4ዬሱሳ ቤዓናው ኮዪዲ ኢ ቢያ ኦጊያስ ሲንꬄ ዎፂ ቢዲ ኢሲ ቦባ ሚꬃ ቦላ ኬዪስ።
5ዬሱሲ ሄ ቤሳ ጋኪሼ ꬎቁ ጊዲ ቤዒዲ፥ «ዛኪዮሳ፥ ሃቺ ታ ኔ ሶን ፔዓናው ቤሲያ ጊሾ ኤሌ ዎꬋ» ያጊስ።
6ኢ ኤሌሲ ዎꬊዲ ኡፋይሳን ዬሱሳ ሞኪስ።
7ሄ ቤሳን ዴዒያ ኣሳ ኡባይ ሄሳ ቤዒዲ፥ «ናጋራንቹዋ ሶ ጌሊዲ ሞኬታንው ሃኔስ» ያጊዲ ዙዙሚዶሶና።
8ጊዶሺን፥ ዛኪዮሲ ኤቂዲ ጎዳኮ፥ «ጎዳው፥ ሄኮ ታው ዴዒያ ሻሎ ኡባፌ ባጋ ማንቆታስ ኢማና። ኣሳፔ ኣይባካ ዎርዶን ባሌꬃዳ ኤኪዳባ ጊዲኮ ኦይዱ ኩሼ ዛራና» ያጊስ።
9ዬሱሲ ቃሲ፥ «ሃ ኡራይ ኣብራሃሜ ናዓ ጊዲዳ ጊሾ ሃቺ ኣቶቴꬃይ ሃ ሶ ዪስ።
10ኣሳ ናዓይ ዪዳይ ꬋዪዳይሳ ኮያናሳኔ ኣሻናሳ» ያጊስ።
11ኣሳይ ሄሳ ሲዒያ ዎዴ ዬሱሲ ዬሩሳላሜ ማታቲዳ ጊሾኔ ፆሳ ካዎቴꬃይ ሃዒ ማታራ ቆንጫና ዳኒዳ ጊሾ ኤንታው ሌሚሶ ኦዲስ።
12ሄሳ ጊሾ፥ ዬሱሲ፥ «ኢሲ ጊታ ኣሲ ዴዔይሲ ባው ካዎቴꬂ ኤኪዲ ያናው ሃራ ቢታ ቢስ።
ሉቃሳ 19
ሉቃሳ 19:4-12