Nok 1:48-77

⁴⁸'ĩhãk mũn kutõgnãg, yã Topa hã kãmãnat hex, yĩy tikmũ'ũn xohix te hãm'ãktux putup mõ'kuma' mõg, hu: “Topa te Mãnix pu hãmmaxnãhã'.” Kaxĩy.

⁴⁹Ha Mãnix te xe': —Topa ka'ok xe'ẽgnãg, tu tek mũn pu hãpxopmãhã', yã Topa max xe'ẽgnãg,

⁵⁰tu yãy yõg tikmũ'ũn kuxa ka', nõm xop yĩpkox pip Topa pu', ha tikmũ'ũn kuxa ka', xik-tok xop, xik mõkputox kuxa ka' Topa te', nõm xop yĩpkox pip Topa pu' kuxa ka',

⁵¹ha hãpxopmã max xe'ẽgnãg, tu' gãy nãm xop hã hãpxummãhã', nõm xop te hãmpe'paxex, hu: “'Ũgmũn xexkah.” Kaxĩy.

⁵²Topa te' xexka xop xupepmãhã, puk-tõgnãg xop yãyhã tu xexkah,

⁵³ha' hok xop pu hãpxop punethok popmãhã', tup-texop xexka pu hãpxop popmã 'ohnãg, tu': “Mõg, mõg!” Kaxĩy. Tu' xupepmãhã'.

⁵⁴Tu hãm'ãktux xex mõnãyxop pu', tu' xutigãhã', tu 'Iyaet yõg tikmũ'ũn mõ'nĩynãm, tu' yõg kãmãnat xop xaxok 'ohnãg, tu mõ'nĩynãm.

⁵⁵Hõmã, hãmyãxatamuk xohix 'ĩhã', Topa te mõnãyxop 'Amanãm pu hãm'ãktux xex, tu' xaxok 'ohnãg. Ta tu' kux. Kaxĩy.

⁵⁶Mẽy 3 hã Mãnix te 'Iyamet mũtik tihi', ha mẽy 3 kux, 'ĩhã yãy pet ha' mõg, tu' mõg tu mõktu xupep 'ũyãy pet tu'.

⁵⁷'Ãmnĩy xohix nõg 'ĩhã 'Iyamet tek-tok put, ha' pit,

⁵⁸ha' xape xop xix tikmũ'ũn te' yĩmap hã' pip te' xupak, tu Topa te nõmhã hãmmax mĩy yũmmũg, ha 'Iyamet kuxa hittup xix tikmũ'ũn.

⁵⁹Tikmũ'ũn nũn, 'ãmnĩy te 7 nõg 'ĩhã' nũn, 'Iyamet pet ha' nũn, nũy 'ũk-tok pit yãy xax xak kutõgnãg, tu' xuxet'ax mĩy putup Yakanit, 'ũtak 'ãxet'ax hã xanãp-tup,

⁶⁰pãyã' tut tep-tup nõg, tu: —'Ãmhok, kaxĩy hok! 'Ãte' xuxet'ax mĩy'ax yãy xe'e tu Yoãm. Kaxĩy.

⁶¹Ha tikmũ'ũn te: —Putep xuktux? Yoãm te xĩy? 'Ãxape 'ũm 'ãxet'ax Yoãm? 'Ap xip'ah. Teptu' xuxet'ax mĩy putup Yoãm? 'Ũ 'ũm te nõ Yoãm? Kaxĩy.

⁶²Tu' yĩm xix, pu Yakanit tek-tok 'ãxet'ax yũmmũgã',

⁶³ha Yakanit kax'ãmi putup, yĩy tik 'ũm te tappet tu' hõm, xix tappet kup, ha Yakanit kax'ãmi', hu: “'Ũxuxet'ax pi' Yoãm.” Kaxĩy. Ha tikmũ'ũn kuxa te' yẽy.

⁶⁴Hãpxip 'ohnãg 'ĩhã Yakanit yõyxõg pu'uk, tu hãm'ãktux, tu Topa max 'ãktux, hu: —'Ũmax Topah. Kaxĩy.

⁶⁵Ha tikmũ'ũn te Yakanit pet tu' yĩmap hã' pip, tu kuxãnõg, tu tikmũ'ũn pu' xuktux, tu Yonex yõg hãm xanep tu tikmũ'ũn pip xop pu' xuktux, ha' xohix te nõmhã yũmmũg,

⁶⁶hu' kuxa te' yẽy, tu hãmpe'paxex, hu: —Kakxop xe'e', tu' tuk kux, 'ĩhã tik xexka putup. Kaxĩy. Yã Topa te nõm ka'ogãhã', tu nũ mũtik tihi'.

⁶⁷Ha' tak Yakanit te Topa Koxuk hã nũ' xip, tu Topa pupi hãm'ãktux, hu:

⁶⁸—'Ãpu yũmũ'ãte Topa max 'ãktux, yã 'Iyaet yõg Topa max, tu' nũn, nũy yãy yõg tikmũ'ũn mõy pu mõg,

⁶⁹tu tik xe'ẽgnãg yãykutnãhã', tu nũ' kutnãhã', ha' ka'ok, hamũn yã mõnãxop Namix hã mõkputox, tu yũmũg yõg tikmũ'ũn mõy gãy xop kopah, 'ũmõg.

⁷⁰Hõmã, hãmyãxatamuk xohix 'ĩhã' Topa te tik max xop yĩymõgãtux, puyĩy yãy pupi hãm'ãktux, pũyĩy mõnãyxop pu hãm'ãktux, tu Topa te' mõy putup 'ãktux,

⁷¹tu Topa te hãm'ãktux xex 'ãktux, hu: Topa te 'ãmõy putup gãy xop kopah, nõm xop te 'ãxop putup nõg. Kaxĩy.

⁷²Topa te mõnãyxop kuxa ka', tu yãy yõg hãm'ãktux xex, tu' pa'ax max xutĩgãhã',

⁷³tu mõnãyxop hittap 'Amanãm mũtik hãm'ãktux, tu nõm pu hãm'ãktux xex, yã yãy 'ãxet'ax hã hãm'ãktux xex,

⁷⁴nũy gãyxop kopa yũmũg mõy, pu Topa keppa yũmũk pip, nũy 'ãktettex, nũy Topa pu hãpxopmã', tu' yĩpkutuk 'ohnãg,

⁷⁵'ũyĩy hãmyok mĩy, 'ũyĩy tu max xe'ẽgnãg, Topa putuk, yũmũg hi'ax tox hã yũmũg max, mõg kuma' mõg.

⁷⁶Ha 'ãmũn, xõnnũ', 'ãxuxet'ax nõy mĩy putup, hu: Topa xe'ẽgnãg pupi hãm'ãktux'ax. Kaxĩy. Xate Topa keppa 'ãmõg, nũy 'ũyõg putat max mĩy,

⁷⁷nũy yõg tikmũ'ũn pu hãm'ãktux, hu: “Topa te 'ãkuxa kummuk xit, nũy kuxa max tat 'ũyãnãn tu', tu 'õg kummuk mĩy'ax xaxogãp-tup, pu tu kux.”