Juan 11:10-22

¹⁰ngem no mendad-aan isnan labi et maisagaw tay menbolinget.”

¹¹Dat itoloy Jesus ay mangwani, “Nan gayyem tako ay si Lazaro et naseyep ngem omeyak ay manggido.”

¹²Dat kanan nan papasolotna, “Apo, gawis no naseyep tay awnit gomawis.”

¹³Kananda en waay tet-ewa ay naseseyep si Lazaro ngem nan kayat Jesus ay kanan et natey et

¹⁴isonga danat kanan, “Natey si Lazaro

¹⁵ngem men-gasingak tay maiwedak isnan kad-ana isnan nateyana tasiyay pomigsa nan pammatiyo no ilaenyo nan ikkak. Entako bawet ilaen siya.”

¹⁶Si Tomas ay makwani en Ipi et kinwanina isnan iib-ana ay pasolot en, “Makkey tako ken Jesus id Judea ta olay no maitapi tako ken siya ay matey.”

¹⁷Issan inomdanan da Jesus id Betania et dinatnganda ay epdas naikaob si Lazaro is epat ay agew.

¹⁸Toloy kilometro nan kaad-addawina id Jerusalem

¹⁹isonga adoado nan Judio ay inmey nangliwliwaliw ken da Marta ken Maria gapo isnan nateyan nan besatda.

²⁰Issan nangdengan Marta ay omal-ali si Jesus danat omey sab-aten siya ngem si Maria et nataynan isnan baeyda.

²¹Dat kanan Marta ken Jesus, “Apo, no wadaka isna et egay koma katey nan besatko.

²²Ngem getkek ay olay id wani et idyan Apo Dios ken sik-a nan dawatem ken siya.”