LUK 19:4-12

⁴Sosu le Jisas siye ta'ame su, le soro ma'e iteroti iteye. Le me sesi hire ma'e Jisas siyeyei ne wiye. Jisas yo mai ape ma'e aiyeteye.

⁵Sosu Jisas me sesi ma'e henerai su, le me ape hire ma'e aute siyeye. Le le ma'e apou eiye, “Sakius, ne witane a'i itora. Ane wesi no ma'e ne mase aiwawe iroteyei ne iyei.”

⁶Le Jisas lo peri wanuwe su, le me ape witane a'i itorai. Le Jisas eriteyewe, wesi lo ma'e heneti.

⁷Lu taune tamo lai Jisas meni ape mase siyesawi su, lowe ai marepi toteteye. Lowe apou toteye. “Le meni luwaru a'i lo wesi ma'e fi. Yo seni luwaru a'i ne.” Lu 15:2

⁸Sosu Sakius peri lowe lo wanuwe su, le sine teiyewe, Jisas ma'e eiye, “Meni Owane, weiya! Wanure! Etiri werese ano ne, ane tewi erasi a'i lu taune ma'aru etiri ariye a'i ape mo aurowa. Ane lu taune tamo ma'aru ta'i areareye su, ane lowe ma'e etiri ma'aru hesiyo hesiyo si itiya'u tame auwei.” Kis 22:1; Nam 5:6-7

⁹Sosu Jisas le ma'e eiye, “Wanure! Pereye Owane Sitewi lai meni ape marepi hepene he'i a'i auwe. Meni ape sosu lu tewi werese lo, wesi sahe irosiya ape, Owane Sitewi lai lowe ma'e marepi hepene he'i auwe. Meni ape Abraham lo tote tawesiyei aiwawe a'i ne. Ap 16:31; Lu 13:16

¹⁰Ane, meni hire ma'e itorai ape, lu taune werese yo seni luwaru a'i ironamisiya ape, ane lai lowe ne siye nehiyei ne fai. Ane lowe siyeyei su, ane yo seni luwaru a'i lowe lo ani pamoweyei. Sosu ane lowe ma'e marepi hepene he'i a'i aurowa.” Lu 15:4; Jo 3:17; 1 Ti 1:15

¹¹Sosu a'i pe lu taune werese Jisas lo peri wanuwe su, Jisas lowe werese mase omo Jerusalem atahe a'i teiteye. Lu taune tomu ne'ese Jisas ne apou toteye, Jisas omo Jerusalem papu wiyei su, le meni owane wiyeme tutawe heneraiyei. Sosu le Owane Sitewi lo omo pani werese au noweinoweiyei. Ahowa, Jisas lowe ma'e peri anowe ta au te'eye.

¹²Le apou au te'eye, “Meni owane ta pani eyeri ma'e meni owane tutawe a'i heneraiyei ne fi. Meni ape meni owane tutawe a'i henerairowa su, le omo sitewi lo ma'e lu tamo au noweinoweirowa.