Lukas 19:4-12

⁴A gafu ta kumanen a bumilag i Sakyo ta unnan na angen ni Hesus, a imunek ta kayu, petta maidungan na i Hesus ta pagtalib na.

⁵A ta pakadatang ni Hesus ta agyan na kayu en a nagtayuk, a tinangad na i Sakyo, a binaran na. “Sakyo, alag mu, te dumagut kan, te mappya ta magdulotak ta bali men ta arawin,” kunna.

⁶A alistu hapa dumagut i Sakyo, a matalak hapa ta pagdulot ni Hesus ta bali na en.

⁷Ammi ya kadwan kiden tolay nga nangita a linibakan da i Hesus, gafu ta umange nagdulot ta bali na dulay na tolay.

⁸A ta pagbida nig Hesus ikid ni Sakyo ta bali na en a nagtayuk i Sakyo, a nebosag na hapa ya pagbabawi na. “Afu, igadwak sangaw ta ayanin ya pobre kiden ta ngamin kwak. A am itta ya dinarogas ku ta pagpaga da ta bwis da a itolik hala sangaw tekid ya mamengappat ta kaddu na napasurok ku ta bwis da,” kunna te Hesus.

⁹A ya tabbag hapa ni Hesus tentu a “Iko mantu ya takday kagitta ni mina Abraham, te mangurug kan, a ayanin mantu ya pakesipat muy ikid na anak muy kiden ta pangikerutan na Namaratu.

¹⁰Te yen hapa ya imeyan ku ta isin petta apagan ku ya metawag, petta ikerutan ku,” kunna hapa ni Hesus tentu.

¹¹A gafu ta bida ni Hesus te Sakyo a pahig na kadwan kiden nakadangag ta tanagay na ya pagpatayuk ni Hesus ta gubyernu na Namaratu ta ili na Herusalem, te abikan na ya ili en, a amu da ta yen pagdulotan ni Hesusen. A yen ta nagbida i Hesus ta takwan na keangarigan tekid, petta pake amu da mina ya dumatang.

¹²“Itta ta idi ya naba-nang na tolay,” kunna, “a umange ta adayu na lugar, te yen ya enna pangalapan ta pagsaad na ta agyan na en, kapye na sangaw dumatang.