Luk 1:48-77

⁴⁸Iyamna taku ina bigabiga vovokuwayiku na enotanotiku. Kimta kudubisi karako ma mara nonowa ini sisiyeku, ina vona da taku na ina vibiibiina kamonai.

⁴⁹Tuna na God Rewapana Kirakiina ma kubiiku bera ghamaghamasi eberaberai. Ma kana vava na vovokaravina.

⁵⁰Iyavo kava God eyabuyabumanei na ini kamyuyuwesi, Kimta ma kimta kurisi ina vikamyuyuwa ini debei.

⁵¹Imana rewapaninai na bera ghamaghamasi eberaberai. Iyavo kava i nota gavugavusi kamonai ekayokayotata na ikugerisi.

⁵²Kiikiivavo eteretereoruwesi ma wawaya vovokuwayisi na etereterepisi.

⁵³Iyavo kava vitonara ikarakarisi na ikanikanisi, ma mumurisi na imasi kwebukwebusi ma evonavonatawesi.

⁵⁴Ina bigabiga Israel damsi ini vitesi, ke nuwanuwana ita wapa da iti kamyuyuwesi.

⁵⁵Vonakiiyapa bagibagina iterei Abraham ma tupurereghina kurisi, Tuna sisiyina ita kaekiki mau kurisi iberai na enununuri.”

⁵⁶Ma vaghina, Meri nawaravi aroba Elisabet yavata imakai ma muriyai ivovira ina ku dobu.

⁵⁷Elisabet ina mara ipisi da iti tuwa na ivi tuwa da natuna tomowa.

⁵⁸Ma ina rakaraka ma turaturana sisiyina ivi yanei da Elisabet yavata ivi nuwabiibii kirakai da Bada ivi kamyuyuwei da ivi tuwa.

⁵⁹Ivi tuwa murinai na mara 8 ikovi na wawaya iriyei da tomowa kikei kwimata bekana ita tuviviratawei ma kana vava ita verei. Ma iti vavei Zekaraya, ina mamai yavata iti varigheya.

⁶⁰Ma ina maduwa ivona bo, “Kegha, kana vava Jon.”

⁶¹Ma wawayisi ivonapotei bo, “Am rakaraka kamonai ke sago iyai da kana vava nakanani.”

⁶²Ma wawayisi tomowa kikei ina mamai kurina imasiyai irurutawei, akova ita viiya da ina kayowana ikikava natuna kana vava kubiine.

⁶³Ma imanai ivi matakira da girugiruma sawarisi ita kavarapiyei. Ma igiruma bo, “Kana vava Jon.”

⁶⁴Yaghiyaghinai kawana itamotatagha ma pepana ivi kuvirei da ivi sisiya ma God vigheghenina ivi karei.

⁶⁵Turaturasi inota kavakavai ma weni berasi kudubina sisiyisi ikiibau da Judiya dobuna ine yavui.

⁶⁶Wawaya ivi yanei ma nuwanuwasi ivivi tetei da ivonavona bo, “Weni wawaya kikina ina magura na avi ina berai? God imana gwabinai emakamakai.”

⁶⁷Ma Kanuma Vovokaravina, Zekaraya itowatepani da sisiya God gwabinai iviiya. Ma ivona bo,

⁶⁸“Bada tavokavakavari, tuna Israel ita God Tota ina wawaya kurita inekiibau da ita nuwapoya kamonai ina votaweta.

⁶⁹Ina bigabiga David ina rakaraka kamosiyai kata Viviyawa rewapana kirakiina ina miirikiibau.

⁷⁰Ikikava mara katamaninai ina peroperoveta vovokaravisi kurisi ivi sisiya na nani berasi ina berai.

⁷¹Ivona da kata ghavighaviya ina ghegavovorisi ma ini yawasita. Ini viteta da iyavo kava ebabareta na i rewapana takiibutawei.

⁷²Ita kaekiki ivonesi da ini kamyuyuweta, Ma ina vivaghina makamakiina ma vovokaravina kurita iterei na ke ini notawapei.

⁷³Vonakiiyapa bagibagina ita mamai Abraham kurina iterei,

⁷⁴Ivona da ini tarapaparaneta da kata ghavighaviya ke aviyavisina ina berai kurita. Tuna kubiine ke tayabumana ma kovokovoghita da tavokavakavari ma ina biga tabera bubuni,

⁷⁵Ma mara ku peyarina ina vona da tota na ina wawaya vovokaravita ma maninita.

⁷⁶Ma tam, natuku, ina kwatum da God Kiidamo Makamakiina ina peroveta. Kuni nao da Bada ina keta kuna vovunaghi.

⁷⁷Ina wawaya kuni akovisi da God i bera beroberosi ina notatawei da yawasa makamakii nonowina ina panani.