Luk 1:48-77

⁴⁸bawo owosɛ kəgbal fɔr nnɔ ina, wəcar kɔn wəfəfər iyi mɔ. Ɛy, kəyɛfɛ ndɛkəl haŋ tɛm fəp, afum ŋande ŋac-lok’im a pəmbɔt’im,

⁴⁹bawo Wəka fənɔntər nwɛ ɔyɔn’em mes mɔpɔŋ mɔ, tewe tɔn teŋcemp!

⁵⁰Kəbɔt ka Kanu amera kəŋyɛfɛ dɛtɛmp kɔ dɛtɛmp akɔ ŋaleləs ki mɔ.

⁵¹Kəmentər fənɔntər fa kəca kɔn: kɔ kəsaməsər afum akɔ ŋanabɛk bəkəc mɔ;

⁵²kɔ kəŋgbal abɛ apɔŋ dɛbɛ daŋan kɔ kəŋcəmbər afəfər kiriŋ.

⁵³Kɔ kəsɔŋɛ kənɛmbərɛ pətɔt aŋɛ dor dɛnayɔ mɔ; kɔ kəmbɛləs akɔ ŋanayɔ daka mɔ waca wɔsɔkər.

⁵⁴Kɔ kənder kədemar aka Yisrayel, amarəs ɔn: kəmpələrnɛ fɛ kəmentər dobotu amera dɔn

⁵⁵a Abraham kɔ yuruya yɔn ta doru o doru —pəmɔ tɔkɔ ɛnaloku ti atem asu mɔ.»

⁵⁶Kɔ Mari ŋayi kɔ Elisabɛt haŋ yof maas, k’olukus nde ndɔrɔn.

⁵⁷Kɔ tɛm tɛmbəp ntɛ pənamar Elisabɛt pəkom mɔ, k’oŋkom wan wərkun.

⁵⁸Andɛ ɔn kɔ akomɛnɛ ɔn ŋane, a Kanu kəntorɛ kɔ pəforu disrɛ, kɔ pəmbɔt ŋa fəp faŋan.

⁵⁹Tataka ta camət-maas ta kəkom kɔn, kɔ ŋander kədekəŋc ka wan, kɔ ŋasɔŋɛnɛ kɔ tewe ta kas Yakariya.

⁶⁰Mba kɔ kɛrɛ ɛlɛk moloku, k’oloku: «Ala, Saŋ sɔ andewe kɔ.»

⁶¹Mba afum ŋaloku kɔ: «Ali fum eyi fɛ dokom dam nwɛ aŋwe tewe tantɛ mɔ.»

⁶²Kɔ afum ŋayɛfɛ kəyifətɛ kas waca, tewe ta wan ntɛ ɛfaŋ pawe kɔ mɔ.

⁶³Kɔ Yakariya ewe tabam, k’eŋcic: «Saŋ sɔ andewe kɔ.» Kɔ pəŋciyanɛ afum fəp.

⁶⁴Kɔ kusu kɔn kəmepɛ katina, kɔ temer tɔn tɛyɛfɛ; k’ɛyɛfɛ kəkor-koru ka Kanu.

⁶⁵Kɔ kənesɛ kəyi andɛ ɔn fəp, kɔ mes mamɔkɔ mɛmbaŋ atɔf ŋa Yude fəp, pac-yifətɛnɛ mi.

⁶⁶Nwɛ o nwɛ ene pac-loku mi, teŋyi kɔ dɛbəkəc, ŋac-yifnɛ: «Ake wan wəkakɔ endeyɔnɛ oŋ-ɛ?» Kɔ fənɔntər fa Kanu Kəpɔŋ fəŋcəmɛ kɔ darəŋ.

⁶⁷K’Amera Ŋecempi ŋa Kanu ŋɛlarɛ Yakariya papa ka Saŋ, k’ɛyɛfɛ kədəŋk moloku mmɛ Kanu kənasɔŋ kɔ kəloku mɔ, pəc-loku:

⁶⁸«Iŋkor-kor’əm məna Kanu Kəpɔŋ, Kanu ka aka Yisrayel, bawo kənder kəmar afum ɔn, kɔ kəmbaŋ ŋa.

⁶⁹Kəwurɛ su wəyac wəpɔŋ, dokom da Dawuda, wəmarəs kɔn.

⁷⁰—Itɔ Kanu kənalok-lokɛ cusu ca adəŋk ɔn acempi kəyɛfɛ ntɛ pənawon mɔ—

⁷¹kənasɔŋ su temer kədebaŋ su aterɛnɛ asu dəwaca kɔ kətam ka akɔ ŋantɔfaŋɛ su pətɔt mɔ.

⁷²Itɔ kənamentərɛ amera ŋobotu ŋa ki atem asu, kɔ kəŋcɛm-cɛmnɛ kəcaŋəs kəcempi kəŋan kəyi tes tin.

⁷³Pəmɔ kədɛrəm kaŋkɔ Kanu kənadɛrmɛ Abraham wətem kosu, itɔ ɛlasɛ su ki,

⁷⁴a kɔ kəndebaŋ su aterɛnɛ asu dəwaca-ɛ, kəndesɔŋɛ su tɛm tatɔkɔ pac-kor-koru kɔ bəkəc yoforu disrɛ,

⁷⁵ntɛ tɔŋsɔŋɛ pakor-koru kɔ decempi kɔ dolompu disrɛ fɔr yɔn kiriŋ kiyi kosu doru fəp mɔ.

⁷⁶Kɔ məna wan kem, wədəŋk wəka Wəbɛ wəka dareŋc ɔ andew’am. Məna endeyi Wəbɛ kiriŋ, məc-lompəs səpɔ sɔn.

⁷⁷Məkɔ məsɔŋɛ afum ɔn kəcərɛ a Kanu kənder kədeyac ŋa, kəŋaŋnɛnɛ ŋa kiciya kəŋan.