SAN LUCAS 1:48-77

⁴⁸Chi ní ndacu iní ñáhá‑gǎ xii yúhú, te dìcó ɨɨⁿ xíchí xínú cuèchi núú‑gǎ cúù‑í, te vitna te nchaandɨ túhú ñáyiu cachí‑yu sá ǐo váha táhù‑í.

⁴⁹Te Yá Ndiǒxí cándòo caa nine iní‑gá, te ío càhnu ɨɨⁿ sá vǎha ní quide‑gá sá cúú‑xì‑í.

⁵⁰Te cùndahú iní‑gá nchaa ñáyiu nèhe sá yɨ́ñùhu núú‑gǎ. Te ducaⁿ‑ni cuěi ñáyiu sa ndècu ñuyíú‑a ndɨhɨ ñáyiu vitna véxi.

⁵¹Chi ta quìde‑gá nchaa sá vǎ yǒo tnàhí ndàcu cada véxi, te ta dàndóo canúú‑gǎ cue ñáyiu quìde cahnu mee‑xi.

⁵²Te cue ñáyiu tàxi tnuní ñá túú‑gǎ dáñá‑gǎ taxi tnùní‑yu, te cue ñáyiu ndàhú ní quide nínu ñaha‑gǎ xií‑yu.

⁵³Te cue ñáyiu ndècu ndɨhɨ tnúndòho tnúhu ndàhú ní quide váha ñaha‑gǎ xií‑yu, te cue ñáyiu cuica ñà túú nǎ ní nǐhí‑gǎ‑yu cundecu ndɨhɨ́‑yu.

⁵⁴Te chìndee‑gá ñáyiu isràél, ñáyiu xìnu cuechi núú‑gǎ, te ñá túú dàña nihnu ñaha‑gá xií‑yu, chi cùndahú iní ñáhá‑gǎ.

⁵⁵Chi ducaⁿ nǐ xáhaⁿ‑gǎ xii ndíi Àbrahám, ndɨhɨ cue ñaní tnáhá ndǐi. Duha ní xáhaⁿ tǎ Màriá xii tá Elisàbét.

⁵⁶Te ní xíndecu tá Màriá dàtná úní yóó ndɨhɨ tá Elisàbét te dǎtnùní cuánuhú‑xi vehe‑xi.

⁵⁷Te ní sáá nduu nǐ cacu ɨɨⁿ déhe tée tá Elisàbét.

⁵⁸Te nchaa ñáyiu ndècu yatni ndɨhɨ‑aⁿ, ndɨhɨ nchaa ñaní tnáhá‑áⁿ nǐ níhǐ‑yu tnúhu nàcuáa ní chindee ñàha Yá Ndiǒxí xii‑aⁿ. Te ío ní cudɨ́ɨ́ ìní‑yu cuèndá‑aⁿ.

⁵⁹Te núú ùná nduu sá nǐ cacu déhe‑aⁿ, te ní sáháⁿ ñáyiu núú ndécú‑áⁿ cuèndá cuáhǎ‑yu sèñá ñɨɨ déhe‑aⁿ. Te cuìní‑yu cunani děhe‑áⁿ Zacàriá dàtná nání tǎtá ní cùu.

⁶⁰Te ní xáhaⁿ nǎná děhe‑áⁿ: —Ñáhá, chi Juàá cunani‑dě —càchí‑aⁿ xǎhaⁿ‑aⁿ xìí‑yu.

⁶¹Te ní xáhǎⁿ‑yu: —¿Te ná cuèndá te ñá túú nì ɨɨⁿ ñaní tnáhá‑ndó dùcaⁿ nani‑i? —cachí‑yu xǎhǎⁿ‑yu.

⁶²Te ní quidé‑yu ndàhá‑yu núú tǎtá děhe‑áⁿ cuèndá cuìní‑yu núu nása cuìní méé‑dě cunani děhe‑dé.

⁶³Te ní xícáⁿ‑dé ɨɨⁿ tutú ní chídó tnùní‑dé nàcuáa cunani děhe‑dé, te duha ní chídó tnùní‑dé: “Juàá cunani‑dě”, càchí‑xi núú tùtú ní tee‑dé‑áⁿ. Te nchaa ñáyiu xǐndecu‑áⁿ nǐ cuñúhu‑yu nàcuáa ní cuu.

