LUCAS 1:48-77

⁴⁸Porke wkalo Ne noo, mase rut nakdet noo, noze te mén ne rlaa xdxiin Ne nak noo. Desde orree yrandxee mén ne nuu naaree, nigle mén ne gyed tsuur, ynii men noo men nzoon.

⁴⁹Porke nzoon yra ne wlaa Dëdyuzhnzoon noo; sant nak la Ne.

⁵⁰Syemper rles lextoo Ne yrandxee mén ne rlaa ne rkyeen Ne.

⁵¹Ndal ne wlaa Ne kon xpoder Ne; wluzh Ne ne rlebleedx yra mén ne nugya lextoo.

⁵²Wgyitxee Ne poder lo mén ne zob rnebééy, le mén ne rut nakdet wlagya Ne.

⁵³Wseleedx Ne gyelenzaak lo mén ne yët ne gu, le menrik wsan Ne nonchee zenga.

⁵⁴Nunk wnitleedxdet Ne ne gun Ne xyudar yra men-Israel ne nak xpén Ne, syemper wles lextoo Ne men,

⁵⁵zegne re Ne lo yra xpenkwlal be, lo Abraham no le lo yra men ne zëëd xnëz men.

⁵⁶Nga wkaa nzeb ruxyuu Elisabet zeg tson mëëw, zhich guin wberee ke nzeb ruxyuu nzeb.

⁵⁷Chene wdxiin dxe ne le xpëëd Elisabet wal, wap Elisabet te mëdbee.

⁵⁸No chene waknan yra mén ne nuu guex ruxyuu Elisabet no le yra xparyent Elisabet ne wles lextoo Dëdyuzh Elisabet, kesentyent wzhiilen men; wa men gyelgabtyuzh lo Elisabet.

⁵⁹Ne wluzh mëëd guin xun gbiz, waneey men ne wuu ne beey ne ruu men-Israel, lex wlaan mén nnesela mén ne Zacari zegne la ke xuz ne.

⁶⁰Per re xnaa ne: ―Seladet ne zegwa, Xwa sela ne.

⁶¹Lex re men: ―¿Penak sela ne Xwa, si ni te xparyent de ladet Xwa?

⁶²Lex wnabdiiz men lo xuz ne kon senye, chen gaknan men pezee rlaan xuz ne sela ne.

⁶³Orguin wnab xuz ne tebla tabel, lex wkaa men lo tabel guin: “Xwa sela ne.” Wzee wzak yrandxee mén guin.

⁶⁴Orgueguin wberee wnii Zacari ste, lex wzelo men wdee men dexkyizhtee lo Dëdyuzh.

⁶⁵Yrandxee mén ne nuu guex ruxyuu men wzee wzak, no yrandxee gyëz ne nak nes gyeey lo lyu ne la Judea ruu mén diiz neguin ne wak.

⁶⁶Yra mén ne wono, nuu we lextoo men, lex re men: ―¿Txu gakleg mëëd gwa? Porke nlipee ne Dëdyuzh raknonen ne.

⁶⁷Kesentyent waknonen Espíritu Sant Zacari xuz mëëd guin; wzëët men yra diiz ne wguu Dëdyuzh lextoo men, re men:

⁶⁸Dexkyizhtee Dëdyuzh ne rnebééy lo men-Israel, porke zëdselaa Ne be yra be ne nak be xpén Ne.

⁶⁹Lad men ne zëëd xnëz David ne nak xpén Ne, wseleedx Ne te mén ne rap poder ne yselaa be.

⁷⁰Zegne re Ne axtegue chekwlal ne wzëët yra men ne nak xprofet Ne,

⁷¹ne selaa Ne be lo yra mén ne rlayaa lo be no le lo mén ne rlaandet kwii be,

⁷²no ne sles lextoo Ne yra xpenkwlal be, no ne nitleedxdet Ne ne che re Ne ne ylaa Ne.

⁷³Laa we nga re Ne lo Abraham xpenkwlal be:

⁷⁴ne selaa Ne be lo yra mén ne rlaandet kwii be, chen betre ydxedet be ylaa be xdxiin Ne,

⁷⁵no xnëz gak be lo Ne, wen ybán be ydeblo ne ybán be.

⁷⁶Le laa de zhiin, xprofet Dëdyuzhnzoon ynii mén de, porke laa de saner ylaxnëz xnëz Men ne rnebééy,

⁷⁷chen ylaa de ne gaknan xpén Ne pezee yláá men lo dol, chen gak perdon xdol men.