John 1:28-46

²⁸Eiawa berari Bethany nati da wosedo yari umo Jordan umo be nei da isira. Edo umo ainda John umo umo mi embo ewamei edo isira.

²⁹Iji nei John Iesu uso yei bugutiri gido sisira, “Embo oiawa giwo. Umo teta wo sheep da mei mi busu berari da embobo da wasiri biae awasedo betarago adira umone God da mei ra.

³⁰Matu na ingoda yei siutana, ‘Embo nei amboda bugadira. Uso wasiri mi naso wasiri awa derigari ra ainda be awa naso ai na bae atiri umo atima isira.’ Embo amone eire.

³¹Edo na umo embo averi awa na gaera te na embo umo mi ewamei ise Israel embobo da umo isaga adi bugusena.”

³²Edo John embo da yei umo ro gosisira awa sisira, “Na Asisi Kotopu teta ribo inge utu dodo wosedo Iesu da yei anumbetiri gosisena.

³³Edona umo gaera te God na umo mi embo ewamei anase itiri bugusena amimi naso yei sisira, ‘Imo Asisi Kotopu mi embo da da yei petari gadesa embo re amimi embo Asisi Kotopu mi ewamei adira gio.’

³⁴Edo na rora berari awa etiri gido, gido ingoda yei sena embo amone God da mei na.

³⁵Iji nei John uso ambojimbi etoto de sekago yei ainda bugusira.

³⁶Edo John Iesu bugutiri gido sisira, “Emone God da mei teta wo sheep da mei mi betarago adira.”

³⁷Edo John da ambojimbi etoto ge awa siri ingido Iesu ambo ambo isera.

³⁸Edo ungo umo ambo ambo ero Iesu wareregedo ungo gido ungoda yei nganega isira, “Ingo ro dipapa evi?” Setiri ungomi mina sisera, “Rabbi ainda be awa atopatari imo nonda atima esi?”

³⁹Setero mina sisira, “Puwo gave.” Awasedo ungo daga mambudo umo rawainda atima isiri awa gido ungo ainda ungae atisera ainda be awa ongobo etiri gido.

⁴⁰Edo John da ge ingido Iesu ambo ambo isera ainda embo nei awa Andrew, Simon Peter da namendi.

⁴¹Umo mambudo uso namendi Simon tambudo sisira, “Nango Iesu Keriso Soregari Embo God mi itari bugarase sisira awa tambera.”

⁴²Sedo Simeon budo Iesu da yei bugusira. Edo Iesu umo ditini ise sisira, “Imo awa Simon, John da mei ra te iso jawo awa seka Peter sadera ainda be awa ganuma.”

⁴³Sipo nei Iesu Galilee busu da mambadi sedo erido Philip tambudo sisira, “Na ambo ambo eio.”

⁴⁴Edo Philip awa Bethsaida nati embo ra. Edo Andrew de Peter de awa daedo nati ainda atima isera.

⁴⁵Edo Philip Nathanael tambudo uso yei sisira, “Nango embo Moses mi agodari da gaisira edo binga sari embobo daedo gaisera embo awa tambera. Umone Iesu ra Joseph da mei na Nazareth nati embo ra.”

⁴⁶Setiri Nathanael mi nganega isira, “Ingode Nazareth nati da rora ewamei nei tamberi ta?” Setiri Philip mi mina sisira, “Puio gase.”