SAN LUCAS 19:4-12

⁴ꞌBa meni tsangatsanga titjunre xutankjiun ꞌba tsijun jngu ya xi sicómoro ꞌmi, tuxi skueni Jesús, ngatꞌa tjinnere nga kio kjuaꞌa.

⁵ꞌBa kionga Jesús je tifaꞌa kio, kiskutsejennkꞌa ña kjiꞌa xutabiu, ꞌba kitsure: —Zaqueo, tetukajenfani, ngatꞌa niꞌyari tjinnere nga sikjaꞌayaa̱ ngandaꞌe.

⁶ꞌBa Zaqueo taꞌa ꞌetukajen ꞌba ꞌñu tsja tjinre nga kiskjebetjo Jesús ndaba.

⁷Tunga kionga xuta tsabe kibi, ngatsiꞌi ꞌetutsꞌinre nga kitsikꞌaxki Jesús, ꞌba kitsure xinkjin: —Nga ndaba jngu xuta je kitsikjaꞌaya.

⁸Tunga Zaqueo tsakasen nduju nga jako Naꞌenna, ꞌba kitsure: —Naꞌen. Masen sja_ra̱ xuta ni̱ma̱ mé= xi tjinna̱. ꞌBa tsa tjin xi je kitsaꞌentꞌa_ra̱ cheje, ñujun kaꞌa xi ꞌba kjiꞌi sja ngani_ra̱.

⁹ꞌBa Jesús kitsure: —Xi naire niꞌyabi je ꞌetukajin jere ngandaꞌe ngatꞌa je ꞌyare nga ntjere Abraham.

¹⁰Ngatꞌa Kiꞌndire Xuta xiꞌiun jaꞌekangisjai ꞌba jaꞌetsikꞌangi xi je kichaja tsakaiñu.

¹¹ꞌBa kionga xuta inyaminya ñojon mé= xi tinchja Jesús, inyatsikjaꞌetsjen nga je mején ku̱atsejen jótsaꞌen Naꞌenchana kuatexuma; ngatꞌa Jesús je tifechu tiña naxinanda Jerusalén. Kui kjuañu, kui ꞌejñani kjuakusunbi.

¹²ꞌBa kitsu: —Tsikꞌejña jngu xuta xi ntjere rey xi kjin kiji kjaꞌe nangi, tuxi rey sꞌianni ꞌba jaskan kjuaꞌe ngani.