Luka 1:48-77

⁴⁸Dau Dilava nimo iviholinu. Isito keu di huhuanu. Nova komo ata bahataeabuna loui kosea, ‘Dilavau keate ke hoesehavonu.’

⁴⁹Kosealemo Kosive ivi balugate keu dahoe vaveve baluga vanu. Ivive keu tumute.

⁵⁰Katealemo oleuoleu Dilava vabuhavoge uvuvena abuemo ui. Ige auna vani bahata kebiata eseabeta tedaevegei.

⁵¹Ige adave keu vaveve negote vanu. Isime auna oleuoleu abu ebika tabagevaho huhuimale kebia huhuihuhui bahata malei evihai.

⁵²Keu vatae kosive baluga kebia tatolemagevenu. Isito au ata uvevete kebia tabagevenu.

⁵³Keu lovie dua ata vaete kebia ovege uniabeu hanilahalu. Isito ata kunaite kebia iovege abu ada unahala tilu.

⁵⁴Dilavau au ata Iselala tedaevenu. Au kebia haleveholisito kebiaho uvuale kemo au tedaevenu.

⁵⁵Kosealemo Dilavau subuta nahie buluveho lounu. Isi Ebalahamuho loui avoe, ‘A valada isi a ese kebia dana vani bahata huhuevei hoesegevegei.’”

⁵⁶Meliu hoto kateale louime Elisabeti oe uale bata abuita igaetaeau uoholisege au halei au oe tinu.

⁵⁷Vani mole Elisabeti eseu uveve vaniu lohoge moveu ua.

⁵⁸Moveu uge valadaeabeau isi haokuvuiabeau ke evisi vahaeho balugalu. Abu hilokage Dilavaike keate ke huhuaime ese ke mai ominu.

⁵⁹Bula igaeu uoholige haokuvuiabeau lohoale mo ke hoesehavoi vudive vate etulei isiviale ataeau kemo hilokage keu Ebalahamu valadae ese. Kebia vaveveu kateanu. Vateve etulege uoholige abu isiviai mamave Sekalaia ivita ivihai.

⁶⁰Isito neinaveu loui avoe, “Kate halevave. Iviveike Dioni.”

⁶¹Kateai louge abu keate keho loui avoe, “Au a valada kemo ivi katealebeu uoholinu.”

⁶²Isi kateaime abu ada unahata deiada mamave haivuma. Isiviale mamaveu ivi oleteale mo ke ivihai.

⁶³Kateige au adamo beba mai omiveve tovetove vanu. Ige abu beba mai omige au hisaliai avoe, “Iviveike Dioni.” Kateige abu ke elehai viko balugalu.

⁶⁴Kateisege solekavesite Dilavau Sekalaia ai alavoge au hotoai Dilava hoesehavonu.

⁶⁵Ige haokuvuiabeau ke elehai vabu balugalu. Ige ataeau Diudia tanae uale keau bahata hoto ke evilu.

⁶⁶Ige ata bahataeau ke evisi huhulahai avoe, “Ese kena bae vadeai.” Isime abu hilokage Kosive adae vuvuneu ese kemo ua.

⁶⁷Dioni mama Sekalaia keu Dilava hoesehavosege Munana Tumuteu uvuvemo holomage au gabie velemaveve hoto lounu.

⁶⁸Isi loui avoe, “Nahi nahie Kosive hoesehavoi. Keu Iselala ata nahie lohoale isiviai nahie vatetumumo nahie tedaevei malevei.

⁶⁹Kosealemo keu nova au esemu Deividi valadamo nahie toelamo nahie maleveveve ata negote ebagemanu.

⁷⁰Subuta mole Dilavau hoto kateale loui au beloveta tumute kebia namigevenu.

⁷¹Au louale auna nahie aiogevemale ata kebia isi nahiho itumulahamale ata kebia adamo nahie tedaevei.

⁷²Au subuta nahie buluveho loui mamoale ke auna huhuai nahiho uvuai nahie tedaevei.

⁷³Ke nahate au subuta nahie buluve Ebalahamu keho hoto tumute lounu.

⁷⁴Au hoto tumute louale kemo auna nahie aiogevemale kebia adamo nahie tedaevei. Auna nahie tedaevege nahiabuna vabuholisito lovive vai.

⁷⁵Isime ata tumute holisi vani bahata Kosive nimo vaveve inutolotolote vagei. Dilavau hoto loualeu kemo kateai ua.

⁷⁶Iale di mo, ataeabuna ahoe loui kosea, ‘Dilavau ehue umale ke beloveta alike.’ Iale ana vasohuta tai Kosive humaha elulumasege auna bae lohoi.

⁷⁷Ana bae Kosiveu toelamo au ata maleveve hoto louge abuna bae abu vaveve toela halevege Dilavana kebia toela ulihai.