Luk 1:48-77

⁴⁸Husur eris natǝbarehreh san tovi ut kǝmas, ale vi sutuai naur p̃isi lekiskis ginau ke alitenan navoian topat lan.

⁴⁹AGot todaŋ buni igol natgalevis tovoi buni hǝn ginau, gai sǝb̃on, nahǝsan esǝhor nǝhes p̃isi.

⁵⁰Ilolosa hǝn naur p̃isi ta sutuai vi sutuai lotomǝtahw len nǝyalyalan san.

⁵¹Eṽusan nǝdaŋan san hǝn navǝlan tia, ehut alat lotoṽiv, lumap̃ip̃iriah, alatenan lotopatpat galit mǝhat len nǝlolito.

⁵²Isah sur alat lotoyalyal vi pan dan namilelito, ale eputsan alat lotovi ut kǝmas.

⁵³Evǝŋan alat lotomalkǝkat, luhanukub, avil esǝvat alat lotokad natit p̃isi, luvan sǝsǝlav.

⁵⁴Evi tarhǝt silat a Israel lotovi vanuan san gail, inau gati hǝn b̃igol nalolosaan mai navoian hǝn galito,

⁵⁵hum tokel gati mai atǝmadat gail, mai aApraham mai nǝpasusan san van van vi sutuai.”

⁵⁶AMeri itoh mai aElisapet pǝpadaŋ hǝn nahǝbati itor, beti etǝlmam vahim.

⁵⁷Len nǝboŋ aElisapet topas naulum̃an san,

⁵⁸amahean gail mai alat lototoh pǝpadaŋ hǝni, losǝsǝloŋ hǝni ke Nasub̃ aGot ivoi buni hǝni, ale lohǝhaṽur maii.

⁵⁹Len nǝmariboŋ tomǝlevtor logǝm hǝn lǝb̃etiv dalus anatun ale luke leriŋ nahǝsan atǝman aSekariah lan.

⁶⁰Avil anan ikai ke, “Aoa, nahǝsan m̃au aJon!”

⁶¹Ris lotokel maii ke, “Amaheam̃ gail, nǝhes enan eb̃uer len galito.”

⁶²Ale lusor len navǝlalit mai aSekariah hǝn lǝb̃isab̃ nǝhes aSekariah toke tekisi hǝni.

⁶³ASekariah isor len navǝlan, eus natit hǝn b̃itos lan ale itosi ke, “Nahǝsan aJon.” Galit p̃isi lup̃aŋ lan.

⁶⁴Vǝha-sua ŋai elǝboi b̃isor tǝtas, ale etub̃at hǝn b̃isal suh aGot.

⁶⁵Alat lototoh pǝpadaŋ hǝni, lumaŋmaŋ, lomǝtahw, mai alat a Jutea, naut enan tobaŋ ṽehuh, luhol husur natgalegai.

⁶⁶Nǝvanuan gail p̃isi lunau masuṽ hǝn nǝsa lotosǝsǝloŋ hǝni, ale luke, “Natǝtai egai dereh timabe?” Husur navǝlan aGot ipat tin lan.

⁶⁷Atǝman aJon, aSekariah epul hǝn aNunun aGot beti ikel ur nǝsa aGot tokel maii ke,

⁶⁸“Noputsan nahǝsan Nasub̃ aGot seIsrael, bathut egǝm hǝn togol nǝvanuan san gail lotovi slev lotomakuv,

⁶⁹ale esǝvat avan sua todaŋ len nǝpasusan sivanuan nauman san, aTevit, atenan dereh tilav kuv gidato dan nǝsaan sidato.

⁷⁰AGot ekǝmaienan len nabuŋon ahai kelkel ur san gail ta sutuai,

⁷¹ke atenan b̃ilav kuv gidato dan aenemi sidat gail, dan navǝlan alat lotomǝtahun bun gidat habat.

⁷²Ilolosa hum tokel gati mai atǝmadat ta sutuai ale inau gat na-kel-gati-an san tokitin,

⁷³na-kel-gati-an tota gati len nahǝsan mai aApraham atǝmadat ta sutuai:

⁷⁴hǝn b̃ilav kuv gidato dan navǝlan aenemi sidat gail hǝn ke datb̃eum san, asike datukad namǝtahwan,

⁷⁵ale datb̃inor len nǝhon mai datb̃ivoi vǝbar nagilen nǝmauran sidato.

⁷⁶Gaiug m̃au anatugw, dereh lekis gaiug hǝn ahai kelkel ur siGot toyalyal buni; husur dereh gaiug geil a m̃o hǝn Nasub̃ hǝn gǝb̃eutaut hǝn nap̃isal san gail,

⁷⁷hǝn gǝb̃ilav mai nǝvanuan san gail nalǝboian hǝn nǝ-lav-kuvi-an dan nǝsaan len narub̃atian dan nǝsaan salito.