤥ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤏᤡ᤹ ᤆᤢᤶ ᤗᤠᤈᤖᤛᤧᤴ ᤔᤢᤖᤢᤰ ᤂᤢᤖᤢᤰ ᤀᤡᤵᤛᤧᤀᤠᤱ ᤏᤧᤖᤥ. ᤁᤖ ᤂᤢᤏᤧ᤹ ᤁᤢᤓᤥ᤺ᤱᤛᤧ ᤐᤣ᤺ᤰᤁᤠᤖᤥ॥”

¹²ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤂᤢᤏᤧ᤹ ᤀᤡᤵᤛᤧᤀᤠᤱᤗᤰ ᤏᤧᤏᤧ ᤑᤠ᤹ᤃᤪ ᤐᤥ᤺ᤰᤗᤥ॥”

¹³ᤕᤧᤛᤢᤖᤧ ᤂᤧᤱᤜᤠ᤹ ᤗᤠᤈᤖᤛᤖᤧ ᤁᤢᤛᤡ᤺ᤔᤧᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤧᤳᤋᤢᤛᤡᤀᤠᤱ ᤘᤕᤧ. ᤁᤖ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤗᤠᤈᤖᤛᤧᤴ ᤀᤡᤵᤛᤧᤀᤠᤱᤗᤰ ᤏᤧ᤹᤺ ᤗ᤹ᤖᤡᤰ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖᤥ॥

¹⁴ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤁᤢᤍᤥ᤺ᤵᤔᤠᤀᤣ ᤔᤧᤳᤋᤢᤛᤡ. “ᤗᤠᤈᤖᤛᤧᤱᤃ ᤛᤩᤧᤖᤥ.

¹⁵ᤁᤖ ᤀᤠᤸᤗᤛᤠᤱ ᤂᤡᤏᤡ᤹ ᤕᤖᤡᤰ ᤕᤠᤵᤔᤡ ᤏᤛᤠ᤺ᤴ ᤀᤠᤃᤧᤈᤥᤃᤡᤖ ᤑᤠ᤹ᤀᤠᤱ ᤀᤡᤱᤃᤠ᤹ ᤂᤧᤳᤏᤠ ᤜᤥ᤺ᤵᤋᤠᤱᤒᤠᤴᤏᤣ ᤂᤡᤏᤡ᤹ ᤗᤠᤃᤡ ᤏᤢ᤺ᤒᤠ ᤐᤥ᤺ᤰᤂᤧᤖᤥ॥ ᤀᤠᤸᤗ ᤂᤢᤏᤧ᤹ ᤁᤢᤛᤠ᤹ᤛᤧ ᤐᤣᤃᤡᤖᤥ॥”

¹⁶ᤜᤧᤰᤁᤩᤠᤱ ᤍᤡᤍᤡᤔᤛ ᤔᤧᤵᤔᤏᤠᤒᤠ ᤌᤥᤔᤠ᤺ᤸᤗᤧ ᤘᤣ᤹ ᤁᤢᤴᤈᤢᤶ ᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤠᤏᤡ᤹ᤀᤠᤱ ᤍᤠᤱᤒᤠᤴᤏᤢᤀᤣ ᤐᤣᤃᤡᤀᤠᤱ ᤂᤢᤏᤧ᤹ᤏᤢᤀᤣ ᤛᤩᤧ᤹ᤀᤡᤖᤥ॥”

¹⁷ᤂᤧᤱᤜᤠ᤹ ᤒᤧᤌᤠᤏᤡᤀᤥ ᤔᤧᤃᤧᤖᤧᤸᤗᤧ ᤗᤠᤈᤖᤛᤧᤴ ᤂᤠᤶᤔᤥ ᤔᤧᤈᤡᤰᤂᤢᤒᤠᤱᤃ ᤗᤡᤛᤡ ᤕᤧᤴ ᤁᤧᤖᤧ ᤁᤧᤗ᤹ᤒᤠᤴ ᤕᤧᤛᤢᤖᤧ ᤏᤡᤱᤘᤠ᤹ ᤂᤥ᤺ᤛᤢᤖᤥ॥

¹⁸ᤒᤧᤌᤠᤏᤡᤃ ᤕᤖᤢᤛᤗᤧᤶᤗᤠᤶ ᤁᤡᤗᤥᤔᤡᤋᤖ ᤛᤢᤶᤛᤡ ᤕᤠᤖᤡᤰ ᤔᤠ᤺ᤰᤂᤧ.

¹⁹ᤜᤧᤰᤁᤩᤠᤱ ᤕᤖᤡᤰ ᤕᤜᤢᤍᤡᤜᤠ᤹ ᤔᤠᤷᤌᤠ ᤏᤢ ᤔᤖᤡᤕᤔᤖᤧ ᤂᤢᤴᤇᤡ᤹ ᤛᤱᤘᤠᤒᤠᤴ ᤛᤩᤧᤒᤠᤀᤥ ᤂᤢᤴᤇᤡ᤹ ᤀᤠ᤺ᤴᤇᤡᤱᤔᤠ ᤐᤡᤛᤧ ᤂᤧᤵᤔᤥ ᤔᤧᤍᤩᤧᤀᤠᤱ ᤔᤧᤘᤕᤧ॥

²⁰ᤔᤠᤷᤌᤠᤖᤧ ᤕᤧᤛᤢ᤺ᤴ ᤑᤧᤴᤗ ᤐᤳ ᤁᤧᤗ᤹ᤒᤠ ᤂᤧᤵᤛᤢᤀᤠᤱ ᤗᤠᤶᤍᤣ᤺ᤱ ᤌᤠᤖᤡᤰ ᤁᤢᤍᤢᤶᤛᤧ ᤐᤣᤖᤥ. ᤁᤖ ᤔᤖᤡᤕᤶᤔᤡᤴ ᤜᤡᤶᤔᤥᤀᤣ ᤕᤠ᤺ᤰᤋᤧᤖᤥ॥

²¹ᤔᤠᤷᤌᤠᤖᤧ ᤕᤧᤛᤢ᤺ᤴ ᤔᤧᤳᤋᤢ. “ᤍᤠᤱᤒᤣ. ᤂᤧᤏᤧ᤹ ᤁᤵᤔᤥ ᤁᤧᤘᤕᤧᤸᤗᤧᤃ ᤀᤠᤴᤛᤠ᤹ ᤔᤧᤛᤩᤧᤏᤧᤶᤒᤠᤔᤧᤴ᥄

²²ᤁᤖ ᤀᤠᤸᤗᤥ ᤌᤣ ᤁᤧᤏᤠ᤺ᤰᤋᤢᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡ᤹ ᤁᤧᤗ᤹ᤒᤠᤴ ᤀᤡᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥”