JUAN 1:28-46

²⁸Betain lë tib guiedz ne riaaṉ gax ro guiubee Jordán, nëz ne rlan ngbidz; ga no Juan nochoobnis me miech zeeṉe scataa pquiep zho me.

²⁹Biet stib dzew, laa Jesús bdziṉ zaatne no Juan ga. Zeeṉe goṉ Juan me, rëbchaa Juan lo grë miech ne ndxie ga: ―¡Goḻwi gaṉle, lëë meṉ qui goṉ csilaa miech lo grëtaa xtoḻ zho! ¡Me gac zig tib carner yeeṉ ne guet tsogon lo Dios par guiaaṉmbe miech lo doḻ!

³⁰Lëë meṉ rii ga nagoṉ rzet naa lo to zeeṉe rne naa: “Iraa ziaad tib meṉ ne mazdraa non lo naa, sac notaque me; nole me zeeṉe blanso naa lo guidzliu.”

³¹Leṉ dze co niicle naa ruṉbeyd naa me; per laa naa nochoobnis miech sac ible laa naa ziaḻ par glu naa me lo grë zha Israel.

³²Dzigo bzodiidz Juan lo zho, zha goṉlo Juan biet Espíritu Sant gbaa, rlu me zigne rlu tib palom blëz me guic Jesús.

³³―Ne nligaa ruṉbeyd naa me ―rëb Juan―. Per zeeṉe pxeeḻ Dios naa ziaḻchobnis naa miech, hor co në me lo naa: “Zeeṉe gaṉ luu guiet Espíritu Sant gbaa cuëz me guic tib mgui ne nochoobnis luu, dzigo gocnaṉ lëë meṉ co nac meṉ ne rxeeḻ Espíritu Sant zdoo miech.”

³⁴Goṉlo naa blëz Espíritu Sant guic me; gane naṉween naa ne nli Xpëëd Dios nac me.

³⁵Biini liu co, laa Juan zoque ga zonie me chop xpëëdscuel me.

³⁶Ga zo me, goṉ me laa Jesús zieded ga; dzigo rëbchaa me lo zho: ―¡Goḻwi gaṉle! ¡Lëë meṉ qui goṉ nac Xcarner yeeṉ Dios!

³⁷Zigne bin zhow, laa zho zienaḻ zhits Jesús.

³⁸Zeeṉe ptsire lo me, goṉ me laa zho naḻle zhits me; dzigo rëbchaa me lo zho: ―¿Pe nac ziaadnaḻ to zhits naa? ―Maestro ―rëb zho―, laa no racladz gacndioṉ no dieṉ pa rbëz luu.

³⁹Dzigo rëbchaa me lo zho: ―Na gaṉle guio ne, zeeṉa gaṉ to paw. Nacne güeynaḻ zho zhits me, goṉ zho pa lo no me; dzigo blëz zho lo me ga. Ga blozh ptse zho dze, sac ziedzele dze zie zho.

⁴⁰Ndrés lë tib zha ne güeynaḻ zhits me ga; lëë Ndrés co nac bets Simón Pedr.

⁴¹Dzigo zigne briee Ndrés ga güey Ndrés güeyguib Ndrés Simón. Bdziṉ Ndrés rëb Ndrés lo Simón: ―¡Nasi goṉ laa no bdzioṉ Meṉ ne nacle diidz ga cxeeḻ Dios!

⁴²Dzigo güeynie Ndrés Simón zaatne no Jesús ga. Zeeṉe goṉ Jesús Simón, rëbchaa me lo Simón: ―Bina gaṉle, nli Simón nac lë luu ni xingan Jonás nac luu, saṉgue niina laa luu grieelë Cef. (Cef rnee zha Israel quie, laa xtiidz zha Gres rnee zhow Pedr.)

⁴³Biet stib dze co, laa Jesús no nëz tsie me nëz Galilé. Laa me zieriee dze ga, zeeṉe bdzieel me tib mgui lë Lip; dzigo rëbchaa me lo Lip: ―Dënaḻ zhits naa.

⁴⁴Zha Betsaid nac Lip, ni zha coque nac Ndrés grop Simón.

⁴⁵Dzigo güey Lip güeyguib Lip Natanael; rëb Lip lo Natanael: ―¡Laa no bdzioṉ Meṉ ne nacle diidz ga cxeeḻ Dios! Meṉ ne rzeet Moisés lo libr ley ne psaṉ me, meṉ ne scataa bzeet grë zha ne biadteed xtiidz Dios padzeela. ¡Laa no bdzioṉ me, tib meṉ Nazareta, lëë me ga nac Jesús, xingan José!

⁴⁶Pquiab Natanael, rëb Natanael: ―¿Nazaret ye? ¡Gard grieequia tib zha non Nazaret! ―Gotsaa guio ne gaṉle ―rëb Lip―, zeeṉa gaṉzhal luu me. Dzigo laa zho zie.