Luka 1:48-77

⁴⁸bani wu bulozhɔ we wʼa wuyɛ tirige ge, wʼa wu ɲii taha wu na. Li wii, na co nimɛ na, shi we wʼa ma ge, wu bɛɛri na ba nɛ pyi duba pya,

⁴⁹bani Se Bɛɛri Fɔɔ Kilɛ ya kagbɔɔ pye nɛ mu, wu mɛgɛ ki ɲɛ fɛɛfɛɛ.

⁵⁰Wʼa ɲuŋɔ ɲaari wu ɲìi fyaara sipyii na, fo na shɛ nɔ pu shi nibama wu bɛɛri na.

⁵¹Wʼa sefɛɛrɛ keree pye ni wu keye ni, na tabaara fungɔnyɔ caaga.

⁵²Wʼa fanhafɛɛ tirige na laha pu saanra korogoo na, pii pʼa tigi ge, na pee yirige.

⁵³Wʼa xuugo fɛɛ tin yalijeŋɛɛ na, na lafɛɛ kewaya wuu yaha kari.

⁵⁴Wʼa wu kapyebye Izirayɛli wu tɛgɛ. A wu funŋɔ di do ni wuyɛ pyaa ɲiɲaara keree ki ni

⁵⁵Ibirayima ni wu kadugo ki shizhaa na fo gbee ma na jo, ba wʼa bi ɲɔmɛɛ li lɔ wù sefɛlɛɛ pu mu wɛ.»

⁵⁶A Mariyama di gori Elizabɛti yíri, na yeye taanri shishiin pye. Lee kadugo na na guri kari wu puga.

⁵⁷Elizabɛti tigiduun ya pa nɔ ge, a wu funana se.

⁵⁸Ba wu tiinɲii ni wu cebooloo pʼa logo na Kafɔɔ Kilɛ ya wu ɲiɲaara ti pɛlɛ wu shizhaa na wɛ, na binnɛ funŋɔ tàan ni wu ni.

⁵⁹Pya wu cazege caŋa gbarataanri wogo, a pʼi ba di ba wu cekɔɔnrɔ pye. Pu funŋɔ bye pʼi wu to Zakari mɛgɛ le wu na,

⁶⁰ga, a nufɔɔ wu jo na: «Ahayi, wu mɛgɛ ki da le Yohana.»

⁶¹A pʼi wu pye na: «Ga mu sipya wa shishiin mɛgɛ di wa mu-i dɛ?»

⁶²A pʼi pya wu to wu yege ni ɲaha shɛshɛɛrɛ ni, na wu funŋɔ wa wu mɛgɛ kekɛ le pya wu na wɛ?

⁶³A Zakari di walaa sha pu mu, na yi ka wu na na: «Wu mɛgɛ ki wa Yohana.» A lʼi pu bɛɛri fo.

⁶⁴Taapile ni a Zakari ɲɔ kʼi mugi, a wu já na yu, na Kilɛ sɔ.

⁶⁵A pu tiinɲii pu bɛɛri di fya. Sipyii pu bi lee nibyii le yu Zhude faaboboyo fiige ki bɛɛri ni.

⁶⁶Yi logovɛɛ bɛɛri bi pu funyɔ shaa ni kii keree kii ni, a pʼi jo: «We pya we na ba bye ɲaha wɛ?» Bani Kafɔɔ Kilɛ wo sefɛɛrɛ ti bye wu na.

⁶⁷Wee tuun wu ni a pya wu to Zakari di ɲi Fɛfɛɛrɛ Munaa na. A wu kapaŋaa jo na:

⁶⁸«Kafɔɔ Izirayɛli wo Kilɛ we wʼa sɔni, bani wʼa wu ɲii taha wu sipyii pu na, na pu ɲuŋɔ wolo.

⁶⁹Wʼa Shɔvɔɔ baraga wo yirige wèe mu na foro wu kapyebye Dawuda shi wu ni.

⁷⁰Wu bi wee kaa jo fo taatuunnɔ ni wu tudunmɔɔ fɛfɛɛrɛ wuu pu ɲɔ ni,

⁷¹na wu na ba wèe tánha wù pɛɛn na, na wù shɔ na wù wolo wù kɔvɛɛ bɛɛri keŋɛ ni,

⁷²na wu ɲiɲaara keree ɲɔ fa wù sefɛlɛɛ pu shizhaa na, na wu fungɔngɔ yaha wu fɛfɛɛrɛ ɲɔmɛɛ li na.

⁷³Wu bi kàa wù sefɛlɛ Ibirayima mu,

⁷⁴na wu na ba wù shɔ wù pɛɛn na, kɔnhɔ wù lowagaa wuu di da labye pyi wu mu,

⁷⁵wù bye fɛfɛɛrɛ wuu, nidiimɛɛ wu ɲaha tàan wù shi wu caŋa ɲɛhɛɛ ki bɛɛri ni.

⁷⁶Mu bɛ na pya, ma na ba yiri Kilɛ-gbɔtabaaga tudunmɔ, bani ma na ba ɲaari Kafɔɔ ɲahagbaa na, na wu korogoo ki yari.

⁷⁷Ma na ba li shɛ wu sipyii pu na na wu na ba ɲuwuuro kan pu mu, bani pu jurumu wʼa yafa pu mu