LUUKA 1:48-77

⁴⁸haali/ a’di ki hil monyc̱a’b piti jin hatha nyarany c̱iŋkinam piti ’ko’d mo. Haali/ hili mo mo ma. ’Peni shwane/ mo tani aris ’kwani ma nyaḵum yil mo mini yuḵ aha/ gway ki a’di jin ’boru mii mo be.

⁴⁹Haali/ a’di jin ta gi mom’bi’th mo tani miiki’da dhan to jin eḵki’d e aha/ mo, dhali gway piti ḵogu mo be.

⁵⁰Dhali momiimiim piti di’d ap̱o/ uni gwansan kun ḵo/ a’di mo, ’peni uni gun tana nyaḵum yil ka nyaḵum yil mo be.

⁵¹A’di ṯor ’bi’th piti ka bim piti mo be. A’di ḵwa/ki uni gun dhu is ki ca mo e gwalal buni kun kuluma uni eya dum buni mo be.

⁵²A’di ki thul uni gun ta gi ’bi’th ka ’cesh mo ’pena ḵursin tap̱am buni mo. Dhali a’di ki dhu uni gwansan ki ca mo kun hatha ’ko ’ko’d mo be.

⁵³A’di ki ’tu’d uni gun ’kosha ṯe/ mo ki tom ’boron mo, dhali uni kun ta pa ki pa mo tani dhukina a’di ’pen bwa ’te/ mo be.

⁵⁴A’di woṯẖki c̱iŋkinam piti ka Israyiil mo, mmoka momiimiim piti e mo be,

⁵⁵me’d gwo jin okina a’di ibabam bana mo be, eya Ibrahiim dhali iya/m piti ki sule/ mo.

⁵⁶Dhala Mariyam c̱a’bki’d mo nyaḵki a’di me’da ppe ’kup̱i kwara mo dhali doḵ pam piti ka nyaŋ’ko’d mo be.

⁵⁷Dhali mo p̱u’dki’d mo goma Ilisabaaṯ mmodho’th mo be dhali a’di ki dhodha ’ci jin ta ya/ mo.

⁵⁸Dhali imannyaḵ ’kom piti dhala bas piti ciḵki gwo ki Tap̱a ṯorki dhan miim piti e a’di yim mo dhali uni ’kunykina bwa mo nyaḵka yim mo be.

⁵⁹Dhali ka cim ’koni pekwara mo tani uni p̱u’dkin mo mmo’ciṯẖa/ ’ciya munyjal yis mo, dhali uni mini ’taki yer a’di gway ka Sakariyya ’ko’di gway gi com mo,

⁶⁰hili kum piti o gwo mo ki: Yisa wakana. A’di minu yuḵ gway ka Yohaan mo be.

⁶¹Dhali uni o a’di yim gwo mo ki: Abas piniŋ kamu/ yisa yuḵu ki gway gi wakan mo be.

⁶²Dhali uni c̱i a’di jamas mii mo gom com mo mmo/o ki a’di minu yuḵ kata mo?

⁶³Dhali a’di doṯki uni cwam ba’d is mo jin gwaju ka ’diŋkilan dham mo mmo’kwar to mo dhali a’di ’kwarki’d ki: Gway piti ka Yohaan mo be. Dhali uni ’baar mo merkin mo be.

⁶⁴Dhali ki jahanne/ ’twam piti ḵa’dki’d mo dhala le’d piti ’cuḵki’d mo dhali a’di oki gwo mo mmo’bora Arumgimis bwa i is mo be.

⁶⁵Dhali moŋḵo/ is p̱u’dki’d ap̱owa ris imannyaḵ ’kom buni mo. Dhali aris to gwansan ’kokunu mo mmo/o ki lala’th mo e bampa/ ’baar mo gi paŋ ’kuwosh gi Pa Yahuudiyya mo be.

⁶⁶Dhali aris uni kun ciḵki uni mo tani dhuki uni eya dum buni mo dhali o gwo mo ki: A’ci yan midi ta ata mo? Haali/ me’d gi Tap̱a di’d e a’di mo be.

⁶⁷Dhali ababam piti ka Sakariyya ’tu’dkunu mo ki Shi/in Dheleladhelel mo dhali o gwo is mo mmo/o ki:

⁶⁸Mom’bor mii e Tap̱a Arumgimis gi ’Kwani ma Israyiil mo, haali/ a’di yayi’d mo mmobuṯ mo dhali mmowan ’kwanim piti ’ba/ mo be.

⁶⁹Dhali a’di ki ’de’k ce gi mowoṯẖ gom ana mo, e gu’b gi c̱iŋkinam piti ka Dawuu’d mo.

⁷⁰Me’d gwo jin okina a’di ki ’twa/ gi imanc̱i gwo ma Arumgimis kadhamo/ mo kun ḵogu mo ’peni kadhamo/ mo,

⁷¹ki ana minu woṯẖ mo ’peni ’kup̱ bana mo, dhali ’peni me’d ga ris uni gun shi/i ana i e mo,

⁷²mmo’baar momiimiim piti gun onu is mo gom ibabam bana mo, dhali mmoka gwom piti e jin gamu me’d jin ḵogu mo.

⁷³Gwo yan jin ona a’di is jin thula a’di ababam bana ka Ibrahiim me’da p̱o/ mo,

⁷⁴mmoc̱i ana mony’cuḵ mo ’peni me’d gi uni gun ta ’kup̱ ki ana mo, ki ana mina mii a’di to mo ki dar gi moŋḵo/ is mo be,

⁷⁵e mo gi ḵo/uwa ḵo/ mo dhali e mo ma ḵar/e mo ibwambori a’di mo ka cimi ’baar mo gi moŋ’koki/em bana mo.

⁷⁶Dhali /e jin tana ’ci mo, /e minu yuḵ ka manc̱i gwo ma Arumgimis jin Cayaa/ e ki Ca mo, haali/ /e mini ya ibwambori Tap̱a mo dhali thoson a’di bway mo be,

⁷⁷mmoc̱i mo jin mishu mowoṯẖ bana mo e ’kwanim piti mo, dhali e modhal miinthus buni ’pen mo be.