SAN JUAN 1:28-46

²⁸Kaín tíha mé tsíkónhen tí chjasin itꞌin Betábara tí nó tji̱to̱xi̱n ya̱on tóhe tí nta̱río Jordán tí kjuákꞌe chꞌín Juan kui̱ki̱te chojni.

²⁹A̱ ntá tí ya̱on chrꞌéxi̱n mé kꞌuíkon chꞌín Juan kíxin ó tjekui chꞌín Jesús. Ntá nixje̱he̱ chꞌán tí sín tsíkóchjina ntáchro chꞌán kíxin: ―Tsjehérá tí nkexro tjekui mé tí Kolélo kuènte Dios jehe chꞌán. Tíha mé tsjìinxín iji̱é chojni chjasintajni.

³⁰Janhan mé kꞌuéxrja̱nka kíxin tí iton tí janhan mé tsichréhe̱ ijnko nkexro a̱ntsí tꞌe̱to̱an, a̱ ntá janhan la kénhyó této̱an kíxin na̱xa̱ kohyana na jehe chꞌán la ó xráxín tjen chꞌán.

³¹Kja̱xin janhan na̱xa̱ chonhya nkexro tíha. A̱ ntá xra̱ ó kꞌuinka kjuakꞌé kuíki̱texián chojni ìnta̱ kíxin tí chojni nación Israel mé chrókjuátso̱anxín sín chꞌán ―ichro chꞌín Juan

³²Kjuintaxín ntáchro chꞌín Juan kíxin: ―Ó kꞌuíkua̱n kíxin tí Ncha̱kuen Dios mé kꞌuínkaji̱nxi̱n nkaya nka̱jní na éxí yóhe̱ ijnko kontóá kꞌuínkajin la ko kjuákꞌe va ntoí tí tjen chꞌán.

³³A̱ ntá janhan kja̱xin na̱xa̱ chonhya nkexro tíha. A̱ ntá tí nkexro kꞌue̱tua̱nna kíxin tsjakꞌé tsíki̱texián chojni ìnta̱ mé tsíchrónka chꞌán kíxin tí Ncha̱kuen Dios mé tsꞌinkajin tsjakꞌe ntoí tí tjen ijnko chojni na mé tsjatso̱anxián janhan kíxin tí nkexro a mé tsi̱ki̱texín chꞌán Ncha̱kuen Dios chojni.

³⁴A̱ ntá janhan jie mé ó kꞌuíkonxín kua̱n kíxin xi̱kaha kónhen tí jehe chꞌán, a̱ ntá xrja̱nkaxián kíxin táha mé Xje̱en Dios tíha ―mé xi̱kaha chrónka chꞌán.

³⁵Tí ya̱on chrꞌéxi̱n kjuákꞌe chꞌín Juan la ko iyó tí sín kꞌuájiko chꞌán,

³⁶a̱ ntá xrína̱hya kꞌuíkon chꞌán kꞌuátsínka chꞌín Jesús. Ntá ntáchro chꞌín Juan kíxin: ―Tsjehérá tí nkexro i mé tí Kolélo kuènte Dios ―ichro chꞌán.

³⁷Ntá kuínhin tí yóí sín kꞌuájiko chꞌín Juan na ntá sákjuíchréhe̱ sín tí chꞌín Jesús.

³⁸Ntá kuinkátjíá chꞌín Jesús kꞌuíkon chꞌán kíxin tinkáchréhe̱ sín ntá kjuanchankíhi chꞌán sín kíxin: ―¿Xá nkehe xritjéyárá? ―ichro chꞌán. Ntá ntáchro sín kíxin: ―Maestro, ¿xá nketí nchia itjen? ―ichro sín.

³⁹Ntá kjuáte̱he chꞌán ntáchro chꞌán kíxin: ―Ìntá sátsjini tsꞌikonrá nketí ―ichro chꞌán. Ntá kuinkáchréhe̱ sín chꞌán kꞌuíkon sín nketí nchia kjuákꞌe chꞌán ntá kꞌuéjóko sín chꞌán kuenté tí kónjín kíxin kjuíji sín ntiha como las cuatro kónjín.

⁴⁰A̱ ntá yóí sín tsíkinhin sín tí chrónka chꞌín Juan ntá sákjuíchréhe̱ sín tí chꞌín Jesús na mé ijnko mé itꞌin Andrés. Jehe chꞌán chónta chꞌán ijnko sa̱vé mé itꞌin Simón Pedro.

⁴¹Na ntá tuénxín tí chꞌín Andrés sákjuíkjeyá chꞌán tí sa̱vé chꞌán Simón. Ntá chénka chꞌán tí sa̱vé chꞌán kíxin: ―Ó kꞌuitjani tí nkexro Mesías ―ichro chꞌán. Tíha mé tꞌaxrjexín kíxin Cristo.

⁴²A̱ ntá chꞌín Andrés mé kui̱ka̱o chꞌán tí sa̱vé chꞌán Simón tí tjen chꞌín Jesús. Ntá chꞌín Jesús mé komá chꞌán tí chꞌín Simón ntáchro chꞌán kíxin: ―Jaha mé Simón, itꞌá mé itꞌin Jonás. Ntá jie si̱ntakꞌian Cefas ―ichro chꞌán. A̱ ntá tí palabra Cefas la ko tí palabra Pedro na mé yóí mé tꞌaxrjexín kíxin ixro̱ tíha.

⁴³A̱ ntá tí ya̱on chrꞌéxi̱n mé sáchrókjui chꞌín Jesús tí estado Galilea. Ntá kꞌuitja chꞌán tí chꞌín Felipe, na ntá ntáche chꞌán kíxin: ―Chréhé tí janhan ―ichro chꞌán.

⁴⁴A̱ ntá tí chꞌín Felipe mé chjasén chꞌán mé itꞌín Betsaida tí chjasén chꞌín Andrés la ko chꞌín Pedro.

⁴⁵Ntá tí chꞌín Felipe mé sákjuíkjeyá chꞌán tí chꞌín Natanael na ntá chénka chꞌán kíxin: ―Ó kꞌuitjani tí nkexro tsi éxí kꞌuéchrónka tí chꞌín Moisés tí tsíkjin chꞌán tí xroon chrónka tí nkehe kꞌue̱to̱an Dios. Kja̱xin tí sín kꞌuéchrónka tí itén Dios chrꞌéxi̱n mé kꞌuéchrónka sín kíxin itsi tí nkexro a. Na ntá ó kꞌuitjani chꞌán na mé jehe chꞌán mé itꞌin Jesús, la itꞌé mé itꞌin José, la mé chjasén chꞌán mé Nazaret ―ichro chꞌín Felipe.

⁴⁶A̱ ntá ntáchro chꞌín Natanael kíxin: ―¿Xá kjuánchí má chrókójína tí nkehe chrókꞌuaxrjexín tí chjasin Nazaret a? ―ichro chꞌán. Ntá kjuáte̱he chꞌín Felipe ntáchro chꞌán kíxin: ―Xrákiá tsꞌikuan ―ichro chꞌán.