Jone 1:28-46

²⁸Dutupa endaki Jotane omotena Joneme kaimbu pyakamaiyoo kateamo yuu Betani dokonya yaka lea.

²⁹Taita dopa pyoo Joneme baa kateasa Jisasa epeamo kandatala lao pituu, “Gotenya Sipisipi Yakane dokome yuunya endakali dupa pitakanya koo dupa kunanya nepenge dokona kanjepa!

³⁰Nambame akali doko kandao lao pituu, ‘Namba watao maitapyao epelyamo akali doko namabanya alyasale. Doko, namba namandengesa baa wamba katea-pyaana,’ leo.

³¹Nambame baa apipi lao kanja nayawaka doko, baa Isataele endakali dupa laitaka pyaanya nambame endakimi dupanya ipao kaimbu pyakamaiyona,” lea.

³²Joneme pii lamaiyoo lao pituu, “Sipitisa doko yaka maileo joo kaiti-kisa katao isa ipao baa-kisa peteamo kandeo.

³³Nambame baa kanja nayao katewaka doko, endakimi kaimbu pyakamaiya puu leamo Gote dokome namba langyoo, ‘Sipitisa doko ipao akali mende-kisa pititamo kandate. Akali dokome Oli Sipitisa dokome kaimbu pyakamaitana,’ lea.

³⁴Nambame akali doko kandatala baa Gotenya Ikiningi dokona lapuna,” Joneme lea.

³⁵Oo yongama Jone baa dee baanya akali disaipele dupanya lapoma-pipa dokonya awapa katea.

³⁶Baame Jisasa ipao peamo kandatala, “Gotenya Sipisipi Yakane doko kanjepa,” lea.

³⁷Baame dopa leamo doko disaipele dolapome sepala Jisasa watao peambi.

³⁸Watao peambinopa Jisasame maitakaita kandapilyetala dolapo pisoo, “Nyilyambo aki kutao epelyambipi?” lea. Dopa leamopa dolapome baa pisoo, “Lapae, emba andusa palengepe?” leambi. (Kenge Lapae doko kapilyoo, Mana Lenge Akali lenge.)

³⁹Baame dolapo lamaiyoo, “Kanjepale ipupa,” lea. Dokopa dolapome pao baa palenge anda doko kandatala koto doko baa-pipa kateami. Dokopa yuu alemanjetala kiloko gii kitomende laa epea.

⁴⁰Joneme leamo doko sepala Jisasa watao peambino akali dolaponya mende doko Saimone Pitanya kaiminingi Endutu.

⁴¹Akali dokome pupae lao pao baanya kaiminingi Saimone lenge doko kandatala lamaiyoo, “Nalimbame Mesaya doko kandatalambanona,” lea-pyaa. (Kenge Mesaya doko kapilyoo Kataisa lenge.)

⁴²Dopa latala baame Saimone laminao Jisasa kateasa epea. Dokopa Jisasame baa kandatala lao pituu, “Emba Saimone, Jone ikiningi dokona, emba kandao kenge Sipasa lelyona,” lea. (Kenge Sipasa doko kapilyoo Pita lenge. Kenge dolaponya tenge doko kana.)

⁴³Oo yongama Jisasa baa Galili yuu dokonya patoo lao masetala, pao baame Pilipa kandatala lamaiyoo, “Emba namba watao ipu,” lea.

⁴⁴Pilipa baa Endutupa Pitapa-pipa yuu taono mendai Betesaita tangeaka.

⁴⁵Pilipame Nataniele kutao kandatala lamaiyoo, “Mana setapae buku dupanya Moseseme akali mendenya lao pepa piapi dee potopesa dupame apata akali dokonya lao pepa piamipi akali doko kandatalamano. Baa Jisasa. Baa Josepe ikiningi Nasatete tangena,” lea-pyaa.

⁴⁶Dopa leamopa Natanieleme baa lamaiyoo, “Opale epe mende Nasatete yuu dokonya kapa pao pyakalyetape?” lea-pyaa. Pilipame baa lamaiyoo, “Kanjale ipu,” lea-pyaa.