Luk 1:48-77

⁴⁸məto-inu io pətan iolwək əm rəhan itəm io nat əpnapɨn əm, məto nɨkin tatəht io. Kən roiu ne matuwɨn, netəmim rafin okotən məmə Uhgɨn təmol təwɨr kəm io;

⁴⁹məto-inu Uhgɨn u nəsanənən rəhan in iahgin, in təmol nat pɨspɨs mɨn təwɨr pɨk agɨn kəm io, kən nərgɨn in tasim.

⁵⁰Kən in tətasəkitun netəm mɨn u itəm koatɨsiai-in in, inu netəm rəha noanol mɨn aupən ikɨn mətoarus-pa itəm rəha noanol mɨn kəsotaiirən əh.

⁵¹In təmol nat pɨspɨs mɨn e nəsanənən e nelmɨn. In təmahl-iarəp netəm kotausit e nətəlɨgən rəhalat.

⁵²In təmos-iəhau iərəmərə mɨn e rəhalat nərəmərəən, kən in təmɨləs-ipər netəm mɨn u rəhalat nətəlɨgən teiuaiu.

⁵³Netəm itəm nəumɨs tatus ilat, in tətagwən ilat e nagwənən itəm təwɨr, kən netəm rəhalat nautə tepət, in tətahl-iarəp ilat kən nat tɨkə e nelmɨlat.

⁵⁴Uhgɨn təmasitu e noanol mɨn rəha Isrel u rəhan iolwək mɨn, kən təməsaluinən məmə otasəkitun

⁵⁵Epraham ne rəhan mɨn noanol, matuwɨn matuwɨn namnun tɨkə.”

⁵⁶Kən Meri tətatɨg ilau Elisapet mətoarus-pən məwɨg kɨsɨl, kən in təmɨtəlɨg-pən mɨn əpəh iman ikɨn.

⁵⁷Kən nian ətuatɨp rəha Elisapet tɨnuwa məmə otemək lan, kən təmɨləs nətɨn iərman.

⁵⁸Kən netəmim itəm kotatɨg iuəhkɨr ron ne rəhan mɨn noanol, kəmotəto namnusən əh məmə Iərəmərə təmasəkitun mol təwɨr pɨk kəm in nəhlan, kən ilat kəmotuwa motol kitiəh ilat min məmə okotagien kələh.

⁵⁹Nian suakəku əh tɨnos nian ilat eit, kən ilat kəmotuwa məmə okotəhg-ipən. Kən iuəhkɨr kotaun-in nərgɨn məmə iahuni rəhan tata Sekaraea,

⁶⁰məto rəhan mama tən məmə, “Kəpə. Okaun-in nərgɨn u məmə Jon.”

⁶¹Kən ilat kəmotən kəm in məmə, “?Tahro? Rəham kit noanol tɨkə itəm kotaun-in nərgɨn əh Jon.”

⁶²Kən kəmoatəghat e noanelmɨlat moatətapəh o Sekaraea məmə in tolkeike məmə otaun-in-pən nərgɨn məmə pah.

⁶³Kən in təmətapəh o nat kit məmə in otəte rəkɨs nat kit lan, kən təməte-pən məmə, “Nərgɨn u Jon.” Nian kəmotehm, narmɨlat təmiwɨg pɨk ron.

⁶⁴Kən e nian əm əh, namən tɨnəg-ətuatɨp, kən tɨnatəghat matənwiwi Uhgɨn.

⁶⁵Kən ilat rafin itəm kotatɨg iuəhkɨr kəmotəgɨn. Kən netəmim kəmotəghat-in natɨmnat mɨn əh tɨtəlau ikɨn mɨn rafin e narɨt mɨn nɨtən Jutia.

⁶⁶Kən netəmim rafin itəm kəmotəto namnusən əh, kən kəmoatətəlɨg-in əm, kəmoatətapəh məmə, “?Suakəku əh, otuwa etəmim naka?” Kəmoatən min-nulan məto-inu kəmotəplan əm məmə nəsanənən rəha Iərəmərə tətatɨg lan.

⁶⁷Kən Narmɨn Rəha Uhgɨn təmər e nɨki Sekaraea, tata rəha Jon, kən in təmən-iarəp nəghatən itəm Uhgɨn təmos-ipən kəm in. Kən təmən min-nulan məmə,

⁶⁸“Pəs kotənwiwi Iərəmərə, u Uhgɨn rəha netəm Isrel, məto-inu in təmuwa məmə otasitu e rəhan mɨn netəmim, kən təməmki-rəkɨs ilat e nelmɨ tɨkɨmɨr mɨn rəhalat.

⁶⁹In təmɨləs-ipər iosmegəh təsanən itəm otosmegəh kitat, in təmɨsɨ-pən e noanol rəha iolwək rəhan Tefɨt.

⁷⁰Kən in tahmen-pən əm e nəghatən u itəm Uhgɨn tɨnəmən rəkɨs kəm kitat e nəghatən rəha ien mɨn rəhan aupən.

⁷¹In tɨnəmən-iəkɨs rəkɨs məmə otosmegəh kitat o tɨkɨmɨr mɨn rəhatat ne netəmim rafin itəm kotetəhau kitat.

⁷²In təmɨləs-ipər iosmegəh əh məmə otasəkitun pipi rat mɨn rəhatat, kən təsaluinən rəhan nəghatən itəm in atɨp təmən e rəhan nəniəkɨsən rəha nasituən,

⁷³inu nəniəkɨsən itəm təmən kəm pipi rat Epraham.

⁷⁴In təmɨləs-ipər iosmegəh əh məmə otosmegəh kitat, kən mɨləs-irəkɨs kitat e nelmɨ tɨkɨmɨr mɨn rəhatat, məmə nian mɨn rafin e nəmegəhən rəhatat, kitat kotɨtun nol wəkən rəhan e nɨganəmtɨ Uhgɨn, kən məsotəgɨnən,

⁷⁵kən kitat okotasim, kən nəmegəhən rəhatat otətuatɨp e nian mɨn rafin.

⁷⁶“Kən ik, nətɨk, okaun-in ik məmə ien rəha Uhgɨn Ilɨs Agɨn, məto-inu ik onakaupən-in Iərəmərə məmə onəkol əpen-əpenə e rəhan suatɨp.

⁷⁷Ik onakən-iarəp kəm rəhan mɨn netəmim məmə Uhgɨn otosmegəh ilat nian in otafəl rəkɨs rəhalat təfagə rat mɨn.