Jon 1:28-46

²⁸Jon douk neyagwleh enyudak balan wabul Betani. Ababul douk blape gani woblahahibamu wolub Jodan douk anan nape nenek baptaisumech umu.

²⁹Wehluwih ali Jon natik Jisas nanakimu nutulunu. Ali Jon naklipech nakli, “Tik anudak alman. Anan douk kobi God ananin nugan sipsip umu. Anan douk nanamali nutal yowenyi manatimaguk mape apudak atap uli moneken ali God eke kobi nunohwen nupe, wak.

³⁰Alman anudak douk yaklipepumanu uli. Douk yaklipepumanu yakli, ‘Ananu nagimali yek uli alman douk nanubu nebenali. Yek wak chokuweli meyoh. Umu moneken, yek douk watak chiyalali e ali anan douk seiwak nalik nape.

³¹Yek yet douk wo idukemech umu anan nanubu meinali alman umu e, wak. Wakuli yek douk yanaki yenek baptaisumech umu inouh nutoglu yopugunmu ali ipak Isrel putulunu pudukemanu.’”

³²Ali Jon naklipech enyudak balan umu chudukemu Jisas umu. Naklipech nakli, “Yek yatik God ananin Michin nyagluki iluh heven kobi enyudak almin manyun umu nyabihi nyape Jisas.

³³Yek yet douk wo idukemech umu alman douk God natalihanu ali nakaganu nanakili douk anan umu e, wak. Wakuli God douk nenek salimume yanamali inek baptaisumech uli naklipe nakli, ‘Eke nyutik yekin Michin nyibihi nyupe ananu alman ali nyuwichanu. Ali anabuk alman douk eke nukech yekin Michin nyuwich wolobaichi elpech ali nyupenyich.’

³⁴Yek douk ayatik enyudak nyatoglu ali douk yaklipepu. Anan douk adul nanubu God ananinu Nuganinu.”

³⁵Wehluwih ali Jon nanu biam ananim disaipel heyotu wolub Jodan.

³⁶Heyotu ali Jon natik umu Jisas nanakumali nichalak nunak. Ali nakli, “Tik anudak alman. Anan douk God ananin nugan sipsip.”

³⁷Douk ananim biam disaipel hemnekanu nakli namudak ali hanamu Jisas hanak.

³⁸Jisas natanamu natulum umu hagimanu hanak ali nasolikam nakli, “Pape paulimu moneken?” Ali amam wata hasolikanu hakli, “Rabai, nyak nyape agnumu?” Muwanamu enyudak balan Rabai umu douk nyakli Nebenyali Tisa.

³⁹Ali naklipam nakli, “Yowi puname munak ali putik agundak yek yapemu.” Ali hanamanu hanak hatik agundak napemu. Hatulugun ali hanubu hananu hape agnabuk ahabuk nyumnah. Umu moneken agagun douk ayawabigun 4 klok uli.

⁴⁰Amudak biam douk hemnek Jon ali hagipech Jisas hanak uli, ananu douk Andru. Anan douk Saimon Pita ananinu owaninu.

⁴¹Ali Andru nenek wisnabul nanak naulimu ananinu saninu Saimon. Nanak nogwatanu ali naklipanu nakli, “Apak amogwatanu Mesaia.” Muwanamu enyudak balan Mesaia umu douk nyakli Krais, anudak douk God natalihanu ali nakaganu nanamali nunolau elpech uli.

⁴²Ali Andru nalau Saimon umu Jisas. Jisas natulunu ali nakli, “Nyak Saimon. Nyak douk Jon ananinu nuganinu. Kamanami douk eke wata chuhwalenyu Sifas.” Bawogenyumu balan umu echudak yeguh Sifas uli Pita douk chakli atin. Chakli Bulbuduk.

⁴³Wehluwih ali Jisas nakli nunamu enyudak provins Galili. Nanak douk nogwatu Filip ali naklipanu nakli, “Yowi nyugipech yek.”

⁴⁴Filip nanu Andru uli Pita douk hanaki atubul wabul Betsaida.

⁴⁵Douk Filip nanak nogwatu Nataniel ali naklipanu nakli, “Anudak alman douk Moses nowemu balan okudak lo nyetemeyok uli buk nyanu enyudak enen amam profet henyemaguk ali hakliyuk umu eke nunakili douk amogwatanu. Anan douk Josep ananinu nuganinu chohwalanamu Jisas uli. Anan douk nanaki wabul Nasaret.”

⁴⁶Ali Nataniel nasolik Filip nakli, “Nyak nyakli deke wosik enech yopichi echudak chutoglu abuldak wabul Nasaret? Ati wak.” Ali Filip naklipanu nakli, “Orait, yowi wunak ali eke nyutulunu.”