⁶⁴Te òré‑áⁿ nǐ nacáháⁿ té Zacàriá sá nǐ cuu ñɨ̀hɨ́‑dé ní cùu, te ní ngüíta‑dé ní cachí‑dé sá ǐo càhnu cuu Yá Ndiǒxí.

⁶⁵Te nchaa ñáyiu xǐndecu yatni ndɨhɨ‑dé ní cuñúhu‑yu, te nchaa ñáyiu xǐndecu nɨhìí xɨtɨ́ yucu distrìtú Jùdeá ní níhǐ‑yu tnúhu nàcuáa ní cuu.

⁶⁶Te nchaa ñáyiu‑áⁿ ǐo vài ní sani iní‑yu, te ní xítnàhá‑yu: —¿Ná cúú sǎ cádá těe‑ǎⁿ ndéé ìdá‑gá ná cuèhnu‑dé? —càchí‑yu xǐtnàhá‑yu. Te ducaⁿ nǐ xítnàhá‑yu chi Dútú Ndiǒxí ndécú ndɨ̀hɨ ñaha‑gá xii‑dé.

⁶⁷Te té Zacàriá tǎtá tě lǐhli‑áⁿ nǐ ngúndecu ndɨhɨ‑dé Espíritú Yǎ Ndiǒxí te ní cáháⁿ‑dé nchaa tnúhu sá nǐ dánèhé ñáhá‑gǎ, te ní cachí‑dé:

⁶⁸Ío càhnu cuu Dútú Ndiǒxí nchoo ñǎyiu isràél, chi ní quixi coto ñaha‑gǎ xii‑o, te cùu‑o ñáyiu cùu cuendá‑gá, chi dàcácu nihnu ñaha‑gǎ xii‑o vìtna.

⁶⁹Chi ní tendaha‑gǎ ɨɨⁿ tée véxi‑dé dàcácu nihnu ñaha‑dě xii‑o nǔú ùhú núú ndàhú. Te cùu‑dé ñaní tnáhá ndǐi Dàvií tée ní xinu cuechi nǔú‑gǎ ndéé sanaha.

⁷⁰Te dɨu‑ni tnúhu ní cáháⁿ Yǎ Ndiǒxí ní cáháⁿ cue tée ní quide ndáá ní xíndecu núú‑gǎ ñuyíú‑a ndéé sanaha.

⁷¹Te ní cachí‑güedé sá táúnìhnu ñaha‑gá xii‑o nǔú nchàa ñáyiu cùu úhú iní ñáhá, ndɨhɨ núú nchàa ñáyiu ñá túú cùu quiní ndee ñáhá.

⁷²Te ní xáhaⁿ‑gǎ sá cúndàhú iní ñáhá‑gǎ xii‑o, te ducaⁿ càda‑gá chi vá nácuànaa‑gá tnúhu ní cáháⁿ‑gá ndɨhɨ‑güedé.

⁷³Te dɨu ducaⁿ ndùu tnúhu ní xáhaⁿ‑gǎ xii ndíi Àbrahám sá

⁷⁴táúnìhnu ñaha‑gá xii‑o nǔú nchàa ñáyiu cùu úhú iní ñáhá, cuèndá sá vǎ yùhú‑ó cùnu cuechi‑o núú‑gǎ.

⁷⁵Te cada ndáá‑ó, te cundecu yɨñùhu‑o núú‑gǎ ndɨ nchàa nduu cundecu‑o ñuyíú‑a. Duha ní cachí té Zacàriá.

⁷⁶Te xǎhaⁿ‑dě xii té lǐhli‑áⁿ: Te yòhó té lǐhli, cáháⁿ ñáyiu cuèndá‑n sǎ cúú‑n ɨ̀ɨⁿ tée càháⁿ tnúhu Dútú Ndiǒxí Yaá ío cùnuu, chi quɨ́hɨ́ⁿ‑n còdonuu‑n núú Yǎá cúú Xǐtohó‑ó dàtúha‑n ñǎyiu cuèndá cundecu túha‑yu òré quexìo‑gá.

⁷⁷Te cúñaha‑n xìi ñáyiu isràél sá cuìní‑gá cada càhnu iní‑gá nchaa cuéchi‑yu, te naníhí tàhú‑yu.